ମହାବିପତ୍ତିରୁ ବଞ୍ଚିଗଲା ଓଡ଼ିଶା

ଭୁବନେଶ୍ୱର: ଘଣ୍ଟା ପ୍ରତି ପ୍ରାୟ ୧୪ କିମି ବେଗରେ ଆଗକୁ ମାଡୁଥିଲା । ପାରାଦ୍ୱୀପ ଅତିକ୍ରମ କଲା ପରେ ଏହାର ବେଗ ଦୁଇଗୁଣା ବଢ଼ିଗଲା । ତେଣୁ ଜଲଦି ଜଲଦି ଓଡ଼ିଶା ଉପକୂଳ ପାର୍ କରିଗଲା ‘ଅମ୍ଫନ୍’ । ପାରାଦ୍ୱୀପଠାରୁ ୧୨୦ କିମି ଦୂରରେ ଏହା ଅତିକ୍ରମ କରିଥିବା ବେଳେ ବାଲେଶ୍ୱରଠାରୁ ୧୦୦ କିମି ଦୂରରେ ଅତିକ୍ରମ କଲା । ଅର୍ଥାତ୍ ଓଡ଼ିଶା ଉପକୂଳ ପାଖ ମାଡ଼ିଲାନି ଅମ୍ଫନ । ଫଳସ୍ୱରୂପ ମହାବାତ୍ୟାର ମହାବିପତ୍ତିରୁ ରକ୍ଷା ପାଇଗଲା ଓଡ଼ିଶା ।

‘ଅମ୍ଫନ’ ର ଭୀଷଣ ତାଣ୍ଡବରୁ ଓଡ଼ିଶା ଯେ ସମ୍ପୂର୍ଣ୍ଣ ରକ୍ଷା ପାଇଛି ତାହା ନୁହେଁ । ମାତ୍ର ଯେଭଳି ଆଶଙ୍କା କରାଯାଉଥିଲା ଭଗବାନଙ୍କ କୃପାରୁ ସେଭଳି ହୋଇନାହିଁ । ଲମ୍ବା ସମୟ ସହ ଓଡ଼ିଶା ଉପକୂଳ ପାଖ ଦେଇ ଅତିକ୍ରମ କରିଥିଲେ ଯଥେଷ୍ଟ କ୍ଷୟକ୍ଷତି ହୋଇଥାଆନ୍ତା ବୋଲି ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା କହିଛନ୍ତି ।

ତେବେ ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ ଓ ବାଲେଶ୍ୱର ଜିଲ୍ଲାର ଅନେକ ଅଞ୍ଚଳକୁ ‘ଅମ୍ଫନ’ ମୋଡ଼ି ମକଚି ଦେଇଛି । ଲୋକଙ୍କ ଧନଜୀବନ କ୍ଷତିର ସମ୍ପୂର୍ଣ୍ଣ ତଥ୍ୟ ଆସି ନ ଥିଲେ ମଧ୍ୟ ଭଦ୍ରକ ଜିଲ୍ଲା ତିହିଡ଼ି ବ୍ଲକ୍ ରେ ଜଣେ ଶିଶୁର ଜୀବନ ନେଇଛି ବାତ୍ୟା । କାଁପଡ଼ା ପଞ୍ଚାୟତ ଦକ୍ଷିଣପାରି ଗ୍ରାମର ବଳରାମ ଦାସଙ୍କ ମାଟି କାନ୍ଥ ଭୁଷୁଡ଼ି ତାଙ୍କର ୩ ବର୍ଷର ଶିଶୁପୁଅର ମୃତ୍ୟୁ ହୋଇଛି । ବାଲେଶ୍ୱର ଜିଲ୍ଲା ସୋର ଅଞ୍ଚଳରେ ଆଜବେଷ୍ଟସ୍ ଭାଙ୍ଗି ଗୋଟିଏ ପରିବାରର ୩ ଜଣ ଆହତ ହୋଇଛନ୍ତି । କେନ୍ଦ୍ରାପଡ଼ା ରାଜନଗରର କିଛି ସମୁଦ୍ରକୂଳିଆ ଗାଁରେ ଘେରି ବନ୍ଧ ଭାଙ୍ଗି ସମୁଦ୍ରପାଣି ପଶିବାରୁ ୫୦ରୁ ଉଦ୍ଧ୍ୱର୍ ପରିବାର କ୍ଷତିଗ୍ରସ୍ତ ହୋଇଛନ୍ତି । ଜଗତସିଂହପୁର ଜିଲ୍ଲାର ପାରାଦ୍ୱୀପ, ଏରସମା, କୁଜଙ୍ଗ ଓ ବାଲିକୁଦା ଅଞ୍ଚଳରେ ବହୁତ ଗଛ ଭାଙ୍ଗିବା ସହ ବିଦ୍ୟୁତ ଖୁଣ୍ଟ ଉପୁଡ଼ିପଡ଼ିଛି ।

ମୋଟାମୋଟି ସୂଚନା ଆସୁଛି ଯେ ବାତ୍ୟା ପ୍ରଭାବିତ ଜିଲ୍ଲାଗୁଡ଼ିରେ ପ୍ରବଳ ବର୍ଷା ପବନ ଯୋଗୁଁ ବ୍ୟାପକ ଗଛ ଭାଙ୍ଗିଛି । ବିଦ୍ୟୁତ ଖୁଣ୍ଟ ମଧ୍ୟ ରାସ୍ତାରେ ପଡ଼ିଛି । ଟେଲିଫୋନ୍ ଟାୱାର କ୍ଷତିଗ୍ରସ୍ତ ହୋଇଛି । ଲୋକଙ୍କ ଚାଳଛପର ଉଡ଼ିଯାଇଛି । କଚ୍ଚା ଘର ଭାଙ୍ଗିଛି । ଚାଷବାସ ନଷ୍ଟ ହୋଇଛି ।

ତେବେ ବାତ୍ୟାରେ ଯେତିକି ଛାରଖାର ହୋଇଛି ତାହା ସମ୍ଭାଳିବା ଅବସ୍ଥାରେ ଅଛି ବୋଲି କହିଛନ୍ତି ସ୍ୱତନ୍ତ୍ର ରିଲିଫ୍ କମିଶନର ଶ୍ରୀ ଜେନା । ପୂର୍ବରୁ ପ୍ରସ୍ତୁତ ରହିଥିବା ସରକାରୀ କଳ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟରେ ଲାଗିଛନ୍ତି । ରାସ୍ତାସଫା, ବିଜୁଳି ମରାମତି କାର୍ଯ୍ୟ ଦିନେ ଦୁଇଦିନ ମଧ୍ୟରେ ଠିକ୍ ହୋଇଯିବ ବୋଲି ସେ କହିଛନ୍ତି । ପ୍ରଶାସନ ପକ୍ଷରୁ ସମ୍ପୂର୍ଣ୍ଣ ପ୍ରସ୍ତୁତି ସହ ସମନ୍ୱୟ ଭିତ୍ତିରେ କାର୍ଯ୍ୟ ଚାଲୁଥିବାର ଉଦ୍ଧାର ଓ ମରାମତି କାର୍ଯ୍ୟରେ ବିଶେଷ ଅସୁବିଧା ନାହିଁ ବୋଲି କହିଛନ୍ତି ।

ଲୋକଙ୍କ ଘରଦ୍ୱାର ଓ ଚାଷବାସଠାରୁ ଆରମ୍ଭ କରି ସବୁର କ୍ଷୟକ୍ଷତି ଆକଳନ କରିବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି । ୪୮ ଘଣ୍ଟା ମଧ୍ୟରେ ପ୍ରାଥମିକ ରିପୋର୍ଟ ପ୍ରସ୍ତୁତ କରି ପଠାଇବାକୁ ଜିଲ୍ଲାପାଳମାନଙ୍କୁ କୁହାଯାଇଛି । ଜିଲ୍ଲାପାଳମାନଙ୍କ ପ୍ରାଥମିକ ରିପୋର୍ଟ ଭିତ୍ତିରେ ସରକାର ଏବେ କ୍ଷୟକ୍ଷତି ଆକଳନ କରିବେ । ପରବର୍ତ୍ତୀ ସମୟରେ ଜିଲ୍ଲାପାଳମାନେ ଚୂଡ଼ାନ୍ତ ରିପୋର୍ଟ ଦେବେ । ପ୍ରାଥମିକ କ୍ଷୟକ୍ଷତି ରିପୋର୍ଟ ଭିତ୍ତିରେ କ୍ଷତିଗ୍ରସ୍ତ ଲୋକଙ୍କୁ ସରକାରୀ ବ୍ୟବସ୍ଥା ଅନୁଯାୟୀ କ୍ଷତିପୂରଣ ଦିଆଯିବ ବୋଲି ଶ୍ରୀ ଜେନା କହିଛନ୍ତି ।