– ଐତିହ୍ୟ ସୁରକ୍ଷା ଜୋନ୍ ରେ ୧୫ ମିଟର ରାସ୍ତା, ୬୦ ମିଟର ଅଞ୍ଚଳରେ ପୁର୍ନବିନ୍ୟାସ
– ଏମଆର ମଠ ଜମିରେ ରଘୁନନ୍ଦନ ଲାଇବ୍ରେରୀ
– ଶ୍ରୀମନ୍ଦିରର ଦେଢ଼ କିମି ଭିତରେ ବିସ୍ଥାପିତଙ୍କ ପାଇଁ ୬୦୦ ଘର
ଭୁୁବନେଶ୍ୱର: ପୁରୀକୁ ବିଶ୍ୱ ଐତିହ୍ୟସ୍ଥଳୀ ଭାବେ ଗଢ଼ି ତୋଳିବାକୁ ମୁଖ୍ୟମନ୍ତ୍ରୀ ଦେଖାଇଥିବା ସ୍ୱପ୍ନ ଏବେ ସାକାର ହେବାକୁ ଯାଉଛି । ଶ୍ରୀମନ୍ଦିର ଚତୁଃପାଶ୍ୱର୍ରୁ ଉଚ୍ଛେଦକୁ ନେଇ ଛକାପଂଝା ଲାଗିଥିବା ବେଳେ ପୁରୀକୁ ନେଇ ରାଜ୍ୟ ସରକାରଙ୍କ ବ୍ଲୁ ପ୍ରିଣ୍ଟ ସାମନାକୁ ଆସିଛି । ସେଥିରେ ଶ୍ରୀକ୍ଷେତ୍ରର ନକ୍ସା ବଦଳିଯାଇଛି । ଏହି ନକ୍ସାକୁ ଦେଖିଲେ ଆଖି ଝଲସିଯାଉଛି ।
ଏଥିସହ ଶ୍ରୀମନ୍ଦିରର ସୁରକ୍ଷା ଓ ସୌନ୍ଦର୍ଯ୍ୟକରଣ ପାଇଁ ରାଜ୍ୟ ସରକାରଙ୍କ ଯୋଜନା ଚୂଡ଼ାନ୍ତ ରୂପ ନେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏକ ଉଚ୍ଚସ୍ତରୀୟ ବୈଠକରେ ଏହାର ତନାଘନା କରିଛନ୍ତି । ପୁରୀ ଐତିହ୍ୟ ନଗରୀ ପ୍ରକଳ୍ପଗୁଡ଼ିକର ମୁଖ୍ୟମନ୍ତ୍ରୀ ସମୀକ୍ଷା କରିବା ସହ ୩ ଟି ନୂଆ ପ୍ରକଳ୍ପକୁ ଅନୁମୋଦନ କରିଛନ୍ତି । ଏହି ତିନୋଟି ପ୍ରକଳ୍ପ ହେଉଛି-(୧) ଐତିହ୍ୟ ସୁରକ୍ଷା ଜୋନ୍, (୨) ରଘୁନନ୍ଦନ ଲାଇବ୍ରେରୀ ଓ (୩) ବାସଗୃହ ପ୍ରକଳ୍ପ ।
ଐତିହ୍ୟ ସୁରକ୍ଷା ଅଞ୍ଚଳ ବା ହେରିଟେଜ୍ ସିକ୍ୟୁରିଟି ଜୋନ୍ ପ୍ରକଳ୍ପରେ ଅଞ୍ଚଳର ପବିତ୍ର ଭୌଗଳିକ ଅବସ୍ଥିତି, ବିଭିନ୍ନ ପ୍ରାଚୀନ ଦେବାଦେବୀ ମୂର୍ତ୍ତି, ଜଗନ୍ନାଥ ସଂସ୍କୃତି ସହ ସଂଶ୍ଲିଷ୍ଟ ବୃକ୍ଷଲତା, କଳା ସ୍ଥାପତ୍ୟ ଓ ଭୋଗ କ୍ଷେତ୍ରକୁ ଦୃଷ୍ଟିରେ ରଖାଯାଇଛି । ଶ୍ରୀମନ୍ଦିର ମେଘନାଦ ପାଚେରୀଠାରୁ ୭୫ ମିଟର ଅଞ୍ଚଳ ମଧ୍ୟରେ ୧୫ ମିଟରର ରାସ୍ତା କରାଯିବ । ଅବଶିଷ୍ଟ ୬୦ ମିଟର ଅଞ୍ଚଳର ପୁର୍ନବିନ୍ୟାସ କରାଯିବ । ଉକ୍ତ ପୁର୍ନବିନ୍ୟାସ କାର୍ଯ୍ୟକ୍ରମର ମନିଟରିଂ ପାଇଁ ଏକ ଏକ୍ସପର୍ଟ ପାନେଲ୍ ଗଠନ କରିବାକୁ ନିଷ୍ପତ୍ତି ନିଆଯାଇଛି ।
ସେହିଭଳି ରଘୁନନ୍ଦନ ଲାଇବ୍ରେରୀ ଓ ବାସଗୃହ ପ୍ରକଳ୍ପ ପାଇଁ ଯୋଜନା ଚୂଡ଼ାନ୍ତ ହୋଇ ମୁଖ୍ୟମନ୍ତ୍ରୀଙ୍କ ଅନୁମୋଦନ ଲାଭ କରିଛି । ଯୋଜନା ଅନୁଯାୟୀ, ଏମଆର ମଠ ଜମିର କିଛି ଅଂଶରେ ରଘୁନନ୍ଦନ ଲାଇବ୍ରେରୀ ପୁନର୍ନିମାଣ କରାଯିବ । ଏହି ଲାଇବ୍ରେରୀକୁ ଜଗନ୍ନାଥ ସଂସ୍କୃତିର ଏକ ଗବେଷଣା କେନ୍ଦ୍ର ଭାବେ ବିକଶିତ କରାଯିବ । ଏଥିପାଇଁ ୨୫ କୋଟି ଟଙ୍କା ଖର୍ଚ୍ଚ ଅଟକଳ କରାଯାଇଛି ।
ବାସଗୃହ ପ୍ରକଳ୍ପରେ ବିସ୍ଥାପିତ ପରିବାର ପାଇଁ ମନ୍ଦିରଠାରୁ ଦେଢ଼ କିଲୋମିଟର ଅଞ୍ଚଳ ମଧ୍ୟରେ ବିଭିନ୍ନ ସ୍ଥାନରେ ନିର୍ମାଣ ହେବ ୬୦୦ ଟି ଘର । ପ୍ରତି ଘରର ବିଲ୍ଟ ଅପ ଏରିଆ ୫୨୦ ବର୍ଗଫୁଟ ହେବ । ଏହି ନିର୍ମାଣ ପାଇଁ ଖର୍ଚ୍ଚ ହେବ ୯୫ କୋଟି ଟଙ୍କା । ଏହି ପ୍ରକଳ୍ପ କାର୍ଯ୍ୟ ଯଥାଶୀଘ୍ର ଆରମ୍ଭ ହୋଇଯିବ ବୋଲି ଜଣାପଡ଼ିଛି । ସୂଚନାଯୋଗ୍ୟ, ଗତ ୨ ତାରିଖରେ ମୁଖ୍ୟମନ୍ତ୍ରୀ ଘୋଷଣା କରିଥିବା ଥଇଥାନ ପ୍ୟାକେଜ୍ ରେ ବିସ୍ଥାପିତ ପରିବାର ପାଇଁ ଏହି ପ୍ରତିଶ୍ରୁତି ଦିଆଯାଇଥିଲା ।
