ମେକ୍ ଇନ୍ ଓଡ଼ିଶା: ସ୍ୱାସ୍ଥ୍ୟସେବା କ୍ଷେତ୍ରରେ ୨୭୫୦ କୋଟିର ପୁଞ୍ଜି

ଭୁବନେଶ୍ୱର: ରାଜ୍ୟର ସ୍ୱାସ୍ଥ୍ୟସେବା କ୍ଷେତ୍ରକୁ ଆସିବ ୨୭୫୦ କୋଟି ଟଙ୍କାର ପୁଞ୍ଜି । ମେକ୍ ଇନ୍ ଓଡ଼ିଶା କନକ୍ଲେଭ୍ ର ତୃତୀୟ ଦିନରେ ଆଜି ବିଭିନ୍ନ ନିବେଶକାରୀଙ୍କଠାରୁ ଏହି ପ୍ରତିଶ୍ରୁତି ଆସିଛି । ଏକ ଡିଜିଟାଲ୍ ଡିସପେନସରି ସ୍ଥାପନ ପାଇଁ ୯୦ କୋଟି, ଡାଇଗୋନିଷ୍ଟ ଏବଂ ଡାଏଲିସିସ୍ ସର୍ଭିସେସ୍ ପାଇଁ ୭୦୦ କୋଟି, ୨୫ ଟି ଜାଗାରେ ସୁଲଭ ସ୍ୱାସ୍ଥ୍ୟସେବା ପ୍ରକଳ୍ପ ପାଇଁ ୧୩୦୦ କୋଟି, ଝାରସୁଗୁଡ଼ାରେ ଏକ କାର୍ଡିଆକ୍ କେୟାର୍ ପାଇଁ ୭୦ କୋଟି, କ୍ୟାନସର କେୟାର ପ୍ରକଳ୍ପ ପାଇଁ ୬୦୦ କୋଟି ପୁଞ୍ଜି ବିନିଯୋଗର ପ୍ରସ୍ତାବ ରହିଛି । ୨ରୁ ୩ ବର୍ଷ ମଧ୍ୟରେ ଏହା କାର୍ଯ୍ୟକାରୀ ହେବ ।

ଆଜିର କନକ୍ଲେଭ୍ ରେ ଏମଏସଏମଇ ସହ ସ୍ୱାସ୍ଥ୍ୟସେବା କ୍ଷେତ୍ର ଥିଲା ଫୋକସ୍ ରେ । ଆୟୋଜିତ ସେମିନାରର ବିଷୟବସ୍ତୁ ଥିଲା “ୟୁନିଭରସାଲ୍ ହେଲଥକେୟାର ଇନ ଓଡ଼ିଶା-ଇଚ ଲାଇଫ ମ୍ୟାଟର୍ସ’ । ଏଥିରେ ରାଜ୍ୟ ସରକାରଙ୍କ ପକ୍ଷରୁ ସ୍ୱାସ୍ଥ୍ୟସେବା ଭିଜନ୍ ୨୦୨୫ ଉପସ୍ଥାପିତ ହୋଇଥିଲା । ପ୍ରଥମ ଅଧିବେସନରେ ରାଜ୍ୟ ସରକାରଙ୍କ ବିଭିନ୍ନ ସ୍କିମ୍, ସଫଳତା ଏବଂ ସୁଯୋଗ ଆଦି ସମ୍ପର୍କରେ ଆଲୋଚନା ହୋଇଥିଲା । ଦ୍ୱିତୀୟ ଅଧିବେସନରେ ଆୟୋଜିତ ପ୍ୟାନେଲ୍ ଆଲୋଚନାରେ ସ୍ୱାସ୍ଥ୍ୟସେବା ଶିଳ୍ପର ନାମୀ ଉଦ୍ୟୋଗପତିମାନେ ଭାଗ ନେଇଥିଲେ । ସେମାନେ ହେଲେ ୟୁଏଇ ବିଆର ଲାଇଫର ଅଧ୍ୟକ୍ଷ ଡ. ବି.ଆର.ସେଟ୍ଟୀ, ମେଡ଼ିକା ଗ୍ରୁପ୍ ଅଫ ହସ୍ପିଟାଲସ୍ ରଅଧ୍ୟକ୍ଷ ଡ. ଆଲୋକ ରାୟ, ଟାଟା ଟ୍ରଷ୍ଟର ସିଓଓ ଡ. ହରିଶ କ୍ରିଷ୍ଣସ୍ୱାମୀ, ଜିକିଜା ହେଲଥକେୟାର ଲିମିଟେଡ଼ ର ସହ ପ୍ରତିଷ୍ଠାତା ତଥା ନିଦେ୍ର୍ଦଶକ ନରେଶ ଜୈନ୍, ଗ୍ଲୋବାଲ୍ ହେଲଥକେୟାରର ସହ ପ୍ରତିଷ୍ଠାତା ତଥା ସିଇଓ ଡ. ଅଜିମ୍ ସାବହତ୍ ଏବଂ ଏଲଭି ଆଇ ଇନଷ୍ଟିଚ୍ୟୁଟ୍ ର ଉପାଧ୍ୟକ୍ଷ ଡ. ତାରାପ୍ରସାଦ ଦାସ । ଓଡ଼ିଶା ଭିଜନ୍ ୨୦୧୫ ରୋଡମ୍ୟାପ ଉପରେ ସେମାନଙ୍କ ପ୍ରସ୍ତାବ ରଖିଥିଲେ ।

ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା, ସ୍ୱାସ୍ଥ୍ୟ ସଚିବ ଡ. ପ୍ରମୋଦ ମେହେର୍ଦ୍ଦା, ଜାତୀୟ ସ୍ୱାସ୍ଥ୍ୟ ମିଶନ୍ ନିଦେ୍ର୍ଦଶିକା ଶ୍ରୀମତୀ ଶାଳିନୀ ପଣ୍ଡିତ ପ୍ରମୁଖ ଆଲୋଚନାରେ ଭାଗ ନେଇଥିଲେ । ପୁଞ୍ଜି ପ୍ରସ୍ତାବଗୁଡ଼ିକ କାର୍ଯ୍ୟକାରୀ ହେଲା ବେଳେ ଏହାର ପରିମାଣ ଆହୁରି ବୃଦ୍ଧି ପାଇବ ବୋଲି ମନ୍ତ୍ରୀ ଶ୍ରୀ ଜେନା ଆଶା ରଖିଛନ୍ତି ।