ଭୁୁବନେଶ୍ୱର: ଆଉ ନାହାନ୍ତି ସମୀର ଦେ ଓରଫ୍ ଦାଦା । ବିଜେପିର ଏହି ବରିଷ୍ଠ ରାଜନେତା ଆଜି କଟକର ଏକ ଘରୋଇ ହସ୍ପିଟାଲ୍ ରେ ଆଖି ବୁଜି ଦେଇଛନ୍ତି । ତାଙ୍କୁ ୬୭ ବର୍ଷ ହୋଇଥିଲା । ଦାଦାଙ୍କ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି । ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ମୋହନ ମାଝୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ସମେତ ସବୁ ରାଜନୈତିକ ଦଳର ନେତୃବୃନ୍ଦ ଗଭୀର ଶୋକ ପ୍ରକାଶ କରିଛନ୍ତି ।
ନିମୋନିଆ, କିଡନୀ ଏବଂ ରକ୍ତ ଚାପ ରୋଗରେ ପୀଡ଼ିତ ଥିଲେ ସମୀର ଦେ । ତାଙ୍କ ଫୁସଫୁସ୍ ରେ ସଂକ୍ରମଣ ଯୋଗୁଁ କିଛି ଦିନ ତଳେ ତାଙ୍କ ଅବସ୍ଥା ଗୁରୁତର ହୋଇପଡ଼ିଥିଲା । ଚିକିତ୍ସା ପାଇଁ ତାଙ୍କୁ ଏକ ଘରୋଇ ହସ୍ପିଟାଲ୍ ରେ ଭର୍ତ୍ତି କରାଯାଇଥିଲା । ଡାକ୍ତରମାନଙ୍କ ସକଳ ଚେଷ୍ଟା ସତ୍ତ୍ୱେ ସେ ବଞ୍ଚିପାରିନାହାନ୍ତି । ଚିକିତ୍ସାଧୀନ ଅବସ୍ଥାରେ ଆଜି ଅପରାହ୍ନରେ ତାଙ୍କର ପରଲୋକ ଘଟିଛି ।
ସମୀର ଦେ ଦୀର୍ଘ ୪ ଦଶନ୍ଧି ଧରି ଓଡ଼ିଶା ରାଜନୀତିରେ ସକ୍ରିୟ ଥିଲେ । ଓଡ଼ିଶାରେ ବିଜେପିକୁ ଶକ୍ତିଶାଳୀ କରିବାରେ ଯେଉଁ କେତେଜଣଙ୍କର ପ୍ରମୁଖ ଭୂମିକା ଥିଲା ଦାଦା ସେମାନଙ୍କ ମଧ୍ୟରେ ଜଣେ ଥିଲେ । ୧୯୯୫ ମସିହାରେ ପ୍ରଥମ ଥର ପାଇଁ ବିଜେପି ଟିକେଟରେ କଟକ ସହର ଆସନରୁ ବିଧାନସଭାକୁ ନିର୍ବାଚିତ ହୋଇଥିଲେ । ପରେ ପରେ ୨୦୦୦ ଏବଂ ୨୦୦୪ ମସିହାରେ ମଧ୍ୟ ବିଧାୟକ ହୋଇଥିଲେ । ୯ ବର୍ଷର ବିଜେଡି-ବିଜେପି ମେଣ୍ଟ ସରକାରରେ ସେ କ୍ୟାବିନେଟ୍ ମନ୍ତ୍ରୀ ଥିଲେ । ୨୦୦୦ରୁ ୨୦୦୪ ନଗର ଉନ୍ନୟନ ଏବଂ ୨୦୦୪ରୁ ୨୦୦୯ ଉଚ୍ଚଶିକ୍ଷା ମନ୍ତ୍ରୀ ଥିଲେ । ଜଣେ ଦକ୍ଷ ମନ୍ତ୍ରୀ ଭାବେ ତାଙ୍କର ଯଥେଷ୍ଟ ସୁନାମ ଥିଲା ।
ଦାଦା କେବଳ ଜଣେ ଦକ୍ଷ ମନ୍ତ୍ରୀ ନୁହଁନ୍ତି, ଜଣେ ଉତ୍ତମ ଜନ ପ୍ରତିନିଧି ଥିଲେ । ତାଙ୍କର ଅମାୟିକ, ମେଳାପୀ ଓ ସ୍ନେହୀ ବ୍ୟବହାରରେ ସେ ସମସ୍ତଙ୍କୁ ଆପଣାର କରିଥିଲେ । କଟକ ସହରର ସେ ଜଣେ ମୁରବୀ ସ୍ଥାନୀୟ ବ୍ୟକ୍ତି ଥିଲେ ।
ଆସନ୍ତାକାଲି ଖାନନଗର ଶ୍ମଶାନରେ ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଶେଷକୃତ୍ୟ ସମ୍ପନ୍ନ ହେବ । ସ୍ୱର୍ଗତ ଦେ’ ଙ୍କ ମରଶରୀର ପ୍ରଥମେ ଓଡ଼ିଶା ବିଧାନସଭାକୁ ନିଆଯିବ । ତା’ ପରେ ବିଜେପି ରାଜ୍ୟ କାର୍ଯ୍ୟାଳୟକୁ ନିଆଯିବ । ସେଠାରୁ କଟକସ୍ଥିତ ପୈତୃକ ଘରକୁ ଅଣାଯିବ । ସେଠାରୁ ଖାନନଗର ମଶାଣି ଅଣାଯିବ ବୋଲି କଟକ ଜିଲ୍ଲାପାଳ ସୂଚନା ଦେଇଛନ୍ତି ।
