ଭୁବନେଶ୍ୱର: ଆଜି ଥିଲା ବିଶ୍ୱ ଅଣ୍ଡା ଦିବସ । ଏହି ଅବସରରେ ଉତ୍ତମ ସ୍ୱାସ୍ଥ୍ୟ ପାଇଁ ଅଣ୍ଡାର ଉପକାରିତା ସମ୍ପର୍କରେ ସଚେତନାର ବାର୍ତ୍ତା ଦେଇଛନ୍ତି ବିଭାଗୀୟ ମନ୍ତ୍ରୀ ଡ. ଅରୁଣ କୁମାର ସାହୁ । ମନ୍ତ୍ରୀ କହିଛନ୍ତି, ଅଣ୍ଡାରେ ଯଥେଷ୍ଟ ପରିମାଣରେ ଖାଦ୍ୟସାର ଥିବାରୁ ସୁସ୍ଥ ଶରୀର ନିମନ୍ତେ ଏହା ଅପରିହାର୍ଯ୍ୟ । ତେଣୁ ଶରୀର ପାଇଁ ଅଣ୍ଡା ଅତ୍ୟନ୍ତ ଉପାଦେୟ ଖାଦ୍ୟ । ଆମ ଖାଦ୍ୟରେ ଅଣ୍ଡାକୁ ସାମିଲ କରିବା ଓ ଅଣ୍ଡାଚାଷ ପ୍ରତି ଲୋକଙ୍କ ମଧ୍ୟରେ ଆଗ୍ରହ ସୃଷ୍ଟି କରିବା ଦିଗରେ ବ୍ୟାପକ ଜନସଚେତନତା କାର୍ଯ୍ୟକ୍ରମ ଗ୍ରହଣ କରିବାର ଆବଶ୍ୟକତା ରହିଛି ।
୨୦୧୫ ମସିହାରେ ରାଜ୍ୟ ସରକାର ପ୍ରଣୟନ କରିଥିଲେ ଓଡ଼ିଶା କୁକୁଟ୍ଟ ନୀତି । ରାଜ୍ୟରେ ଅଣ୍ଡା ଉତ୍ପାଦନ ବଢ଼ାଇବା ଲକ୍ଷ୍ୟରେ ସରକାର ନେଇଥିବା ଏହି ପଦକ୍ଷେପର ସୁଫଳ ମିଳିଛି । ୨୦୧୪-୧୫ ମସିହାରେ ରାଜ୍ୟରେ ଦୈନିକ ୫୨ ଲକ୍ଷ ଅଣ୍ଡା ଉତ୍ପାଦନ ହେଉଥିବା ବେଳେ ଏବେ ତାହା ୬୫ ଲକ୍ଷରେ ପହଞ୍ଚିଛି । କୁକୁଡ଼ା ଚାଷୀଙ୍କୁ ଅଧିକରୁ ଅଧିକ ପ୍ରୋତ୍ସାହନ ଦେବା ପାଇଁ ରାଜ୍ୟ ସରକାରଙ୍କ ଉଦ୍ୟମ ଜାରି ରଖିଛନ୍ତି ବୋଲି ବିଭାଗୀୟ ମନ୍ତ୍ରୀ ଡ. ସାହୁ କହିଛନ୍ତି ।
ସେ କହିଛନ୍ତି, ମୁଖ୍ୟମନ୍ତ୍ରୀ କୃଷି ଉଦ୍ୟାନ ଯୋଜନା ମାଧ୍ୟମରେ କୁକୁଡ଼ା ଚାଷୀଙ୍କୁ ଆକର୍ଷଣୀୟ ରିହାତି ଯୋଗାଇ ଦିଆଯାଉଛି । ନିକଟରେ ଫନି ଦ୍ୱାରା କ୍ଷତିଗ୍ରସ୍ତ କୁକୁଡ଼ା ଫାର୍ମଗୁଡ଼ିକର ପୁନଃପ୍ରତିଷ୍ଠା ପାଇଁ ସରକାର ସହାୟତା ଦେଉଛନ୍ତି । ୪ ହଜାରରୁ କମ୍ ସଂଖ୍ୟକ କୁୁଡ଼ା ପାଳନ କରୁଥିବା ପୁରୀ ଜିଲ୍ଲାର ୧୦୩୬ ଜଣ କୁକୁଡ଼ା ଚାଷୀଙ୍କୁ ପ୍ରଥମ ଦଫାରେ ଫାର୍ମ ପିଛା ୩୦ ହଜାର ଟଙ୍କା ସହାୟତା ଦିଆଯାଇଛି ।
‘ବିଶ୍ୱ ଅଣ୍ଡା ଦିବସ-୨୦୧୯’ ପାଳନ ଅବସରରେ ଭୁବନେଶ୍ୱରଠାରେ ପ୍ରାୟ ୫ ହଜାର ଅଣ୍ଡା ଚାଷୀ ଏକତ୍ରିତ ହୋଇଥିଲେ । ଓଡ଼ିଶା ପୋଲଟ୍ରି ଫାର୍ମର୍ସ ଆସୋସିଏସନ୍ ଓ ଅଲ୍ ଓଡ଼ିଶା ଲେୟର୍ ଫାର୍ମର୍ସ ଆସୋସିଏସନ୍ ଏହାର ଆୟୋଜନ କରିଥିଲେ । ଏମାନଙ୍କ ସହଯୋଗରେ ରାଜ୍ୟ ସରକାରଙ୍କ ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ବିଭାଗ ପକ୍ଷରୁ ସ୍ଥାନୀୟ ଓୟୁଏଟି ପରିସରସ୍ଥିତ ଭେଟେନାରି କଲେଜ ପଡ଼ିଆଠାରେ ଏକ ଉତ୍ସବ ଓ କର୍ମଶାଳା ଆୟୋଜିତ ହୋଇଥିଲା । ମୁଖ୍ୟ ଅତିଥି ମନ୍ତ୍ରୀ ଡ. ଅରୁଣ କୁମାର ସାହୁ ତାଙ୍କର ଏହି ଭାଷଣ ରଖିଥିଲେ ।
ରାଜ୍ୟ ସରକାରଙ୍କ ମିଡ଼ିଆ ଉପଦେଷ୍ଟା ତଥା ଅଲ୍ ଓଡ଼ିଶା ଲେୟର୍ ଫାର୍ମର୍ସ ଆସୋସିଏସନ୍ ର ଅଧ୍ୟକ୍ଷ ମାନସ ରଞ୍ଜନ ମଙ୍ଗରାଜ ଏଥିରେ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । ଅଣ୍ଡା ଉତ୍ପାଦନ ବୃଦ୍ଧି ଏବଂ ଅଧିକ କୁକୁଡ଼ା ଫାର୍ମ ପ୍ରତିଷ୍ଠା ଦିଗରେ ରହିଥିବା ସମସ୍ୟାଗୁଡ଼ିକ ସମ୍ପର୍କରେ ସେ ଆଲୋକପାତ କରିଥିଲେ ।
