ନୂଆଦିଲ୍ଲୀ: ନିଜ ଜନ୍ମମାଟିକୁ ଫେରି ଆସିଛନ୍ତି ଭାରତ ମାଟିର ଯୋଦ୍ଧା ସନ୍ତାନ ଅଭିନନ୍ଦନ । ପାକିସ୍ଥାନୀ ସେନା କବଳରେ ପାଖାପାଖି ଅଢ଼େଇ ଦିନର ପଣବନ୍ଦୀ ଜୀବନ କାଟିବା ପରେ ଆଜି ରାତିରେ ତାଙ୍କୁ ମୁକ୍ତି ମିଳିଛି । ଭାରତ-ପାକିସ୍ଥାନ ସୀମା ୱାଘା ବର୍ଡର ନିକଟରେ ଭାରତୀୟ ବାୟୁସେନାର ୱିଙ୍ଗ୍ କମାଣ୍ଡର ଅଭିନନ୍ଦନଙ୍କୁ ପାକିସ୍ଥାନ ଫେରାଇ ଦେଇଛି । ନିଜ ମାଟିରେ ଅଭିନନ୍ଦନ ପାଦ ଦେବା କ୍ଷଣି ସମଗ୍ର ଭାରତବର୍ଷରେ ଖୁସିର ଲହରି ଖେଳିଯାଇଛି । ଦେଶର ବିଭିନ୍ନ ସ୍ଥାନରେ ଲୋକମାନେ ବାଣ ଫୁଟାଇ ତାଙ୍କୁ ସ୍ୱାଗତ କରିଛନ୍ତି । ୱାଘା ବର୍ଡର ନିକଟରୁ ତାଙ୍କୁ ପାଛୋଟି ଆଣିଛନ୍ତି ବିଏସଏଫ ଏବଂ ବାୟୁସେନା ଅଧିକାରୀ ।
ସକାଳ ପ୍ରାୟ ୧୦ ଟା ସୁଦ୍ଧା ଅଭିନନ୍ଦନଙ୍କୁ ପ୍ରତ୍ୟାର୍ପଣ କରାଯିବ ବୋଲି ପ୍ରଥମେ ସୂଚନା ମିଳିଥିଲେ ମଧ୍ୟ ସେଥିରେ ବହୁ ବିଳମ୍ବ ହୋଇଥିଲା । ଏହି ବିଳମ୍ବର କାରଣ ଜଣାପଡ଼ିନାହିଁ । ସୂଚନା ଅନୁଯାୟୀ, ଅପରାହ୍ନରେ ପାକିସ୍ଥାନୀ ସେନା କଡ଼ା ସୁରକ୍ଷା ବଳୟ ମଧ୍ୟରେ ତାଙ୍କୁ ଲାହୋରରୁ ଆଣି ପାକିସ୍ଥାନ ଚେକପୋଷ୍ଟରେ ପହଞ୍ଚାଇଥିଲେ । ସେଠାରେ ତାଙ୍କର କଷ୍ଟମସ୍, ଇମିଗ୍ରେସନ୍ କାଗଜପତ୍ର ଯାଞ୍ଚ କରାଯାଇଥିଲା । ଏକ ଡାକ୍ତରୀ ଦ ଦ୍ୱାରା ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା । ଆବଶ୍ୟକ ପ୍ରକ୍ରିୟା ସରିଲା ପରେ ଅଭିନନ୍ଦନ ରାତି ଠିକ୍ ୯.୨୧ ମିନିଟ୍ ରେ ଭାରତ ମାଟିରେ ପାଦ ଦେଇଥିଲେ । ଭାରତୀୟ ବାୟୁସେନା ଓ ବିଏସଏଫର ବରିଷ୍ଠ ଅଧିକାରୀ ତାଙ୍କୁ ପାଛୋଟି ଆଣିଥିଲେ ।
