ସମ୍ବଲପୁର: ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେପି ନେତା ଜୟନାରାୟଣ ମିଶ୍ରଙ୍କୁ ପୁଲିସ ଗିରଫ କରିଛି । ତାଙ୍କ ସହଯୋଗୀ ଶିବ ଦିୱାନ୍ ଙ୍କୁ ମଧ୍ୟ ପୁଲିସ ଗିରଫ କରିଛି । କୋର୍ଟରେ ଜାମିନ୍ ନାମଂଜୁର ହେବାରୁ ଉଭୟଙ୍କୁ ୧୪ ଦିନ ପାଇଁ ଜେଲ୍ ହାଜତକୁ ପଠାଇ ଦିଆଯାଇଛି । ଆଜି ସକାଳେ ସମ୍ବଲପୁରର ନନ୍ଦପଡ଼ାସ୍ଥିତ ବାସଭବନରୁ ଜୟନାରାୟଣ ଓ ଶିବଙ୍କୁ ପଦ୍ମପୁର ପୁଲିସ ଉଠାଇନେଇଥିଲା । ସୋହେଲାର ବନାବିରାଠାରେ ମନ୍ତ୍ରୀ ସୁଶାନ୍ତ ସିଂଙ୍କ ଭାଇ ସୁବ୍ରତଙ୍କ ଉପରକୁ ଫାୟାରିଂ ଓ ତାଙ୍କ ଡ୍ରାଇଭର ଦିଲେଶ୍ୱର ସାହୁ ହତ୍ୟା ମାମଲାରେ ପୁଲିସ ସେମାନଙ୍କୁ ଗିରଫ କରିଛି । ଏଥିସହ ଘଟଣାରେ ଗିରଫଙ୍କ ସଂଖ୍ୟା ୮କୁ ବୃଦ୍ଧି ପାଇଛି ।
ବିଜେପୁର ଉପନିର୍ବାଚନର ଦୁଇ ଦିନ ପୂର୍ବରୁ ବନାବିରାରେ ସୁବ୍ରତ ସିଂଙ୍କ ଗାଡ଼ି ଉପରକୁ ଆକ୍ରମଣ ହୋଇଥିଲା । ଏଥିରେ ସୁବ୍ରତ ଓ ଡ୍ରାଇଭର ଦିଲେଶ୍ୱର ଓରଫ୍ ମାଗିଙ୍କ ସମେତ ୪ ଜଣ ଗୁରୁତର ଆହତ ହୋଇଥିଲେ । ଚିକିତ୍ସା ପାଇଁ ସମସ୍ତଙ୍କୁ ବୁର୍ଲା ବଡ଼ ମେଡ଼ିକାଲରେ ଭର୍ତ୍ତି କରାଯାଇଥିଲା । ଦିଲେଶ୍ୱରଙ୍କ ଅବସ୍ଥା ଗୁରୁତର ହେବାରୁ ୨୩ ତାରିଖ ରାତିରେ ତାଙ୍କୁ କଟକ ବଡ଼ ମେଡ଼ିକାଲ ସ୍ଥାନାନ୍ତର କରାଯାଇଥିଲା । ତେବେ ସେଠାରେ ତାଙ୍କର ମୃତ୍ୟୁ ହୋଇଥିଲା । ଏହି ଘଟଣାରେ ସୋହେଲାର ବିମଳ ଭୋଇ ଥାନାରେ ଏତଲା ଦେଇଥିଲେ । ପୂର୍ବତନ ମନ୍ତ୍ରୀ ଜୟନାରାୟଣ ମିଶ୍ରଙ୍କ ସମେତ ବିଜେପିର ଅନ୍ୟ କିଛି ନେତାଙ୍କୁ ସେ ଆକ୍ରମଣକାରୀ ଦର୍ଶାଇଥିଲେ । ପୁଲିସ ପ୍ରଥମେ ଦୁଇଜଣଙ୍କୁ ଗିରଫ କରିଥିଲା ଓ ପରେ ଅନ୍ୟ ୪ ଜଣଙ୍କୁ ଗିରଫ କରିଥିଲା ।
ବିଜେପୁର ଉପନିର୍ବାଚନ ପରେ ପୁଲିସ ଘଟଣାର ବ୍ୟାପକ ଛାନଭିନ୍ କରିଥିଲା । ଜୟନାରାୟଣଙ୍କ ଭଳି ହେଭିୱେଟ୍ ଙ୍କ ଦେହରେ ହାତ ମାରିବାକୁ ପୁଲିସକୁ ବ୍ୟାପକ ତଦନ୍ତ ଓ ପର୍ଯ୍ୟାପ୍ତ ପ୍ରମାଣ ଯୋଗାଡ଼ କରିବାକୁ ପଡ଼ିଥିଲା । ତାଙ୍କର ସଂପୃକ୍ତି ନେଇ ଠୋସ୍ ପ୍ରମାଣ ପାଇଲା ପରେ ଆଜି ପଦ୍ମପୁର ଏସଡ଼ିପିଓ ଲକ୍ଷ୍ମୀନାରାୟଣ ପଣ୍ଡାଙ୍କ ନେତୃତ୍ୱରେ ଏକ ପୁଲିସ ଟିମ୍ ସମ୍ବଲପୁର ଯାଇ ଜୟନାରାୟଣଙ୍କୁ ତାଙ୍କ ଘରୁ ଉଠାଇ ଆଣିଥିଲେ । ଫେରାର ଥିବା ଅନ୍ୟତମ ଅଭିଯୁକ୍ତ ଶିବୁକୁ ମଧ୍ୟ ପୁଲିସ ଜୟନାରାୟଣଙ୍କ ଘରୁ ଉଠାଇଥିଲା । ଜୟନାରାୟଣଙ୍କୁ ପୁଲିସ ଗିରଫ କରୁଥିବା ଖବର ପ୍ରଚାରିତ ହୋଇଯିବାରୁ ବିଜେପି ମହିଳା ମୋର୍ଚ୍ଚା କର୍ମୀମାନେ ସେଠାକୁ ଆସି ବିରୋଧ କରିଥିଲେ । ପରିସ୍ଥିତି ଉତ୍ତେଜନା ଥିଲେ ମଧ୍ୟ ପୁଲିସ ଯୋଜନାବଦ୍ଧ ହୋଇ ଦୁହିଁଙ୍କୁ ସୋହେଲା ନେଇଆସିଥିଲା ।
ଜୟନାରାୟଣଙ୍କ ଗିରଫ ବିଜେପି ଶିବିରକୁ ନିରୁତ୍ସାହିତ କରିଦେଇଛି । ବନାବିରା ଫାୟାରିଂ ଘଟଣାରେ ଦଳର ଜିଲ୍ଲା ପରିଷଦ ପ୍ରାର୍ଥୀ ବାସୁଦେବ ନାୟକଙ୍କୁ ପୁଲିସ ପ୍ରଥମରୁ ଗିରଫ କରିଥିଲା । ଏଭଳିସ୍ଥଳେ ବିଜେପି ରାଜ୍ୟ ସଭାପତି ବସନ୍ତ ପଣ୍ଡା ଘଟଣାକୁ ବିଜେଡ଼ି ପ୍ରାୟୋଜିତ ବୋଲି ଆଜି ପୁଣି ଦୋହରାଇଛନ୍ତି । ଜୟନାରାୟଣ ନିର୍ଦୋଷ ବୋଲି ସେ ସାର୍ଟିଫିକେଟ ଦେଇଛନ୍ତି । ତେବେ ଆଇନ ତା ବାଟରେ ଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
