ଭୁବନେଶ୍ୱର: ବ୍ୟବସାୟ ନାଁରେ ବ୍ୟାଙ୍କରୁ ଆଣିଥିଲେ ମୋଟା ଅଙ୍କର ଋଣ । ମାତ୍ର ଧାର୍ଯ୍ୟ ସମୟରେ ସୁଝିନାହାନ୍ତି । ବ୍ୟାଙ୍କର ୬୦ ଦିନିଆ ପୈଠ ନୋଟିସ୍ କୁ ମଧ୍ୟ ଖାତିର କରିନାହାନ୍ତି । ଯାହାର ଫଳ ହୋଇଛି ଲଜ୍ଜାଜନକ । ବକେୟା ଋଣ ବାବଦରେ ଋଣଗ୍ରହୀତାଙ୍କ ସ୍ଥାବର ସମ୍ପତ୍ତି ଦଖଲକୁ ନେଇଛନ୍ତି ବ୍ୟାଙ୍କ । ସୁରକ୍ଷତି ବନ୍ଧକ ସମ୍ପତ୍ତିକୁ ସମୟ ପୂର୍ବରୁ ମୁକୁଳେଇବାକୁ ନାଲି ନୋଟିସ୍ ମଧ୍ୟ ଦେଇଛନ୍ତି ।
ଭୁବନେଶ୍ୱର(ଉତ୍ତର) ବିଧାୟକ ସୁଶାନ୍ତ କୁମାର ରାଉତଙ୍କ ପ୍ରତିପତ୍ତିକୁ ମିଳିଛି ଏହି ଝଟକା । ତିନୋଟି ପାରିବାରିକ ବ୍ୟବସାୟିକ ସଂସ୍ଥା- ମେସର୍ସ ଲାବ୍ କେମିକାଲକ୍ସ ପ୍ରାଇଭେଟ୍ ଲିମିଟେଡ୍, ମେସର୍ସ ନ୍ୟାସନାଲ୍ ସାଇଣ୍ଟିଫିକ୍ କର୍ପୋରେସନ୍ ଏବଂ ମେସର୍ସ ସାଇଣ୍ଟିଫିକ୍ ଟ୍ରେଡର୍ସର ନାଁ ଚଢ଼ିଛି ବ୍ୟାଙ୍କ ଋଣ ଖିଲାପକାରୀଙ୍କ ଖାତାରେ । ଏଥିପାଇଁ ବ୍ୟାଙ୍କ ଦଖଲକୁ ଚାଲିଯାଇଛି ରାଉତ ପରିବାରର ମୂଲ୍ୟବାନ ସମ୍ପତ୍ତି ।
ଋଣଗ୍ରହୀତା ଏହି ତିନୋଟି ସଂସ୍ଥା ବିଧାୟକଙ୍କ ବାପା, ମା ଏବଂ ଦାଦାଙ୍କ ନାଁରେ ଚାଲୁଛି । ଯେମିତି କି, ମେସର୍ସ ଲାବ୍ କେମିକାଲକ୍ସ ପ୍ରାଇଭେଟ୍ ଲିମିଟେଡ୍ ର ନିର୍ଦ୍ଦେଶକ ହେଉଛନ୍ତି ସୁଶାନ୍ତଙ୍କ ବାପା ଭକ୍ତ ଚରଣ ରାଉତ ଏବଂ ଦାଦା ଗଗନ ବିହାରୀ ରାଉତ । ଠିକଣା- ପ୍ଲଟ୍ ନଂ: ୪୮୪(ଅଂଶ), ନୀଳକଣ୍ଠ ନଗର, ମୌଜା: ନୟାପଲ୍ଲୀ, ତହସିଲ: ଭୁବନେଶ୍ୱର,୭୫୧୦୧୨ ।
ମେସର୍ସ ନ୍ୟାସନାଲ୍ ସାଇଣ୍ଟିଫିକ୍ କର୍ପୋରେସନ୍ ର ସ୍ୱତ୍ତ୍ୱାଧିକାରୀ ହେଉଛନ୍ତି ସୁଶାନ୍ତଙ୍କ ମାଆ ଶ୍ରୀମତୀ ସୌଭାଗିନୀ ରାଉତ । ଗ୍ୟାରେଣ୍ଟିଦାତା ହେଲେ ବାପା ଭକ୍ତ ଚରଣ ରାଉତ ଏବଂ ଦାଦା ଗଗନ ବିହାରୀ ରାଉତ । ଠିକଣା- ପ୍ଲଟ୍ ନଂ: ୪୮୪(ଅଂଶ), ନୀଳକଣ୍ଠ ନଗର, ମୌଜା: ନୟାପଲ୍ଲୀ, ତହସିଲ: ଭୁବନେଶ୍ୱର, ୭୫୧୦୧୨ ।
ସେହିଭଳି ମେସର୍ସ ସାଇଣ୍ଟିଫିକ୍ ଟ୍ରେଡର୍ସର ସ୍ୱତ୍ତ୍ୱାଧିକାରୀ ଗଗନ ବିହାରୀ ରାଉତ ଥିଲା ବେଳେ ଗ୍ୟାରେଣ୍ଟର ଥିଲେ ଭକ୍ତ ଚରଣ ରାଉତ । ଠିକଣା- ପ୍ଲଟ୍ ନଂ: ୪୮୪(ଅଂଶ), ନୀଳକଣ୍ଠ ନଗର, ମୌଜା: ନୟାପଲ୍ଲୀ, ତହସିଲ: ଭୁବନେଶ୍ୱର, ୭୫୧୦୧୨ ।
ନିଜର ଏହି ତିନୋଟି ସଂସ୍ଥା ନାଁରେ ବିଧାୟକଙ୍କ ବାପା ଏବଂ ଦାଦା ୟୁକୋ ବ୍ୟାଙ୍କରୁ ଋଣ ଆଣିଥିଲେ । ନିଜେ ଥିଲେ ଋଣଗ୍ରହୀତା ଏବଂ ଗ୍ୟାରେଣ୍ଟିଦାତା । ହେଲେ ଠିକ୍ ସମୟରେ ବ୍ୟାଙ୍କକୁ ଋଣ ପରିଶୋଧ କରିନାହାନ୍ତି । ଦିନ ଗଡ଼ିବା ସହ ସୁଧ ବି ବଢ଼ିଗଲା । ସୁଝିବାର ଧାର୍ଯ୍ୟ ତାରିଖ ସୁଦ୍ଧା ସୁଧ ସହ ବକେୟା ରାଶିର ପରିମାଣ ହେଉଛି ୩ କୋଟି ୭୪ ଲକ୍ଷ ୭୧ ହଜାର ୫୮୧ ଟଙ୍କା ୨୪ ପଇସା ।
ଏହି ଦେୟ ଅସୁଲ ପାଇଁ ଗତ ୩୧.୦୭.୨୦୨୫ ଏବଂ ୨୧.୦୮.୨୦୨୫ରେ ୟୁକୋ ବ୍ୟାଙ୍କ ପକ୍ଷରୁ ରାଉତ ପରିବାରକୁ ଡିମାଣ୍ଡ ନୋଟିସ୍ ଜାରି କରାଯାଇଥିଲା । ନୋଟିସ୍ ପାଇବାର ୬୦ ଦିନ ମଧ୍ୟରେ ବକେୟା ପୈଠ କରିବାକୁ କୁହାଯାଇଥିଲା । ମାତ୍ର ଧାର୍ଯ୍ୟ ସମୟରେ ଦେୟ ପୈଠ କରି ନ ଥିଲେ ରାଉତ ବ୍ରଦର୍ସ । ଏହାପରେ ୨୨.୧୦.୨୦୨୫ରେ ବ୍ୟାଙ୍କ ପକ୍ଷରୁ ଦଖଲ ନୋଟିସ୍ ଜାରି କରାଯାଇଥିଲା ।
ୟୁକୋ ବ୍ୟାଙ୍କ, ଆସେଟ୍ ମ୍ୟାନେଜମେଣ୍ଟ ଶାଖା ପକ୍ଷରୁ ସିକ୍ୟୁରିଟାଇଜେସନ୍ ଆଣ୍ଡ ରିକନଷ୍ଟ୍ରକ୍ସନ୍ ଅଫ ଫାଇନାନସିଆଲ୍ ଆସେଟ୍ସ ଆଣ୍ଡ ଏନଫୋର୍ସମେଣ୍ଟ ଅଫ୍ ସିକ୍ୟୁରିଟି ଇଣ୍ଟ୍ରେଷ୍ଟ ଆକ୍ଟ,୨୦୨୨ର ଧାରା ୧୩(୪) ସହିତ ସିକ୍ୟୁରିଟି ଇଣ୍ଟ୍ରେଷ୍ଟ (ଏନଫୋର୍ସମେଣ୍ଟ) ରୁଲ୍ସ ୨୦୦୨ର ରୁଲ୍ ୮ ଅନୁଯାୟୀ ଋଣ ଖିଲାପକାରୀ ରାଉତ ପରିବାରର ସମ୍ପତ୍ତିଗୁଡ଼ିକ ଦଖଲ ନିଆଯାଇଛି ।
ଦୁଇଭାଇ ଭକ୍ତ ଚରଣ ରାଉତ ଏବଂ ଗଗନ ବିହାରୀ ରାଉତ, ପିତା-ସ୍ୱର୍ଗତ ନିଧି ରାଉତଙ୍କ ନାମରେ ଥିବା ଜମି ଏବଂ ଗୃହ ଆଦି ସ୍ଥାବର ସମ୍ପତ୍ତି ଗୁଡ଼ିକୁ ବ୍ୟାଙ୍କ ଦଖଲକୁ ନେଇଛନ୍ତି । ସେଗୁଡ଼ିକ ହେଲା-
୧.ଜିଲ୍ଲା:ଖୋର୍ଦ୍ଧା, ମୌଜା: ନୟାପଲ୍ଲୀ, ଥାନା:ନିଉ କ୍ୟାପିଟାଲ, ତହସିଲ: ଭୁବନେଶ୍ୱର, ସାବିକ ଖାତା ନଂ:୧୯୭୪, ଅନୁରୂପ ମ୍ୟୁଟେସନ୍ ଖାତା ନଂ: ୩୨୮୩/୩୨୪, ପ୍ଲଟ୍ ନଂ: ୧୮୯୯/୩୬୫୫(ମ୍ୟୁଟେସନ୍ ପ୍ଲଟ୍ ନଂ: ୧୮୯୯/୨୫୯୮), ମ୍ୟୁନିସିପାଲିଟି ପ୍ଲଟ୍ ନଂ:୪୮୪(ଅଂଶ), କ୍ଷେତ୍ର: ଏକର ୦.୦୭୫ ଡିସିମିଲି)
୨. ଜିଲ୍ଲା:ଖୋର୍ଦ୍ଧା, ମୌଜା: ନୟାପଲ୍ଲୀ, ଥାନା:ନିଉ କ୍ୟାପିଟାଲ, ତହସିଲ: ଭୁବନେଶ୍ୱର, ଖାତା ନଂ:୧୯୭୪, ପ୍ଲଟ୍ ନଂ:୧୮୯୯/୩୬୫୪, ମ୍ୟୁନିସିପାଲିଟି ପ୍ଲଟ୍ ନଂ:୪୮୪(ଅଂଶ), କ୍ଷେତ୍ର: ଏକର ୦.୩୧୦ ଡିସିମିଲି
୩. ଜିଲ୍ଲା:ଖୋର୍ଦ୍ଧା, ମୌଜା: ନୟାପଲ୍ଲୀ, ଥାନା:ନିଉ କ୍ୟାପିଟାଲ, ତହସିଲ: ଭୁବନେଶ୍ୱର, ଖାତା ନଂ:୧୯୭୫, ରେଭେନ୍ୟୁ ପ୍ଲଟ୍ ନଂ:୧୮୯୯/୩୬୫୫, ମ୍ୟୁନିସିପାଲିଟି ପ୍ଲଟ୍ ନଂ:୪୮୪(ଅଂଶ) ଏବଂ ୪୮୬(ଅଂଶ), କ୍ଷେତ୍ର:ଏକର ୦.୧୦୦ ଡିସିମିଲି ।
ସୂଚନାଯୋଗ୍ୟ, ବ୍ୟାଙ୍କ ଦଖଲକୁ ନେଇଥିବା ଏହି ସମ୍ପତ୍ତି ଭକ୍ତ ଚରଣ ରାଉତ ଏବଂ ଗଗନ ବିହାରୀ ରାଉତଙ୍କ ନାଁରେ ରେକର୍ଡଭୁକ୍ତ ଥିଲେ ମଧ୍ୟ ଭକ୍ତ ଚରଣଙ୍କ ପୁଅ ସୁଶାନ୍ତ ରାଉତଙ୍କୁ ଏହା ଉତ୍ତରାଧିକାରୀ ସୂତ୍ରରେ ମିଳିଛି । ୨୦୨୪ରେ ବିଧାୟକ ପ୍ରାର୍ଥୀପତ୍ର ଦାଖଲ ବେଳେ ସୁଶାନ୍ତ ନିଜ ସତ୍ୟପାଠରେ ଏହି ତଥ୍ୟ ଦର୍ଶାଇଛନ୍ତି । ସତ୍ୟପାଠରେ ନିଜ ଅସ୍ଥାବର ସମ୍ପତ୍ତି ପରିମାଣ ୬ କୋଟି ୨ ଲକ୍ଷ ଏବଂ ପତ୍ନୀଙ୍କର ୨ କୋଟି ୫୩ ଲକ୍ଷ ଟଙ୍କା ଅସ୍ଥାବର ସମ୍ପତ୍ତି ଦର୍ଶାଇଛନ୍ତି ବିଧାୟକ ସୁଶାନ୍ତ ଓରଫ ବାପୁ ରାଉତ ।
