କଠୋର ହେଲେ ନବୀନ

• ବିଜେଡ଼ି ପ୍ରତିଷ୍ଠା ଦିବସରେ କେନ୍ଦ୍ରୀୟ ଅବହେଳା ହେଲା ପ୍ରସଙ୍ଗ

• ମୁଖ୍ୟମନ୍ତ୍ରୀ ପଚାରିଲେ ୯ ଟି ପ୍ରଶ୍ନ, କହିଲେ ‘ଜବାବ ମାଗୁଛି ଓଡ଼ିଶା’

•  ‘ଆର୍ଥିକ ସ୍ୱତନ୍ତ୍ରତା ଦିଅ, ସହାୟତା ଦରକାର ନାହିଁ’

ଭୁବନେଶ୍ୱର: ବିଜେଡ଼ି ପ୍ରତିଷ୍ଠା ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ସରକାରଙ୍କ ବିରୋଧରେ କଠୋର ଆଭିମୁଖ୍ୟ ଦେଖାଇଛନ୍ତି । ଓଡ଼ିଶା ପ୍ରତି କେନ୍ଦ୍ର ସରକାରଙ୍କ ଅବହେଳାର ନମୁନାକୁ ସେ ୯ଟି କାହାଣୀରେ ସଜେଇ କେନ୍ଦ୍ର ସରକାରଙ୍କ ଉପରକୁ ପ୍ରଶ୍ନ ଛାଡ଼ିଛନ୍ତି । କହିଛନ୍ତି, ଏସବୁର ଜବାବ ମାଗୁଛି ଓଡ଼ିଶା । କେନ୍ଦ୍ର ସରକାର ଜବାବ ଦିଅନ୍ତୁ । ଏଥିସହ ଓଡ଼ିଶାକୁ ନିଜ ଗୋଡ଼ରେ ଛିଡ଼ା କରାଇବାର ଚାଲେଂଜ ନେଇଛନ୍ତି ମୁଖ୍ୟମନ୍ତ୍ରୀ । ସେଥିପାଇଁ ଆର୍ଥିକ ସ୍ୱତନ୍ତ୍ରତାର ଦାବି ଉଠାଇଛନ୍ତି । ଏହାହେଲେ ଆମକୁ ରାଜ୍ୟ ପାହ୍ୟା କି କେନ୍ଦ୍ରୀୟ ସହାୟତା ଦରକାର ନାହିଁ ବୋଲି ମୁଖ୍ୟମନ୍ତ୍ରୀ ରୋକଠୋକ ଶୁଣାଇଛନ୍ତି ।

ଆଜି ବିଜେଡ଼ିର ୨୧ତମ ପ୍ରତିଷ୍ଠା ଦିବସରେ ଭୁବନେଶ୍ୱର ଦଳୀୟ କାର୍ଯ୍ୟାଳୟରେ ଆୟୋଜିତ ହୋଇଥିଲା ମୁଖ୍ୟ ଉତ୍ସବ । ଏଥିରେ ଭାଷଣ ଦେଇ ଦଳର ମୁଖ୍ୟ ତଥା ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଆରମ୍ଭରୁ ହିଁ କେନ୍ଦ୍ରୀୟ ଅବହେଳା ବିରୋଧରେ ଆକ୍ରମଣାତ୍ମକ ହୋଇଥିଲେ । ପ୍ରଥମେ ସମସ୍ତଙ୍କୁ ଶୁଭେଚ୍ଛା ଜଣାଇବା ପରେ ସିଧା ସିଧା ପ୍ରସଙ୍ଗକୁ ଆସିଯାଇଥିଲେ । କହିଥିଲେ, ‘ଆଞ୍ଚଳିକ ଦଳମାନଙ୍କ ପ୍ରତି ଆଜି ସାରା ଦେଶରେ ଲୋକଙ୍କ ସମର୍ଥନ ବଢ଼ୁଛି । କାରଣ କ’ଣ ଜାଣିଛନ୍ତି? ମୁଁ ଆଜି ଆପଣମାନଙ୍କୁ ଭାରତ ସରକାରଙ୍କ ୯ଟି ସଫଳ କାହାଣୀ କହିବି.. ।’ ସେଇଠୁ ମୁଖ୍ୟମନ୍ତ୍ରୀ ଗୋଟି ଗୋଟି କରି ୯ଟି ଉପଲବ୍ଧି ରଖିଥିଲେ । ତାହା ଏମିତି..

୧.ଜାତୀୟ ରାଜପଥ: ଆପଣ ରାଉରକେଲାରୁ କଟକ ଆସୁଛନ୍ତି । ସମ୍ବଲପୁର ପର୍ଯ୍ୟନ୍ତ କିଛି ସମସ୍ୟା ନାହିଁ । ସମ୍ବଲପୁର ପରେ ଆପଣ ଆଖି ବନ୍ଦ କରି ମଧ୍ୟ ଜାଣିପାରିବେ । ବୋର୍ଡ ଦେଖିବା ଦରକାର ନାହିଁ । ଜାତୀୟ ରାଜପଥ । ଭଗବାନ ଭରସା । ବାରିପଦାରୁ ଦେବଗଡ଼ । ସେଇ ଅବସ୍ଥା । ଉପକୂଳ ରାଜପଥ ପାଇଁ ଆମେ ଅପେକ୍ଷା କରିଛୁ । ସାଢ଼େ ଚାରି ବର୍ଷ ହୋଇଗଲା ।

୨.ଟେଲିକମ୍: ବିଏସଏନଏଲ୍ ଭାରତ ସରକାରଙ୍କର ବହୁତ ବଡ଼ ନେଟୱାର୍କ । ଆଜିକାଲି ସମସ୍ତଙ୍କ ହାତରେ ମୋବାଇଲ୍ ଫୋନ୍ । ବହୁତ ଭଲ କଥା । କିନ୍ତୁ ଓଡ଼ିଶାର ଅଧା ଗାଁରେ ନେଟୱାର୍କ ମିଳୁନି । ଗଛ ଚଢ଼ିଲେ ଯାଇ ମୋବାଇଲ୍ ରେ କଥା ହେବେ । ବଡ଼କୋଠା ଉପରକୁ ଗଲେ ଯାଇ ମୋବାଇଲ୍ ଲାଗିବ । ମୋବାଇଲ୍ ଧରିବା ପାଇଁ ଗଛ ଚଢ଼ା ଶିଖିବାକୁ ପଡ଼ିବ । ଆଉ ସହରମାନଙ୍କରେ ନେଟୱାର୍କ ସବୁବେଳେ ବ୍ୟସ୍ତ ।

୩.ରେଳବାଇ:ରେଳକ୍ଷେତ୍ରରେ ଉନ୍ନତି ଆସିଛି । କିନ୍ତୁ କେବଳ ଟ୍ରେନ ଟିକେଟ ଏବଂ ପ୍ଲାଟଫର୍ମ ଟିକଟର ଦରରେ । ଖୋର୍ଦ୍ଧା-ବଲାଙ୍ଗୀର ରେଳ ଲାଇନ୍ ବହୁତ ଗୁରୁତ୍ୱପୂର୍ଣ୍ଣ । ରାଜ୍ୟ ସରକାର ପ୍ରକଳ୍ପର ଅଧା ଦେଲେ । ମାଗଣାରେ ଜମି ଦେଲେ । ତଥାପତି କାମ ଆଗକୁ ବଢ଼ୁ ନାହିଁ । ଭାବୁଛି ଖୋର୍ଦ୍ଧା ବଲାଙ୍ଗୀର ରେଳ ଲାଇନ୍ ପିଲାଙ୍କ ପଢ଼ିବା ପାଇଁ କେବଳ ଇତିହାସ ବହିରେ ରହିଯିବ ।

୪.ବ୍ୟାଙ୍କ ସେବା: ନୋଟ୍ ବନ୍ଦୀ ହେଲା । ଲୋକଙ୍କୁ ବ୍ୟାଙ୍କ୍ ଯିବାକୁ କୁହାଗଲା । ବ୍ୟାଙ୍କ ଆଗରେ ଲମ୍ବା ଧାଡ଼ି ଲାଗିଲା । ଲୋକ ହଇରାଣ ହେଲେ । ସମସ୍ତେ ଏହା ଅନୁଭବ କରିଛନ୍ତି । ଓଡ଼ିଶାର ଅଧା ଗାଁରେ ବ୍ୟାଙ୍କ ନାହିଁ । ବହୁତ ସଭା, ବହୁତ ଆଲୋଚନା ହେଉଛି । କିନ୍ତୁ ଲୋକଙ୍କୁ ବ୍ୟାଙ୍କ ସେବା ମିଳିଲାନି ।

୫.କୋଇଲା: କୋଇଲା ନିଲାମ ହେବ । ଓଡ଼ିଶା ୭୦ ହଜାର କୋଟି ଟଙ୍କା ପାଇବ । ଓଡ଼ିଶାବାସୀଙ୍କ ଦୁଃଖ ରହିବ ନାହିଁ । ଏମିତି ବହୁତ ପ୍ରଚାର ହେଲା । କିନ୍ତୁ ୩ ବର୍ଷରେ ଓଡ଼ିଶାକୁ ମିଳିଲା ମାତ୍ର ୩୭୦ କୋଟି ଟଙ୍କା ।

୬.ଶସ୍ୟବୀମା: ଚାଷୀଙ୍କ ଶସ୍ୟବୀମା କଥା । ଚାଷୀ ଠିକ୍ ସମୟରେ କ୍ଷତିପୂରଣ ପାଇଲାନି । ଉଚିତ ପରିମାଣରେ ମଧ୍ୟ ପାଇଲାନି । ହଁ, ଲାଭ ହେଲା । କିନ୍ତୁର ଚାଷୀର ନୁହେଁ । ଘରୋଇ କମ୍ପାନୀ ଲାଭ ପାଇଲା ।

୭.ନିର୍ବାଚନ ଇସ୍ତାହାର: ସ୍ୱତନ୍ତ୍ର ରାଜ୍ୟ ପାହ୍ୟା, ଦେଢ଼ଗୁଣା ଏମଏସପି ଓ ମହିଳାଙ୍କ ପାଇଁ ୩୩% ସଂରକ୍ଷଣ । କିଛି ହେଲା ନାହିଁ । ସାଢ଼େ ଚାରି ବର୍ଷ ସେମିତି ଗଲା ।

୮. ଅନୁସୂଚୀତ ଜାତି/ଜନଜାତି: ଜନଜାତି ଅଞ୍ଚଳର ବିକାଶ ପାଇଁ ଟଙ୍କା ବନ୍ଦ କରିଦେଲେ । ତା’ପରେ ଦୃଷ୍ଟି ପଡ଼ିଲା ଗରିବ ଏସସି.ଏସଟି ପିଲାଙ୍କ ବୃତ୍ତି ଟଙ୍କା ଉପରେ । ଦୁଇବର୍ଷ ହେଲା ତାକୁ ମଧ୍ୟ ବନ୍ଦ କରିଦେଇଛନ୍ତି ।

୯. ଉଜ୍ଜଳା: ଉଜ୍ଜଳା ଯୋଜନା । ବହୁତ ପ୍ରଚାର । ରାସ୍ତାଘାଟ, କୋଠାବାଡ଼ି ସବୁଆଡ଼େ ବଡ଼ ବଡ଼ ହୋର୍ଡିଂ । ମା ମାନଙ୍କ ଦୁଃଖ ଗଲା । ୩୦ ଲକ୍ଷ ମହିଳାଙ୍କୁ ଗ୍ୟାସ୍ ସଂଯୋଗ ଦିଆଗଲା ବୋଲି ଦାବି କରାଗଲା । କିନ୍ତୁ ରିଫିଲ୍ କେତେ ଜଣ କଲେ? ଏଲପିଜି ଦର ବର୍ତ୍ତମାନ କୋଉଠି?

ମୁଖ୍ୟମନ୍ତ୍ରୀ କହିଥିଲେ, ଏ ହେଲା ଆମ ଭାରତ ସରକାରଙ୍କ ସଫଳତା । ଏହା ସମସ୍ତେ ଜାଣିବା ଦରକାର । ୨୦୧୫ ରୁ ଏ ପର୍ଯ୍ୟନ୍ତ କୋଲ୍ ରୟାଲିଟି ସଂଶୋଧନ ହେଲା ନାହିଁ । ୫ ମିନିଟ୍ ରେ ନିଷ୍ପତ୍ତି ହୋଇପାରିବ । କିନ୍ତୁ ହେଉ ନାହିଁ । ଏଥିଯୋଗୁଁ ଓଡ଼ିଶାବାସୀ ହଜାର ହଜାର କୋଟି ଟଙ୍କା ହରାଇଲେ । କ୍ଲିନ୍ ଏନର୍ଜି ସେସ୍ ରୁ ଭାରତ ସରକାର ୨୧ ହଜାର କୋଟି ଟଙ୍କା ପାଇଲେ । ହେଲେ ଓଡ଼ିଶାବାସୀ ପାଇଲେ ଶୂନ୍ । ଆମ ମାଟିରେ, ଆମ ଖଣି ନେଇ କମ୍ପାନୀ କଲେ । ମହାନଦୀ କୋଲଡ ଫିଲଡ୍ ପ୍ରତିବର୍ଷ ୨୦ ହଜାର କୋଟି ଲାଭ ପାଉଛି । ଓଡ଼ିଶାବାସୀ କେବଳ ପ୍ରଦୂଷଣ ପାଉଛନ୍ତି । ଓଡ଼ିଶାରୁ ରେଳବାଇ ବର୍ଷକୁ ପାଉଛି ୨୦ ହଜାର କୋଟି ଟଙ୍କା । ଓଡ଼ିଶାରେ ରେଳ ବଜେଟ୍ ଖର୍ଚ୍ଚ ମାତ୍ର ୨ ହଜାର କୋଟି ଟଙ୍କା ।

ବିଜୁ ବାବୁଙ୍କ କଥା ମନେ ପକାଇ ମୁଖ୍ୟମନ୍ତ୍ରୀ କହିଥିଲେ, ବିଜୁ ବାବୁ ଠିକ୍ କହିଥିଲେ । ‘ମୋତେ ଆର୍ଥିକ ସ୍ୱାୟତ୍ତତା ଦିଅ । ମୁଁ ଓଡ଼ିଶାକୁ ଦକ୍ଷିଣ ଏସିଆର ଏକ ଆଗୁଆ ରାଜ୍ୟ କରି ଗଢ଼ି ତୋଳିବି ।’ ବିଜୁବାବୁଙ୍କ ସହ ମୁଁ ଏକମତ । ମୋତେ ଆର୍ଥିକ ସ୍ୱାୟତ୍ତତା ଦିଅ । ମୋର କେନ୍ଦ୍ରୀୟ ପାଣ୍ଠି, ଅନୁଦାନ କିଛି ଦରକାର ନାହିଁ । ଓଡ଼ିଶାର ଟଙ୍କାରେ ମୁଁ ଓଡ଼ିଶାବାସୀଙ୍କର ଉନ୍ନତି କରିବି ।

କଂଗ୍ରେସ ଓ ବିଜେପିର ଓଡ଼ିଶା ପ୍ରତି ଦରଦ ନାହିଁ । ନିର୍ବାଚନ ବେଳେ ସେମାନେ ବଡ଼ ସ୍ୱପ୍ନ ଦେଖାଇବେ ଆଉ ତାପରେ ସେମାନଙ୍କ ଦେଖା ମିଳିବନି । ଆମେ କଥା ନୁହେଁ, କାମରେ ବିଶ୍ୱାସ କରୁ । ସେଥିପାଇଁ ବିଜୁ ଜନତା ଦଳ ଆଜି ଏକ ଆନ୍ଦୋଳନରେ ପରିଣତ ହୋଇଛି । ଓଡ଼ିଶାବାସୀଙ୍କ ହକ୍ ଓ ସ୍ୱାଭିମାନ ପାଇଁ ଆନେ୍ଦାଳନ ଜାରି ରହିବ ବୋଲି ମୁଖ୍ୟମନ୍ତ୍ରୀ କହିଥିଲେ ।

ସମାବେଶରେ ଅନ୍ୟମାନଙ୍କ ମଧ୍ୟରେ ମନ୍ତ୍ରୀ ଅଶୋକ ପଣ୍ଡା, ସାଂସଦ ପ୍ରସନ୍ନ ପାଟ୍ଟଶାଣୀ, ବଳଭଦ୍ର ମାଝୀ, ବିଧାୟକ ବିଜୟ କୁମାର ମହାନ୍ତି, ପ୍ରିୟଦର୍ଶୀ ମିଶ୍ର, ମେୟର ଅନନ୍ତ ନାରାୟଣ ଜେନା ପ୍ରମୁଖ ଭାଷଣ ଦେଇଥିଲେ ।