ଭୁବନେଶ୍ୱର: ପୁରୀରେ ବିଜେପିର ତିନି ଦିନିଆ ପ୍ରାଦେଶିକ ପ୍ରଶିକ୍ଷଣ ଶିବିର ଶେଷ ହୋଇଛି । ଦୁର୍ଗାପୂଜା ପରେ ନିର୍ବାଚନ ପାଇଁ ଲଢ଼େଇ ଜୋରଦାର କରିବାକୁ ଦଳ ନିଷ୍ପତ୍ତି ନେଇଛି । ୨୦୨୪ ମସିହାରେ ବିଜେପି ଓଡ଼ିଶାରେ ଯେଭଳି ଶାସନକୁ ଆସିବ ସେ ନେଇ ଖସଡ଼ା ପ୍ରସ୍ତୁତ କରାଯାଇଛି । ମାଳ ମାଳ କେନ୍ଦ୍ରୀୟ ନେତା ଓଡ଼ିଶା ବିଜେପି ନେତାଙ୍କୁ ମନ୍ତ୍ର ଦେଇ ଫେରିଛନ୍ତି । ତେବେ ଯାହାଙ୍କ ବିନା ଇସାରାରେ ରାଜ୍ୟ ବିଜେପିରେ ପତ୍ର ହଲେନି, ପ୍ରଶିକ୍ଷଣ ଶିବିରରେ ତାଙ୍କର ଅନୁପସ୍ଥିତି ଚର୍ଚ୍ଚାର ବିଷୟ ହୋଇଛି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କଥା ଆମେ କହୁଛୁ । ପୁରୀ ପ୍ରଶିକ୍ଷଣ ଶିବିରକୁ ୧୩ ତାରିଖରେ ସେ ଉଦଘାଟନ କରିବାର କାର୍ଯ୍ୟକ୍ରମ ସ୍ଥିର ହୋଇଥିଲା । ମାତ୍ର କୌଣସି କାରଣରୁ ସେ ଦିଲ୍ଲୀରୁ ଆସିପାରିଲେ ନାହିଁ । ନବନିଯୁକ୍ତ ପ୍ରଭାରୀ ସୁନିଲ ବଂଶଲ ବି ଆସିଲେ ନାହିଁ । ବିଜେପି ରାଜ୍ୟ ସଭାପତି ସମୀର ମହାନ୍ତି ଏବଂ ଶ୍ରୀମତୀ ଡି. ପୁରନ୍ଦେଶ୍ୱରୀ ସେମାନଙ୍କ କାମ ଚଳେଇଦେଲେ ।
ତା’ ପରଦିନ ଧର୍ମେନ୍ଦ୍ର ଆସିବେ ବୋଲି କୁହାଗଲା । ସାମ୍ବାଦିକମାନେ ତାଙ୍କ ଅପେକ୍ଷାରେ ରହିଲେ । ମାତ୍ର ସେ ଆସିଲେ ନାହିଁ । ପ୍ରଶିକ୍ଷଣ ଶିବିରକୁ ଉଦଯାପନ କରିବେ ବୋଲି ପରବର୍ତ୍ତୀ ସମୟରେ ପ୍ରଚାର ହେଲା । ମାତ୍ର ସେଦିନ ବି ଆସିଲେ ନାହିଁ । ରାଷ୍ଟ୍ରୀୟ ସାଧାରଣ ସମ୍ପାଦକ(ସଂଗଠନ) ବି.ଏଲ୍. ସନ୍ତୋଷ, କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ପୂର୍ବତନ କେନ୍ଦ୍ରମନ୍ତ୍ରୀ ରାଧାମୋହନ ସିଂହ ଉପସ୍ଥିତ ରହି ରାଜ୍ୟ ନେତାଙ୍କୁ ପାଠ ପଢ଼ାଇଲେ ।
ନିଷ୍କ୍ରିୟ ହୋଇପଡ଼ିଥିବା ଓଡ଼ିଶା ରାଜ୍ୟ ବିଜେପି ସଂଗଠନକୁ ସକ୍ରିୟ କରି ୨୦୨୪ ନିର୍ବାଚନର ରୋଡମ୍ୟାପ୍ ପ୍ରସ୍ତୁତ କରିବାକୁ ଏହି ପ୍ରଶିକ୍ଷଣ ଶିବିର ଉଦ୍ଦିଷ୍ଟ ଥିଲା । ପ୍ରାୟ ସାଢ଼େ ତିନି ବର୍ଷର ନିରବତା ପରେ ଅମିତ ଶାହା ଓଡ଼ିଶା ଆସିବା ଏବଂ ସୁନିଲ ବଂଶଲଙ୍କୁ ଦାୟିତ୍ୱ ଦେବା ପରେ ଏହି ସାଂଗଠନିକ ଚଳଚଞ୍ଚଳ ପର୍ବ ଆରମ୍ଭ ହୋଇଛି । ମାତ୍ର ଧର୍ମେନ୍ଦ୍ର ପ୍ରଧାନଙ୍କ ଅନୁପସ୍ଥିତି ଖୋଦ୍ ବିଜେପି ପ୍ରେମୀଙ୍କୁ ଅଖାଡୁଆ ଲାଗୁଛି ।
କାରଣ ଧର୍ମେନ୍ଦ୍ର ବିଦେଶ ଗସ୍ତରେ ନ ଥିଲେ କି କିଛି ଅସୁସ୍ଥତା ନ ଥିଲା । ପ୍ରଶିକ୍ଷଣ ଶିବିର ଶେଷ ଦିନ ୧୫ ତାରିଖରେ ଭୁବନେଶ୍ୱରରେ ଆୟୋଜିତ ଅନୁଷ୍ଠିତ ଏକ କାର୍ଯ୍ୟକ୍ରମରେ ସେ ଦିଲ୍ଲୀରୁ ଭିଡିଓ କନଫରେନ୍ସିଂରେ ଯୋଗଦେଇଥିଲେ । ଏହି ପରିପ୍ରେକ୍ଷୀରେ ଦଳର ପୁରୀ ପ୍ରଶିକ୍ଷଣ ଶିବିରରେ ତାଙ୍କର ଅନୁପସ୍ଥିତି ଦଳୀୟ ମହଲରେ ଅନେକଙ୍କୁ ହଜମ ହେଉନାହିଁ । ତାଙ୍କର ଅନୁସ୍ଥିତିର କାରଣ ସମ୍ପର୍କରେ ରାଜ୍ୟ ନେତୃତ୍ୱ ସ୍ପଷ୍ଟ ନ କରିବା ସେମାନଙ୍କୁ ଅଧିକ ଦ୍ୱନ୍ଦରେ ପକାଇଛି ।
ପ୍ରଶିକ୍ଷଣ ଶିବିରରେ ଧର୍ମେନ୍ଦ୍ରଙ୍କ ଅନୁପସ୍ଥିତିକୁ ନେଇ ତାଙ୍କର ବିରୋଧୀ ଗୋଷ୍ଠୀ ବେଶ୍ ଖୁସି ଅଛନ୍ତି । ଓଡ଼ିଶା ବିଜେପିରେ ଆଉ ମୁଣ୍ଡ ନ ପୂରାଇବାକୁ ହାଇକମାଣ୍ଡ ତାଙ୍କୁ କୁଆଡ଼େ ନିର୍ଦ୍ଦେଶ ଦେଇଛନ୍ତି ବୋଲି ଏହି ଗୋଷ୍ଠୀ ପ୍ରଚାର କରୁଛନ୍ତି । ଅନ୍ୟପକ୍ଷରେ ଦିଲ୍ଲୀରେ କାର୍ଯ୍ୟ ବ୍ୟସ୍ତତା ଯୋଗୁଁ ଧର୍ମେନ୍ଦ୍ର ଓଡ଼ିଶା ଆସି ପାରି ନ ଥିବା ଅନୁଗତ ଗୋଷ୍ଠୀ କହିଛନ୍ତି । ତେବେ କୋଉଟା ସତ ଆଉ କୋଟା ମିଛ ତାହା ସ୍ପଷ୍ଟ ଜଣାପଡ଼ିନାହିଁ ।
ଇତିମଧ୍ୟରେ ବରଗଡ଼ ସାଂସଦ ସୁରେଶ ପୂଜାରୀଙ୍କ ଏକ ଟୁଇଟ୍ ବିଜେପିର ଅନ୍ଦରମହଲ ଚର୍ଚ୍ଚାକୁ ବଢ଼ାଇ ଦେଇଛି । ଏକ ସାଙ୍ଗରେ ବସ, ଏକ ସାଙ୍ଗରେ ଭାବ, ଏକ ସାଙ୍ଗରେ ଚାଲ.. ପ୍ରଶିକ୍ଷଣ ଶିବିରର ପାଥେୟ ଥିଲା ବୋଲି ସେ ଟୁଇଟ୍ କରିଛନ୍ତି । ତେବେ ସୁରେଶଙ୍କ ଏଭଳି ଶବ୍ଦ ସଂଯୋଜନାର ଗହନ କଥା କ’ଣ ତାହା ବୁଝିବା ଲୋକ ଠିକ୍ ବୁଝିଛନ୍ତିି ବୋଲି ଦଳର ଜଣେ ବରିଷ୍ଠ ନେତା କହିଛନ୍ତି ।
ସେପଟେ ପୁରୀ ପ୍ରଶିକ୍ଷଣ ଶିବିରରୁ ସେମାନେ ବିଲକୁଲ ଉତ୍ସାହିତ ହୋଇ ନ ଥିବା କିଛି ବରିଷ୍ଠ ନେତା ନିଜ ନାଁ ଗାପନ ରଖିବା ସର୍ତ୍ତରେ କହିଛନ୍ତି । ପୁରୀ ବଳିଆପଣ୍ଡାସ୍ଥିତ ହୋଟେଲ ବ୍ଲୁ ଲିଲିଠାରେ ଆୟୋଜିତ ହୋଇଥିବା ଏହି ତିନିଦିନିଆ ଶିବିର କିଛି ନେତାଙ୍କ ପାଇଁ କେବଳ ମନୋରଞ୍ଜନ ଥିଲା । ଜୁଏଲ ଓରାମ, ବିଶ୍ୱେଶ୍ୱର ଟୁଡୁ, ପ୍ରଦୀପ ପୁରୋହିତଙ୍କ ଭଳି କିଛି ନେତା ଗଣମାଧ୍ୟମରେ ଧମାକା କରି ମନେ ମନେ ଖୁସି ହୋଇଛନ୍ତି । ଏହା ଦଳୀୟ କର୍ମୀଙ୍କ ଉପରେ କୌଣସି ପ୍ରଭାବ ପକାଇ ନାହିଁ ବୋଲି ସେମାନେ କହିଛନ୍ତି ।
ସେମାନଙ୍କ କହିବାନୁଯାୟୀ, ବିଜେଡି-ବିଜେପି ଉପରସ୍ତରରେ ସଲାସୁତୁରା ଥିବା ଲୋକଙ୍କ ମଧ୍ୟରେ ବଦ୍ଧ ଧାରଣା ସୃଷ୍ଟି ହୋଇଛି । ଆଗାମୀ ନିର୍ବାଚନ ଲଢ଼ିବା ବେଳକୁ ଦଳର ଆଭିମୁଖ୍ୟ କ’ଣ ରହିବ ଏବଂ ଲୋକଙ୍କୁ କି ଜବାବ ଦିଆଯିବ ସେ ନେଇ କେନ୍ଦ୍ରୀୟ ନେତାମାନେ ସ୍ପଷ୍ଟ କଲେନି । ବିଜେଡ଼ି ବିରୋଧରେ କଠୋର ହେବାକୁ ମଧ୍ୟ ସେଭଳି ରଣନୀତି ପ୍ରସ୍ତୁତ ହେଲାନାହିଁ । ତେଣୁ ଏଠି ବୁଥ୍ ଓ ପଞ୍ଚାୟତସ୍ତରରୁ କେମିତି ଲଢ଼େଇ ହେବ ବୋଲି ସେମାନେ ପ୍ରଶ୍ନ କରିଛନ୍ତି ।