କଟକ: ମହାନ୍ କଣ୍ଠଶିଳ୍ପୀ ଚିତ୍ତ ଜେନା ଇହ ଜଗତରେ ଆଉ ନାହାନ୍ତି । କଟକର ଏକ ଘରୋଇ ହସ୍ପିଟାଲ୍ ରେ ସେ ୭୬ ବର୍ଷ ବୟସରେ ଶେଷନିଶ୍ୱାସ ତ୍ୟାଗ କରିଛନ୍ତି । ୩ ସପ୍ତାହ ତଳେ ଅସୁସ୍ଥ ହୋଇ ହସ୍ପିଟାଲ୍ ରେ ଚିକିତ୍ସିତ ହେଉଥିଲେ । ଗତ ରାତିରୁ ତାଙ୍କ ସ୍ୱାସ୍ଥ୍ୟାବସ୍ଥା ଅଧିକ ଖରାପ ହୋଇପଡ଼ିଥିଲା । ଡାକ୍ତରମାନଙ୍କ ସମସ୍ତ ଚେଷ୍ଟା ସତ୍ତ୍ୱେ ଆଜି ସକାଳୁ ସେ ଆଖି ବୁଜି ଦେଇଥିଲେ । ଚିତ୍ତ ଜେନାଙ୍କ ମୃତ୍ୟୁ ଓଡ଼ିଶା ଫିଲ୍ମ ଓ ସଙ୍ଗୀତ ଜଗତରେ ଶୋକର ଛାୟା ଖେଳାଇ ଦେଇଛି । ଶେଷ ଦର୍ଶନ ପାଇଁ ତାଙ୍କ ରାଣୀହାଟ ବାସଭବନରେ ଭିଡ଼ ଲାଗିଛି ।
୧୯୪୧ ରେ ଜନ୍ମିତ ଚିତ୍ତ ଜେନା ୧୯୭୪ ମସିହାରେ ପ୍ରଥମ କରି ‘ମନ ଆକାଶ’ ଚଳଚିତ୍ରରେ କଣ୍ଠଦାନ କରିଥିଲେ । ତା’ପରଠାରୁ ସେ ପଛକୁ ଫେରିନାହାନ୍ତି । ତାଙ୍କ ସ୍ୱରର ଯାଦୁ ଓଡ଼ିଶାର ଘରେ ଘରେ ତାଙ୍କୁ ପରିଚିତ କରାଇଛି । ସେ ଗାଇଥିବା ମୋ ପ୍ରିୟାଠାରୁ କିଏ ଅଧିକ ସୁନ୍ଦର, ପ୍ରିୟା ବିନା ଝୁରେ ଖାଲି, ରୂପ ହୋଇଥିବ ଲାବଣ୍ୟବତୀ, ଏ ପର୍ବତ କୁଞ୍ଚି କୁଞ୍ଚିକା, ପୂଜା କାହିଁ ପୂଜା, ଏ ବନ ଝରଣା, କାହିଁଗଲ ଶ୍ୟାମଘନ, ନଜାରେ ନଜାରେ ଗୋରି ଯାତରା ଦେଖି, ମାଣିକ ଆଲୋ ଆଲୋ ମାଣିକ ଆଦି ଗୀତ କାଳଜୟୀ ହୋଇ ରହିଛି । ପ୍ରାୟ ୩୫ ବର୍ଷ ତଳେ ସିନ୍ଦୁର ବିନ୍ଦୁ ଚଳଚିତ୍ରର ଗାଇଥିବା ସେହି ଗୀତ ମୋ ପ୍ରିୟା ଠାରୁ କିଏ ଅଧିକ ସୁନ୍ଦର ଆଜି ମଧ୍ୟ ଶ୍ରୋତାଙ୍କ ମନରେ ଗୁଣୁ ଗୁଣୁଉଛି । ତାଙ୍କ କଣ୍ଠ ସ୍ୱର ଅନନ୍ୟ ଓ ସେଥିରେ ଭରି ରହିଥିବା ମାଧୁର୍ଯ୍ୟ ଶ୍ରୋତାଙ୍କ ହୃଦୟରେ ଛାପି ହୋଇଯାଏ । ଓଡ଼ିଶାର ଘରେ ଘରେ ତାଙ୍କର ସବୁ ଗୀତ ଆଜି ବି ବେଶ ଲୋକପ୍ରିୟ । ଏହି ମହାନ୍ ଗାୟକଙ୍କ ସ୍ମୃତି ପ୍ରତି ଆମର ଗଭୀର ଶ୍ରଦ୍ଧାଞ୍ଜଳି ।
