ଅନନ୍ତ, ସୌମ୍ୟଙ୍କୁ ଟିକେଟ; ଭୁବନେଶ୍ୱର ଉତ୍ତରରୁ ନବାଗତ ବାପୁ

ଭୁବନେଶ୍ୱର: ଚାପ ଆଗରେ ନଇଁଛନ୍ତି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ଭୁବନେଶ୍ୱର ମଧ୍ୟ ଆସନରୁ ପୂର୍ବତନ ମେୟର ଅନନ୍ତ ନାରାୟଣ(ବୁନୁ) ଜେନାଙ୍କୁ ମିଳିଛି ଟିକେଟ । ଇଂଜିନିୟରିଂ ଛାତ୍ର ରିଷି ହତ୍ୟା ଓ ବ୍ଲୁ ସିଡ଼ି ମାମଲାରେ ତାଙ୍କ ନାଁରେ ଲାଗିଥିବା କଳଙ୍କ ତାଙ୍କୁ ବିଧାୟକ ପ୍ରାର୍ଥୀ ହେବାରୁ ଅଟକେଇପାରିନି । ଅନନ୍ତଙ୍କୁ ବିଡ଼ିଏ ଅଧ୍ୟକ୍ଷ ଏବଂ ଦଳର ସାଧାରଣ ସମ୍ପାଦକ ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଥିଲେ ମଧ୍ୟ ଏମଏଲଏ ଟିକେଟ ପାଇଁ ଜିଦ୍ ଧରିଥିଲେ । ଟିକେଟ ନ ପାଇଲେ ସେ ବିଜେପିକୁ ପଳେଇବେ ବୋଲି ଚର୍ଚ୍ଚା ହୋଇଥିଲା । ତେବେ ତାଙ୍କ ଜିଦ୍ ଆଗରେ ହାର୍ ମାନିଛନ୍ତି ସୁପ୍ରିମୋ । (ମଧ୍ୟ)ଆସନରୁ ଦୁଇ ଥର ବିଧାୟକ ହୋଇଥିବା ସ୍ୱଚ୍ଛ ଭାବମୂର୍ତ୍ତିସମ୍ପନ୍ନ ବିଜୟ(ବାଦଲ) କୁମାର ମହାନ୍ତିଙ୍କୁ ହଜାଇ ଦେଇଛନ୍ତି ।

ସେହିଭଳି ଖଣ୍ଡପଡ଼ାରୁ ପ୍ରାର୍ଥୀ ହେବାକୁ ଜିଦ୍ ଧରିଥିବା ସୌମ୍ୟରଂଜନ ପଟ୍ଟନାୟକଙ୍କୁ ଅସୁଖୀ କରିନାହାନ୍ତି ନବୀନ । ତାଙ୍କ ହାତରେ ଥିବା ମିଡ଼ିଆ ବଳକୁ ହାତଛଡ଼ା କରିବାକୁ ଚାହିଁନାହାନ୍ତି । ସେଇ ବଳକୁ ଧରି ସୌମ୍ୟ ବିଜେଡ଼ିକୁ ଆସିଥିଲେ ଏବଂ ୬ ଘଣ୍ଟାରେ ରାଜ୍ୟସଭା ଆସନ ହାତେଇ ନେଇଥିଲେ । ଖଣ୍ଡପଡ଼ାରେ ବିଧାୟକ ଅନୁଭବ ପଟ୍ଟନାୟକଙ୍କୁ ବିରୋଧ କରିବାକୁ ଯାଇ ସେ ଦଳରେ ବିଭ୍ରାଟ ସୃଷ୍ଟି କରିବା ସହ ସମାନ୍ତରାଳ ସଂଗଠନ ଚଳାଇଥିଲେ ମଧ୍ୟ ନବୀନ ତାଙ୍କୁ ପୁରସ୍କୃତ କରିଛନ୍ତି ।

ଭୁବନେଶ୍ୱର ଉତ୍ତରରୁ ପ୍ରାର୍ଥୀ ହୋଇଛନ୍ତି ନବାଗତ ସୁଶାନ୍ତ(ବାପୁ) କୁମାର ରାଉତ । ଯୁବ ବିଜେଡ଼ିର ଜଣେ ସକ୍ରିୟ କାର୍ଯ୍ୟକର୍ତ୍ତା ଓ ଉତ୍ତମ ସଂଗଠକ ଭାବେ ତାଙ୍କର ସୁନାମ ଅଛି । ଜଣାଶୁଣା ବ୍ୟବସାୟୀ ତଥା ଯାତ୍ରା ପାର୍ଟି ମାଲିକ ଶିବ ଲେଙ୍କାଙ୍କର ସେ ଜ୍ୱାଇଁ । ପ୍ରିୟଦର୍ଶୀ ମିଶ୍ରଙ୍କ ସ୍ଥାନରେ ଦଳ ତାଙ୍କୁ ଟିକେଟ ଦେଇଛି । ପ୍ରିୟଦର୍ଶୀ ମିଶ୍ରଙ୍କ ବିରୋଧରେ ଅଞ୍ଚଳରେ ପ୍ରବଳ ଅସନ୍ତୋଷ ଥିବାରୁ ସେ ବଦଳିବେ ବୋଲି ପୂର୍ବରୁ ଜଣାପଡୁଥିଲା ।

ଯାଜପୁର ବିଧାୟକ ପ୍ରଣବ ପ୍ରକାଶ(ବବି) ଦାସ ଏଥର ଲଢ଼ିବେନି ବୋଲି ଚର୍ଚ୍ଚା ହେଉଥିଲା । ମାତ୍ର ଯାଜପୁରରୁ ସେ ପୁନର୍ବାର ପ୍ରାର୍ଥୀ ହୋଇଛନ୍ତି । ପାଲଲହଡ଼ା ବିଧାୟକ ମହେଶ ସାହୁ ଢ଼େଙ୍କାନାଳ ଲୋକସଭା ଆସନର ପ୍ରାର୍ଥୀ ହୋଇଥିବା ବେଳେ ତାଙ୍କ ଜାଗା ନେଇଛନ୍ତି ନବାଗତ ମୁକେଶ ପାଲ । କୋରେଇରେ ଆକାଶ ଦାସ ନାୟକଙ୍କୁ ଟିକେଟ ମିଳିନି । ସେଠାରୁ ଅଶୋକ ବଳ ପ୍ରାର୍ଥୀ ହୋଇଛନ୍ତି । ଆଠମଲ୍ଲିକରୁ ବିଧାୟକ ସଞ୍ଜୀବ ସାହୁଙ୍କ ଟିକେଟ କଟିଛି । ସରକାରୀ ଚାକିରି ଛାଡ଼ି ବିଜେଡ଼ିରେ ଯୋଗଦେଇଥିବା ରମେଶ ସାଏ ସେଠାରୁ ହୋଇଛନ୍ତି ପ୍ରାର୍ଥୀ ।

କେନ୍ଦୁଝର ଲୋକସଭା ଆସନରୁ ନବାଗତା ଚନ୍ଦ୍ରାଣୀ ମୁର୍ମୁଙ୍କୁ ପ୍ରାର୍ଥୀ କରାଯାଇଛି । ପୂର୍ବତନ ସାଂସଦ ହରିହର ସୋରେନ୍ ଙ୍କର ସେ ନାତୁଣୀ । ଗତକାଲି ନବୀନ ନିବାସ ଆସି ସେ ବିଜେଡ଼ିରେ ଯୋଗଦେଇଥିଲେ ।

ଏହିଭଳି ଭାବେ ଆଜି ବିଜେଡ଼ି ସୁପ୍ରିମୋ ଦୁଇଟି ଲୋକସଭା ଏବଂ ୭ ଟି ବିଧାନସଭା ଆସନର ପ୍ରାର୍ଥୀ ଘୋଷଣା କରିଛନ୍ତି । ଆଉ ତିନୋଟି ବିଧାନସଭା ଆସନର ପ୍ରାର୍ଥୀଙ୍କ ନାଁ ଘୋଷଣା ବାକି ଅଛି ।

ବିଜେଡ଼ି ପ୍ରାର୍ଥୀ ତାଲିକା

ଲୋକସଭା ପ୍ରାର୍ଥୀ
ଢ଼େଙ୍କାନାଳ- ମହେଶ ସାହୁ
କେନ୍ଦୁଝର- ଚନ୍ଦ୍ରାଣୀ ମୁର୍ମୁ
ବିଧାନସଭା ପ୍ରାର୍ଥୀ
ଭୁବନେଶ୍ୱର ମଧ୍ୟ- ଅନନ୍ତ ନାରାୟଣ ଜେନା
ଭୁବନେଶ୍ୱର ଉତ୍ତର- ସୁଶାନ୍ତ କୁମାର ରାଉତ
ଖଣ୍ଡପଡ଼ା- ସୌମ୍ୟରଂଜନ ପଟ୍ଟନାୟକ
ଯାଜପୁର- ପ୍ରଣବ ପ୍ରକାଶ ଦାସ
ପାଲଲହଡ଼ା- ମୁକେଶ ପାଲ
କୋରେଇ- ଅଶୋକ ବଳ
ଆଠମଲ୍ଲିକ- ରମେଶ ସାଏ