ଭୁବନେଶ୍ୱର: ରାସ୍ତା ଓ କୋଠାବାଡ଼ିର ପୂର୍ବତନ ମୁଖ୍ୟଯନ୍ତ୍ରୀ ତାରା ପ୍ରସାଦ ମିଶ୍ର ବନ୍ଧା ହୋଇଛନ୍ତି । ସରକାରୀ ଅର୍ଥକୁ ଲୁଟ୍ କରି ଅଚଳାଚଳ ସମ୍ପତ୍ତିର ମାଲିକ ବନିଥିବା ଏହି ବାବୁଙ୍କ ଉପରେ ଗତକାଲି ଭିଜିଲାନସ୍ ରେଡ୍ ହୋଇଥିଲା । ବିପୁଳ ଆୟ ବହିର୍ଭୂତ ସମ୍ପତ୍ତି ରଖିଥିବା ଅଭିଯୋଗରେ ଆଜି ତାଙ୍କୁ ଗିରଫ କରିଛି । ଅପରାହ୍ନରେ କୋର୍ଟ ଚାଲାଣ କରାଯିବ ।
ଗତକାଲି ଭିଜିଲାନସ୍ ର ୯ଟି ଟିମ୍ ଏହି ବାବୁଙ୍କର ଭୁବନେଶ୍ୱର ନୟାପଲ୍ଲୀସ୍ଥିତ ଘର, କଟକ ଆଠଗଡ଼ସ୍ଥିତ ପୈତୃକ ଘର ଆଦି ୯ଟି ସ୍ଥାନରେ ଚଢ଼ଉ କରି ତାଙ୍କର ୨୦ କୋଟିରୁ ଉଦ୍ଧ୍ୱର୍ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ କରିଥିଲା । ଭୁବନେଶ୍ୱର ଓ ଝାରସୁଗୁଡ଼ାରେ ତାଙ୍କର ୧୦ଟି ବିଳାସପୂର୍ଣ୍ଣ ଫ୍ଲାଟ୍ ଅଛି । ଭୁବନେଶ୍ୱରର ନିଳାଦ୍ରୀବିହାର, ଆଇଗିଣିଆ, ଭରତପୁର, ହଂସପାଳ ଅଞ୍ଚଳରେ ଥିବା ଦାମୀ ଆପାର୍ଟମେଣ୍ଟରେ ବାବୁଙ୍କର ୭ଟି ଫ୍ଲାଟ୍ ଥିବା ବେଳେ ଝାରସୁଗୁଡ଼ାରେ ୩ ଟି ଦାମୀ ଫ୍ଲାଟ୍ ଅଛି । ଏହି ୧୦ଟି ଯାକ ଫ୍ଲାଟ୍ ର ମୂଳ୍ୟ ୧୫ କୋଟିରୁ ଅଧିକ ହେବ । ଏହାଛଡ଼ା ଭୁବନେଶ୍ୱର, କଟକ ଏବଂ ଜଟଣୀରେ ତାଙ୍କର ୭ଟି ପ୍ଲଟ୍ ବି ରହିଛି ।
ତାଙ୍କ ଘରୁ ଅଢ଼େଇ କେଜି ସୁନା ଗହଣା, ୩୭୦ ଗ୍ରାମ୍ ହୀରା, ୧୩ ଲକ୍ଷ ଟଙ୍କା ମୂଲ୍ୟର ରୋଲେକ୍ସ ଘଡ଼ି, ନଗଦ ୬ ଲକ୍ଷ ଟଙ୍କା, ଲକ୍ଷ ଲକ୍ଷ ଟଙ୍କାର ଆସବାବପତ୍ର, ପ୍ରାୟ କୋଟିଏ ଟଙ୍କା ମୂଲ୍ୟର ଏକ ମର୍ସିଡିଜ୍, ଗୋଟିଏ କିଆ କାର୍ ଠାବ କରାଯାଇଛି । ବ୍ୟାଙ୍କରେ କେବଳ ୨ କୋଟି ୭୦ ଲକ୍ଷରୁ ଅଧିକ ଟଙ୍କା ଜମା ସହ ବୀମା ଓ ବଣ୍ଡ୍ ଜମା ବି ରହିଛି । ଏକାଧିକ ବ୍ୟାଙ୍କରେ ଲକର୍ ମଧ୍ୟ ଠାବ କରାଯାଇଛି ।
ବାବୁ କଳାଟଙ୍କାରେ ବିଦେଶ ବୁଲି ମଉଜ କରିଥିବାର ଅନେକ ତଥ୍ୟ ଭିଜିଲାନସ୍ ହାତରେ ଲାଗିଛି । ତାଙ୍କ ଘରୁ ଆମେରିକା, ଥାଇଲାଣ୍ଡ, ଭିଏତନାମ, ୟୁଏଇ, କାନାଡ଼ା, ମେକ୍ସିକୋ, ମାଲେସିଆ ଓ ସିଙ୍ଗାପୁର ମୁଦ୍ରା ଜବତ କରାଯାଇଛି । ଝିଅର ଡାକ୍ତରୀ ପଢ଼ା ପାଇଁ ୮୦ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ।
ସୂଚନାଯୋଗ୍ୟ, ତାରା ମିଶ୍ର ୧୯୮୪ ମସିହା ଫେବ୍ରୁଆରୀ ୨୦ରେ ଭୁବନେଶ୍ୱର ଆର ଆଣ୍ଡ ବି ସହକାରୀ ଯନ୍ତ୍ରୀ ଭାବେ ଚାକିରି ଜୀବନ ଆରମ୍ଭ କରିଥିଲେ । ୨୦୦୭ ରେ ନିର୍ବାହ ଯନ୍ତ୍ରୀ ଭାବେ ପଦୋନ୍ନତି ପାଇ ଇଡକୋରେ ନିଯୁକ୍ତି ପାଇଥିଲେ । ୨୦୦୯ରେ ଭବାନୀପାଟଣା ଓ ୨୦୧୩ରେ ପାଣିପୋଇଲି ଡିଭିଜନରେ କାର୍ଯ୍ୟ କରିଥିଲେ । ୨୦୧୯ରେ ଅଧୀକ୍ଷଣ ଯନ୍ତ୍ରୀ ଭାବେ ପଦୋନ୍ନତି ପାଇ କଟକରେ ନିଯୁକ୍ତି ପାଇଥିଲେ । ୨୦୨୧ ରେ ପଦୋନ୍ନତି ପାଇ ମୁଖ୍ୟଯନ୍ତ୍ରୀ ଭାବେ ଭୁବନେଶ୍ୱରରେ ନିଯୁକ୍ତି ପାଇଥିଲେ । ଗତବର୍ଷ ଅର୍ଥାତ ୨୦୨୩ ଜୁନ୍ ରେ ଚାକିରିରୁ ଅବସର ନେଇଥିଲେ ।
ଚାକିରି କାଳରେ ସେ ପିସି ମାଷ୍ଟର୍ ବୋଲି ଜଣାଶୁଣା ଥିବା ଏବେ କୁହାଯାଉଛି । ମାତ୍ର ଏ ସମ୍ପର୍କରେ ଭିଜିଲାନସ୍ କି ସାମ୍ବାଦିକମାନେ କେମିତି ଜାଣିପାରିଲେ ନାହିଁ ତାହା ଜନସାଧାରଣଙ୍କୁ ଆଶ୍ଚର୍ଯ୍ୟ କରୁଛି । ସେତେବେଳେ ତାଙ୍କର ପିସି କାରବାର ଲୋକଲୋଚନକୁ ଆସିଥିଲେ ହୁଏତ ଗୋଟିଏ ପରେ ଗୋଟିଏ ପଦୋନ୍ନତି ସହ ସରକାରୀ ଅର୍ଥକୁ ଲୁଟି ଅମାପ ସମ୍ପତ୍ତି କରିପାରି ନ ଥାଆନ୍ତେ । ତାଙ୍କ ପଛରେ କେଉଁ ରାଜନେତାଙ୍କ ଆଶୀର୍ବାଦ ଥିଲା ତାହା ମଧ୍ୟ ତଦନ୍ତସାପେକ୍ଷ ।
