ଭୁୁବନେଶ୍ୱର: ପଶ୍ଚିମ ଓଡ଼ିଶାକୁ ଡେଇଁଛି କରୋନା । ଆଜି ଚିହ୍ନଟ ହୋଇଥିବା ରାଜ୍ୟର ୨୧ତମ ଆକ୍ରାନ୍ତଙ୍କ ଘର କଳାହାଣ୍ଡିରେ । ତାଙ୍କର ବୟସ ୨୯ ବର୍ଷ । ତାଙ୍କର ଫରେନ୍ ଟ୍ରାଭେଲ୍ ହିଷ୍ଟ୍ରି ଅଛି । ନିକଟରେ ସେ ବାହାରିନ୍ ରୁ ଫେରିଥିଲେ । ଆଜି ରାତିରେ ସ୍ୱାସ୍ଥ୍ୟ ବିଭାଗ ପକ୍ଷରୁ ଏହା ଟ୍ୱିଟ୍ କରାଯାଇଛି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ତାଙ୍କର କୌଣସି କରୋନା ଲକ୍ଷଣ ନ ଥିଲା । ତେଣୁ ବିନା ଲକ୍ଷଣରେ କରୋନା ଆକ୍ରାନ୍ତ ହେବାରେ ସେ ରାଜ୍ୟର ଦ୍ୱିତୀୟ ବ୍ୟକ୍ତି । ତାଙ୍କୁ କଟକର ଅଶ୍ୱିନୀ ହସ୍ପିଟାଲ୍ ରେ ଚିକିତ୍ସା କରାଯିବ ବୋଲି ସ୍ୱାସ୍ଥ୍ୟ ସଚିବ ନିକୁଞ୍ଜ ଧଳ କିଛି ଗଣମାଧ୍ୟମକୁ ସୂଚନା ଦେଇଛନ୍ତି ।
ସ୍ୱାସ୍ଥ୍ୟ ବିଭାଗର ସୂଚନା ଅନୁଯାୟୀ, ଆଜି ସମୁଦାୟ ୩୦୪ ନମୁନା ପରୀକ୍ଷା କରାଯାଇଥିଲା । ଆରଏମଆରସିରେ ୨୨୩, ଏମସ୍ ରେ ୩୮ ଏବଂ ଏସସିବି ୪୩ । ସେଥିମଧ୍ୟରୁ ଗୋଟିଏ ପଜିଟିଭ୍ ଆସିଥିବା ବେଳେ ଅନ୍ୟ ୩୦୩ ନମୁନା ନେଗେଟିଭ୍ ଆସିଛି । ଆଜିକୁ ମିଶାଇ ରାଜ୍ୟରେ ସମୁଦାୟ ୧୩୯୫ ଜଣଙ୍କର ନମୁନା ପରୀକ୍ଷା ହେଲାଣି । ସେଥିରୁ ୨୧ ପଜିଟିଭ୍ ବାହାରିଛି । ଦୁଇଜଣ ସୁସ୍ଥ ହୋଇସାରିଲେଣି ।
ଆଜି ପର୍ଯ୍ୟନ୍ତ ଭୁବନେଶ୍ୱରରୁ ସର୍ବାଧିକ ୧୪ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ କଟକରୁ ୧, ଭଦ୍ରକରୁ ୩, ପୁରୀରୁ ୧, ଯାଜପୁର ୧ ଆକ୍ରାନ୍ତ ଚିହ୍ନଟ ହୋଇଥିଲେ । ମାତ୍ର କରୋନା ଭୂତାଣୁ ଏବେ ଉପକୂଳ ଓଡ଼ିଶାରୁ ପଶ୍ଚିମ ଓଡ଼ିଶାକୁ ଡେଇଁଛି । ପଶ୍ଚିମ ଓଡ଼ିଶାର ପ୍ରଥମ ଆକ୍ରାନ୍ତ ଭାବେ କଳାହାଣ୍ଡିରୁ ଚିହ୍ନଟ ହୋଇଛନ୍ତି କରୋନା ଆକ୍ରାନ୍ତ ।
