ଭୁବନେଶ୍ୱର ଜିଲ୍ଲା ବିଜେପି ସଭାପତିଙ୍କୁ ଆକ୍ରମଣ
ଭୁବନେଶ୍ୱର: ଭୁବନେଶ୍ୱର ଜିଲ୍ଲା ବିଜେପି ସଭାପତି ହରେକୃଷ୍ଣ ଖୁଣ୍ଟିଆଙ୍କ ଉପରେ ଆଜି ମରଣାନ୍ତକ ଆକ୍ରମଣ ହୋଇଛି । ହରେକୃଷ୍ଣ ନିଜ ଅଫିସରେ ଥିବା ବେଳେ କଳାପଟି ପିନ୍ଧା ଦଳେ ଯୁବକ ଅଫିସରେ ପଶି ତାଙ୍କୁ ନିର୍ଧୂମ ପିଟିଛନ୍ତି । ଅଫିସ ଝରକା, କବାଟ, ଆସବାବପତ୍ର ଭଙ୍ଗାରୁଜା କରିଛନ୍ତି । ଆକ୍ରମଣକାରୀ ଯୁବକ ଆଉ କେହି ନୁହଁନ୍ତି, ତାଙ୍କ ଦଳର ସାଂସଦ ଅପରାଜିତା ଷଡ଼ଙ୍ଗୀଙ୍କର ପ୍ରତିନିଧି ବୋଲି ନିଜେ ହରେକୃଷ୍ଣ ଅଭିଯୋଗ କରିଛନ୍ତି । ଅପରାଜିତାଙ୍କ ଇଙ୍ଗିତରେ ଏହି ଆକ୍ରମଣ ହୋଇଥିବା ସେ ସିଧାସଳଖ କହିଛନ୍ତି ।
ୟୁନିଟ୍-୩ସ୍ଥିତ ଏକାମ୍ର ହାଟ ନିକଟରେ ଥିବା ଫ୍ରେଣ୍ଡସ୍ ଆସୋସିଏଟ୍ ଚାରିଟେବୁଲ୍ ଟ୍ରଷ୍ଟ ଅଫିସରେ ହରେକୃଷ୍ଣ ଥିଲେ । ଅପରାହ୍ନରେ ୬/୭ ଜଣ ଯୁବକ ଅଫିସ ଭିତରକୁ ମାଡ଼ି ଆସି ସିଧା ହରେକୃଷ୍ଣଙ୍କ ଚାମ୍ବରରେ ପଶିଥିଲେ । ସମସ୍ତେ ମୁହଁରେ କଳାପଟି(ମୁଖା) ବାନ୍ଧିଥିଲେ । କେହି କିଛି ବୁଝିବା ପୂର୍ବରୁ ସେମାନେ ହରେକୃଷ୍ଣଙ୍କ ସାର୍ଟ କଲର ଘୋଷାଡ଼ି ବିଧା, ଗୋଇଠା, ମୁଥ ମାରିବା ଆରମ୍ଭ କରିଦେଇଥିଲେ । ଅଫିସ୍ ରେ ଥିବା କର୍ମଚାରୀମାନେ ସେମାନଙ୍କୁ ପ୍ରତିରୋଧ କରିବାକୁ ଉଦ୍ୟମ କରିବାକୁ ସେମାନଙ୍କୁ ବି ପିଟିବାକୁ ଗୋଡ଼େଇଥିଲେ । ଅଫିସରେ ଥିବା ଆସବାବପତ୍ର ଫିଙ୍ଗାଫୋପଡ଼ା କରି ଭାଙ୍ଗିଥିଲେ । କିଛି ସମୟ ଧରି ଏଭଳି ଉତ୍ପାତ କରିବା ପରେ ଘଟଣାସ୍ଥଳରୁ ଚମ୍ପଟ୍ ମାରିଥିଲେ ।
ଆହତ ହରେକୃଷ୍ଣ ଖୁଣ୍ଟିଆଙ୍କୁ ଚିକିତ୍ସା ପାଇଁ କ୍ୟାପିଟାଲ୍ ହସ୍ପିଟାଲ୍ ରେ ଭର୍ତ୍ତି କରାଯାଇଛି । ଆକ୍ରମଣକାରୀମାନେ ତାଙ୍କର ଅଜଣା ନୁହଁନ୍ତି । ସାଂସଦ ଅପରାଜିତା ଷଡ଼ଙ୍ଗୀଙ୍କର ଉତ୍ତର ନିର୍ବାଚନମଣ୍ଡଳୀରୁ ପ୍ରତିନିଧି ଥିବା ଦେବାଶିଷ ନାୟକ(ବାପି) ଏବଂ ତାଙ୍କ ଟୋକା ଆକ୍ରମଣ କରିଥିବା ହରେକୃଷ୍ଣ ଗଣମାଧ୍ୟମ ଆଗରେ ଖୁଲାସା କରିଛନ୍ତି । ଅପରାଜିତାଙ୍କ ଇଙ୍ଗିତରେ ହିଁ ଏହି ଆକ୍ରମଣ ହୋଇଥିବା ସେ ଖୋଲାଖୋଲି ଭାବେ ଅଭିଯୋଗ କରିଛନ୍ତି ।
ଅନ୍ୟପକ୍ଷରେ ହରେକୃଷ୍ଣଙ୍କ ଅଭିଯୋଗକୁ ଅସ୍ୱୀକାର କରିଛନ୍ତି ଦେବାଶିଷ ଓରଫ୍ ବାପି । ଆକ୍ରମଣ ପଛରେ ତାଙ୍କର ହାତ ନାହିଁ ବୋଲି ସେ କହିଛନ୍ତି । ତେବେ ଏହା ଉପରେ ସାଂସଦଙ୍କର ପ୍ରତିକ୍ରିୟା ଏ ଯାଏଁ ମିଳିନାହିଁ ।
ସୂଚନାଯୋଗ୍ୟ, ଅପରାଜିତା ବିଜେପିରେ ଯୋଗଦେବା ପରଠାରୁ ଭୁବନେଶ୍ୱର ସଂଗଠନ ସହ ତାଙ୍କର ପଡୁନାହିଁ । ହରେକୃଷ୍ଣ ଖୁଣ୍ଟିଆଙ୍କ ନେତୃତ୍ୱରେ ଥିବା ଜିଲ୍ଲା ସଂଗଠନକୁ ସେ ତୁଚ୍ଛ ମନେ କରୁଥିବା ଅଭିଯୋଗ ହୋଇଛି । ଅପରାଜିତା ସାଂସଦ ହେଲା ପରେ ନିଜର କିଛି ସମର୍ଥକଙ୍କୁ ଧରି ଏକ ସମାନ୍ତରାଳ ଜିଲ୍ଲା ସଂଗଠନ ଚଳାଉଥିବା ପୂର୍ବରୁ ଅଭିଯୋଗ ରହିଥିଲା । ହରେକୃଷ୍ଣ ଏବଂ ତାଙ୍କର ସହଯୋଗୀ କର୍ମକର୍ତ୍ତାମାନେ ନିକଟରେ ଏ ନେଇ ରାଜ୍ୟ ସଂଗଠନ ମନ୍ତ୍ରୀ ମାନସ ମହାନ୍ତିଙ୍କ ପାଖରେ ଫେରାଦ ହୋଇଥିଲେ ।
ଅପରାଜିତାଙ୍କୁ ଅହଂକାରୀ ଦର୍ଶାଇ ସେମାନେ ସାଂଘାତିକ ଆରୋପ ଆଣିଥିଲେ । ଏକ ଚିଠିରେ ଦର୍ଶାଇଥିଲେ ଯେ ଅପରାଜିତା ଷଡ଼ଙ୍ଗୀ ବିଜେପିର ନୀତି ଆଦର୍ଶକୁ ଅବମାନନା କରି ଦଳକୁ ଅଡୁଆରେ ପକାଉଛନ୍ତି । ଦଳରେ ଅପରାଧୀଙ୍କୁ ପ୍ରଶୟ ଦେବା ସହ ସେମାନଙ୍କୁ ସାଙ୍ଗରେ ନେଇ ‘ଟିମ୍ ଅପରାଜିତା’ ସଂଗଠନ ଗଢ଼ିଛନ୍ତି । ନିଜ ଅଫିସ୍ କର୍ମଚାରୀଙ୍କ ଦ୍ୱାରା ସେହି ଟିମ୍ କୁ ପରିଚାଳନା କରୁଛନ୍ତି । ଦଳୀୟ କାର୍ଯ୍ୟକର୍ତ୍ତାଙ୍କୁ ସେ କିରାଣୀ ଭଳି ବ୍ୟବହାର କରୁଛନ୍ତି । ବରିଷ୍ଠ ନେତାଙ୍କୁ ହେୟଜ୍ଞାନ କରୁଛନ୍ତି ।
ସ୍ମରଣଯୋଗ୍ୟ, ବିଜେପିର ଏହି ଅନ୍ତଃକନ୍ଦଳର ପରିଣାମ ପୂର୍ବରୁ ଦେଖିବାକୁ ମିଳିଥିଲା । ଅପରାଜିତା ଓ ହରେକୃଷ୍ଣ ଗୋଷ୍ଠୀଙ୍କ ମଧ୍ୟରେ ପୂର୍ବରୁ ମଧ୍ୟ ଦୁଇ ଥର ହାତାହାତି ହୋଇ ଥାନାକୁ ମାମଲା ଯାଇଥିଲା ।
