ନୂଆଦିଲ୍ଲୀ: ଏଥର ବଜେଟ୍ ରେ ଦେଶର ମଧ୍ୟବିତ୍ତ ବର୍ଗଙ୍କ ମୁହଁରେ ହସ ଫୁଟାଇଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ବ୍ୟକ୍ତିଗତ ଆୟକରରେ ସେମାନଙ୍କୁ ଜବରଦସ୍ତ ରିହାତି ଦେଇଛନ୍ତି । ବ୍ୟକ୍ତିଗତ ଆୟକରଦାତାଙ୍କୁ ୧୨ ଲକ୍ଷ ଯାଏଁ ଆୟ ଉପରେ ଟିକସ ଦେବାକୁ ପଡ଼ିବନି । ସେହିଭଳି ଚାଷୀ, ମହିଳାଙ୍କୁ ଖୁସି କଲା ଭଳି ଅନେକ ନୂଆ ଯୋଜନା ଅଣାଯାଇଛି । ଯୁବର୍ଗଙ୍କ ପାଇଁ କର୍ମନିଯୁକ୍ତି ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଛି । ଅର୍ଥମନ୍ତ୍ରୀ ଶ୍ରୀମତୀ ସୀତାରମଣ ଆଜି ପାର୍ଲିଆମେଣ୍ଟରେ ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ଉପସ୍ଥାପନ କରିଛନ୍ତି ।
ବଜେଟ୍ ର ସବୁଠାରୁ ବଡ଼ ଘୋଷଣାଟି ହେଉଛି ୧୨ ଲକ୍ଷ ପର୍ଯ୍ୟନ୍ତ ଆ ଉପରେ ଟିକସ ଛାଡ଼ । ଅର୍ଥାତ ୧୨ ଲକ୍ଷ ଯାଏଁ ଆୟ ଉପରେ ଲୋକଙ୍କୁ ଟିକସ ଦେବାକୁ ପଡ଼ିବନି । ବେତନଭୋଗୀଙ୍କୁ ମଧ୍ୟ ଆୟକରରେ ଖୁସି କରାଯାଇଛି । ଷ୍ଟାଣ୍ଡାର୍ଡ ଡିଡକ୍ସନ୍ ୭୫ ହଜାର ମିଶାଇ ୧୨ ଲକ୍ଷ ୭୫ ହଜାର ଆୟ ଉପରେ ବେତନଭୋଗୀଙ୍କୁ କିଛି ଟିକସ ଦେବାକୁ ପଡ଼ିବନି ।
ଏହାଦ୍ୱାରା ନୂଆ ଟାକ୍ସ ରେଜିମ୍ ଆପଣାଉଥିବା ଆୟକରଦାତାଙ୍କ ୧୨ ଲକ୍ଷ ଆୟ ଉପରେ ୮୦ ହଜାର ଟଙ୍କା ସଞ୍ଚୟ ହେବ । ସେହିଭଳି ୧୮ ଲକ୍ଷ ଆୟ ଉପରେ ୭୦ ହଜାର ଏବଂ ୨୫ ଲକ୍ଷ ଆୟ ଉପରେ ୧ ଲକ୍ଷ ୧୦ ହଜାର ଟିକସ ସଞ୍ଚୟ ହେବ ।
ତେବେ କ୍ୟାପିଟାଲ୍ ଗେନ୍ ଭଳି ସ୍ୱତନ୍ତ୍ର ଆୟ ଉତ୍ସ ଥିବା ଟିକସଦାତାଙ୍କୁ ନୂଆ ସ୍ଲାବ୍ ଅନୁଯାୟୀ ଟିକସ ଭରିବାକୁ ହେବ ।
ନୂଆ ଟାକ୍ସ ରେଜିମ୍ ରେ ବାର୍ଷିକ ୪ ଲକ୍ଷ ପର୍ଯ୍ୟନ୍ତ ଆୟ ଉପରେ ୦% ଟିକସ ହାର ଥିବା ବେଳେ ୪ରୁ ୮ ଲକ୍ଷ ଆୟ ଉପରେ ୫%, ୮ରୁ ୧୨ ଲକ୍ଷ ଆୟ ଉପରେ ୧୦%, ୧୨ରୁ ୧୬ ଲକ୍ଷ ଆୟ ଉପରେ ୧୫%, ୧୬ରୁ ୨୦ ଲକ୍ଷ ଆୟ ଉପରେ ୨୦%, ୨୦ରୁ୨୪ ଲକ୍ଷ ଆୟ ଉପରେ ୨୫% ଏବଂ ୨୪ ଲକ୍ଷରୁ ଅଧିକ ଆୟ ଉପରେ ୩୦% ହାରରେ ଟିକସ ଦେବାକୁ ପଡ଼ିବ ।
ବରିଷ୍ଠ ନାଗରିକଙ୍କ ଲାଗି ଟ୍ୟାକ୍ସ ଡିଡକ୍ସନ ୫୦ ହଜାରରୁ ୧ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି ।
ବାର୍ଷିକ ୨ ଲକ୍ଷ ୪୦ ହଜାର ଟଙ୍କା ଘରଭଡ଼ା ଉପରେ ଟିଡିଏସ୍ ଲଗାଯାଉଥିବା ବେଳେ ଏହାକୁ ୬ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି ।
ଅପଡେଟ୍ ରିଟର୍ଣ୍ଣ ଫାଇଲିଂ ସମୟସୀମା ୨ ବଦଳରେ ୪ ବର୍ଷକୁ ବୃଦ୍ଧି କରାଯାଇଛି ।
ବଜେଟ୍ ମୁଖ୍ୟାଂଶ
-୧୦୦ଟି ଜିଲ୍ଲାରେ କୃଷି ଉତ୍ପାଦ ବୃଦ୍ଧି ନେଇ ବିଶେଷ ଯୋଜନା
-ଏଥିରେ ୧.୭୫ କୋଟି କୃଷକ ଲାଭବାନ ହେବେ
-ପରିବା ଓ ଫଳ ଉତ୍ପାଦନ ଉପରେ ଗୁରୁତ୍ବ ଦିଆଯିବ
-ଡାଲି ଜାତୀୟ ଶସ୍ୟରେ ଆତ୍ମନିର୍ଭର ହେବ ଭାରତ
-ଡାଲି ଜାତୀୟ ଶସ୍ୟ ଉତ୍ପାଦନ ପାଇଁ ୬ ବର୍ଷୀୟ ଯୋଜନା
-ହରଡ଼, ମସୁର ଓ ବିରି ଉତ୍ପାଦନ ଉପରେ ସ୍ୱତନ୍ତ୍ର ପ୍ରାଧାନ୍ୟ
-କପା ଉତ୍ପାଦନ ପାଇଁ ୫ ବର୍ଷୀୟ ଯୋଜନା
-କପା ଚାଷ ପାଇଁ ଉନ୍ନତ ଜ୍ଞାନକୌଶଳ ଯୋଗାଇ ଦିଆଯିବ
-ବିହାର ଗଠନ ହେବ ମାଖନା ବୋର୍ଡ
-ସକ୍ଷମ ଅଙ୍ଗନବାଡ଼ି ୨.୦ ଉପରେ ଗୁରୁତ୍ୱ
-ଏହା ଦ୍ୱାରା ୮ କୋଟି ଶିଶୁ ଲାଭବାନ ହେବେ
-ସରକାରୀ ସେକେଣ୍ଡାରୀ ସ୍କୁଲକୁ ମିଳିବ ବ୍ରୋଡବ୍ୟାଣ୍ଡ
-ଆଞ୍ଚଳିକ ଭାଷାରେ ପୁସ୍ତକ ପ୍ରକାଶନ କରାଯିବ
-୫୦ ହଜାର ଅଟଳ ଟିଙ୍କରିଂ ଲାବ ପ୍ରତିଷ୍ଠା କରାଯିବ
-ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରଗୁଡିକରେ ବ୍ରୋଡବ୍ୟାଣ୍ଡ ଯୋଗାଇ ଦିଆଯିବ
-AI ଉପରେ ହେବ ୩ଟି ସେଣ୍ଟର ଫର ଏକ୍ସିଲେନ୍ସ
-ସ୍ୱାସ୍ଥ୍ୟ , କୃଷି ଓ ସ୍ଥାୟୀ ସହର ଉପରେ କାମ କରିବ AI
-ଶିକ୍ଷା କ୍ଷେତ୍ରରେ ସେଣ୍ଟର ଫର ଏକ୍ସିଲେନ୍ସ ପାଇଁ ୫୦୦ କୋଟି
-ମେଡିକାଲ କଲେଜରେ ବଢ଼ିବ ୧୦ ହଜାର ସିଟ୍
-ଆଗାମୀ ୫ ବର୍ଷରେ ବଢ଼ିବ ୭୫ ହଜାର ମେଡିକାଲ ସିଟ୍
-ସବୁ ଜିଲ୍ଲା ହସ୍ପିଟାଲରେ ହେବ କ୍ୟାନ୍ସର ଚିକିତ୍ସା କେନ୍ଦ୍ର
-‘ଆଗାମୀ ୩ ବର୍ଷ ଭିତରେ ହେବ କ୍ୟାନ୍ସର ଚିକିତ୍ସା କେନ୍ଦ୍ର
-୨୦୨୫-୨୬ରେ ହେବ ୨୦୦ଟି ଡେ କେୟାର କ୍ୟାନ୍ସର କେନ୍ଦ୍ର
-ମେଡିକାଲ ପର୍ଯ୍ୟଟନ ପାଇଁ ବିଶେଷ ଯୋଜନା
-୫୦ଟି ପର୍ଯ୍ୟଟନସ୍ଥଳୀର ବିକାଶ କରାଯିବ
-ଉଡାନ ଯୋଜନାକୁ ସଂପ୍ରସାରଣ କରାଯିବ
-୧୨୦ଟି ନୂଆ ସହରକୁ ଉଡାନ ଯୋଜନାରେ ସଂଯୋଗ କରାଯିବ
-ବିହାରରେ ଗ୍ରିନଫିଲ୍ଡ ବିମାନବନ୍ଦର ସ୍ଥାପନ କରାଯିବ
-ବିହାର ମିଥିଳାଂଚଳ ଜଳସେଚନ ପାଇଁ ବିଶେଷ ବ୍ୟବସ୍ଥା
-PM ଗତି ଶକ୍ତି ଯୋଜନାକୁ ସଂପ୍ରସାରଣ କରାଯିବ
-ଆସନ୍ତା ସପ୍ତାହରେ ଆସିବ ନୂଆ ଆୟକର ବିଲ୍
-ନୂଆ କର ବିଲ୍ ଆଗତ ନେଇ ବଜେଟ୍ରେ ଘୋଷଣା
-ଆସିବ ଜନ ବିଶ୍ୱାସ ଆଇନ ୨.୦: ନିର୍ମଳା
-ବୀମା କ୍ଷେତ୍ରରେ FDI ୭୫%ରୁ ୧୦୦%କୁ ବୃଦ୍ଧି
-ବିତ୍ତୀୟ ନିଅଣ୍ଟ ୪.୪%
-ଜୀବନ ରକ୍ଷାକାରୀ ଔଷଧ ଉପରେ କଷ୍ଟମ ଡ୍ୟୁଟି ଛାଡ଼
-୩୬ଟି ଜୀବନ ରକ୍ଷାକାରୀ ଔଷଧ ଉପରେ କଷ୍ଟମ ଡ୍ୟୁଟି ଛାଡ଼
-କଷ୍ଟମ ଡ୍ୟୁଟି ଛାଡ଼ ନେଇ ଅର୍ଥମନ୍ତ୍ରୀଙ୍କ ଘୋଷଣା
-ଶସ୍ତା ହେବ LED ଓ LCD ଟିଭି
-LED ଓ LCD ଟିଭି ଉପରେ କର ହ୍ରାସ
-ମୋବାଇଲ ଫୋନ ବ୍ୟାଟେରୀ ମଧ୍ୟ ଶସ୍ତା ହେବ
-ଶସ୍ତା ହେବ ଚମଡ଼ାଜାତ ଦ୍ରବ୍ୟ, ହ୍ରାସ ହେଲା କର
-ଲିଥିୟମ ବ୍ୟାଟେରୀ ମଧ୍ୟ ଶସ୍ତା ହେବ
