– ଝାରସୁଗଡ଼ାର ସୁଖାଶୋଡ଼ା ଓ ବରଗଡ଼ର ଚିଖଲରୁ ଆରମ୍ଭ କରିବେ ମୁଖ୍ୟମନ୍ତ୍ରୀ
– ୧୫ ଜିଲ୍ଲାରେ ସୁରକ୍ଷା ସଚେତନତା ଅଭିଯାନ
ଭୁବନେଶ୍ୱର: ଆସନ୍ତା ୧୬ ତାରିଖରୁ ଆରମ୍ଭ ହେବ ମହାନଦୀ ପାଇଁ ମହାସଂଗ୍ରାମ । ମହାନଦୀ ସୁରକ୍ଷା ପାଇଁ ଏହା ହେବ ବିଜେଡ଼ିର ଦ୍ୱିତୀୟ ପର୍ଯ୍ୟାୟ ଆନ୍ଦୋଳନ। ଏହାକୁ ‘ସୁରକ୍ଷା ସଚେତନତା ଅଭିଯାନ’ ନାଁରେ ନାମିତ କରାଯାଇଛି । ମହାନଦୀର ପ୍ରବେଶସ୍ଥଳ ଝାରସୁଗୁଡ଼ା ଓ ବରଗଡ ଜିଲ୍ଲାରୁ ଅଭିଯାନ ଆରମ୍ଭ ହୋଇ ପାରାଦ୍ୱୀପରେ ସରିବ । ମହାନଦୀ ଅବବାହିକା ୧୫ ଟି ଜିଲ୍ଲାର ୧୫୬୦ କିମି ଲମ୍ବା ଯାତ୍ରା ଅତିକ୍ରମ କରିବ । ୧୬ ତାରିଖ ସକାଳ ୯ଟାରେ ବିଜେଡ଼ି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମେ ଝାରସୁଗୁଡ଼ା ଜିଲ୍ଲା ଲଖନପୁର ବ୍ଲକ୍ ର ସୁଖାଶୋଢ଼ା ଏବଂ ସକାଳ ୧୦ଟାରେ ବରଗଡ଼ ଜିଲ୍ଲା ଆମ୍ବାଭୋନା ବ୍ଲକ୍ ର ଚିଖଲି ଠାରୁ ଏହି ଅଭିଯାନର ଶୁଭାରମ୍ଭ କରିବେ । ଆଜି ଏକ ସାମ୍ବାଦିକ ସମ୍ମିଳନୀରେ ବିଜେଡ଼ି ପକ୍ଷରୁ ଏହାର ବିସ୍ତୃତ ସୂଚନା ଦିଆଯାଇଛି ।
ଏହି ଅଭିଯାନ ଝାରସୁଗୁଡ଼ା, ବରଗଡ଼, ସମ୍ବଲପୁର, ସୁବର୍ଣ୍ଣପୁର, ବୌଦ୍ଧ, ଅନୁଗୁଳ, ଢ଼େଙ୍କାନାଳ, ନୟାଗଡ଼, କଟକ, ଖୋର୍ଦ୍ଧା, ଯାଜପୁର, କେନ୍ଦ୍ରାପଡ଼ା, ପୁରୀ, ଜଗତସିଂହପୁର ଜିଲ୍ଲା ଅତିକ୍ରମ କରିବ । ନିର୍ଦ୍ଧାରିତ ରୁଟ୍ ଚାର୍ଟରେ ପଥପ୍ରାପ୍ତ ସଭା, ସାଧାରଣ ସଭା, ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇ ତାହା ମାଧ୍ୟମରେ ଲୋକଙ୍କୁ ସଚେତନ କରାଯିବ । ମହାନଦୀ ସମସ୍ୟା ସମ୍ପର୍କିତ ସତ୍ୟ ତଥ୍ୟ ପୁସ୍ତିକା ଓ ପ୍ରଚାରପତ୍ର ସର୍ବସାଧାରଣରେ ବଣ୍ଟନ କରାଯିବ । ମହାନଦୀ ଅବବାହିକା ନିକଟସ୍ଥ ଅନ୍ୟ ଜିଲ୍ଲା ଓ ବ୍ଲକ୍ ରେ ମଧ୍ୟ ଜନସଚେତନା କାର୍ଯ୍ୟକ୍ରମ ଅନୁଷ୍ଠିତ ହେବ । ମହାନଦୀ ଅବବାହିକାର ଉଭୟ ପାଶ୍ୱର୍ରେ ଥିବା ପୁରାତନ ଦେବାଦେବୀ ପୀଠଗୁଡ଼ିକରେ ସମୂହ ଦୀପଦାନ କରାଯିବ । ଏହିକ୍ରମରେ ସମ୍ବଲପୁରର ମା’ ସମଲେଶ୍ୱରୀଙ୍କ ପୀଠରେ ଆସନ୍ତା ୧୭ ତାରିଖରେ ଜଳ ଆଳତି କରାଯିବ । କଟକର ଗଡ଼ଗଡ଼େଶ୍ୱର ପୀଠରେ ମଧ୍ୟ ଜଳଆଳତି କରାଯିବ । ଏହି ୧୫ ଦିନିଆ ମହାସଂଗ୍ରାମ ଅଭିଯାନରେ ବିଜୁ ଜନତା ଦଳ ପରିବାରର ସମସ୍ତେ ସାମିଲ ହେବେ ।
ଓଡ଼ିଶାର ହକ୍ ଓ ମହାନଦୀର ସୁରକ୍ଷା ପାଇଁ ଏହି ଜନଜାଗରଣ ମହାସଂଗ୍ରାମରେ ରାଜ୍ୟର ଛାତ୍ର, ଯୁବକ, କୃଷକ, ମତ୍ସ୍ୟଜୀବୀ, ମହିଳା, ବୁଦ୍ଧିଜୀବୀ, ସମସ୍ତ ସାମାଜିକ ସଂଗଠନ, ସବୁ ରାଜନୈତିକ ଗୋଷ୍ଠୀ ଏବଂ ସର୍ବୋପରି ଓଡ଼ିଶାର ଜନସାଧାରଣ ସାମିଲ ହେବାକୁ ବିଜେଡ଼ି ପକ୍ଷରୁ ନିବେଦନ କରାଯାଇଛି । ବିଜେଡ଼ି କାର୍ଯ୍ୟାଳୟରେ ଆୟୋଜିତ ଏହି ସାମ୍ବାଦିକ ସମ୍ମିଳନୀରେ ଦଳର ଉପସଭାପତି ଦେବୀପ୍ରସାଦ ମିଶ୍ର, ସାଧାରଣ ସମ୍ପାଦକ ସଞ୍ଜୟ କୁମାର ଦାସବର୍ମା, ଅତନୁ ସବ୍ୟସାଚୀ ନାୟକ, ମନ୍ତ୍ରୀ ତଥା କଟକ ଜିଲ୍ଲା ସଭାପତି ପ୍ରତାପ ଜେନା ଓ ରାଜ୍ୟ ସମ୍ପାଦକ ବିଜୟ ନାୟକ ଉପସ୍ଥିତ ଥିଲେ ।
