ଜୁଲାଇ ଷ୍ଟ୍ରାଟେଜି ପାଇଁ ଫିଡବ୍ୟାକ୍ ନେଲେ ମୁଖ୍ୟମନ୍ତ୍ରୀ

ଜିଲ୍ଲାପାଳ,ଏସପିଙ୍କ ସହ ଭିଡ଼ିଓ କନଫରେନ୍ସିଂ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ବଢ଼ି ଚାଲିଥିବାରୁ ଜୁଲାଇ ମାସରେ ସରକାର କି ରଣନୀତି ଆପଣେଇବେ ତାହାକୁ ସମସ୍ତଙ୍କର ଅପେକ୍ଷା ଥିବା ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡ଼ିଓ କନଫରେନ୍ସିଂରେ ଜିଲ୍ଲାପାଳ ଓ ଏସପିମାନଙ୍କ ସହ ଆଲୋଚନା କରି ଫିଡ୍ ବ୍ୟାକ୍ ନେଇଛନ୍ତି । ସେମାନଙ୍କର ମତାମତ ଭିତ୍ତିରେ କୋଭିଡ୍ ପରିଚାଳନା ପାଇଁ ବିସ୍ତୃତ ରଣନୀତି ପ୍ରସ୍ତୁତ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଆଲୋଚନା କାଳରେ ମୁଖ୍ୟମନ୍ତ୍ରୀ ଜିଲ୍ଲାପାଳ ଓ ଏସପିମାନଙ୍କୁ କେତୋଟି ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଥିଲେ ।

~ କୋଭିଡ୍ ଯୋଦ୍ଧାଙ୍କ ସ୍ୱାସ୍ଥ୍ୟର ଯତ୍ନ ପ୍ରତି ଯଥେଷ୍ଟ ଧ୍ୟାନ ଦିଅନ୍ତୁ । କାରଣ ଲୋକଙ୍କ ସୁରକ୍ଷା ପାଇଁ ସେମାନେ ଅନେକ ତ୍ୟାଗ କରୁଛନ୍ତି । ତେଣୁ ସେମାନେ ଆଗ ନିଜର ସୁରକ୍ଷା ସମ୍ପର୍କରେ ସଚେତନ ହେବା ଗୁରୁତ୍ୱପୂର୍ଣ୍ଣ ।

~ ସଂକ୍ରମିତ କୋଭିଡ୍ ଯୋଦ୍ଧାଙ୍କ ସହ ସେ ନିଜେ ଫୋନ୍ ରେ କଥା ହୋଇ ଭଲମନ୍ଦ ବୁଝୁଛନ୍ତି । ବରିଷ୍ଠ ଅଧିକାରୀମାନେ ମଧ୍ୟ ନିଜେ ସେମାନଙ୍କ ସହ କଥା ହୁଅନ୍ତୁ । ଏହାଦ୍ୱାରା ଯୋଦ୍ଧାମାନଙ୍କ ମନୋବଳ ବୃଦ୍ଧି ପାଇବ ।

~ ବିଭିନ୍ନ ସରକାରୀ ଅଫିସଗୁଡ଼ିକ ଯେପରି ସଂକ୍ରମଣମୁକ୍ତ ରହିବ, ତାହାକୁ ଗୁରୁତ୍ୱ ଦିଅନ୍ତୁ । କୋଭିଡ୍ ନିୟମର କଡ଼ାକଡ଼ି ଅନୁପାଳନ କରି ସରକାରୀ କାର୍ଯ୍ୟାଳୟଗୁଡ଼ିକୁ ଶୂନ୍ୟ ସଂକ୍ରମଣ ଅଞ୍ଚଳ କରି ରଖିବା ସହ କର୍ମଚାରୀମାନେ କ’ଣ କରିବେ, କ’ଣ ନ କରିବେ ସେ ସମ୍ପର୍କରେ ବ୍ୟାପକ ସଚେତନ କରାନ୍ତୁ । ସବୁ କାର୍ଯ୍ୟାଳୟର ମୁଖ୍ୟ ଏଥିପାଇଁ ଦାୟୀ ରହିବେ ।

~ ମାସ୍କର ଉପଯୁକ୍ତ ବ୍ୟବହାର ଓ ସାମାଜିକ ଦୂରତା ନିୟମର କଡ଼ାକଡ଼ି ପାଳନ ସହ ଉଲ୍ଲଂଘନ କ୍ଷେତ୍ରରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ଇତିମଧ୍ୟରେ ତିନି ମାସ ବିତିଯାଇଥିବାରୁ ଏସବୁ ଉଲ୍ଲଂଘନ ଘଟଣାରେ ଏଣିକି ପୁଲିସ ଓ ପ୍ରଶାସନ ଅଧିକ କଠୋର ହୁଅନ୍ତୁ ।

~ ଗାଁ କଲ୍ୟାଣ ସମିତି ସ୍ତରରେ କୋଭିଡ୍ କେୟାର କମିଟି ଗଠନ, ସେମାନଙ୍କୁ ପାଣ୍ଠି ଓ କ୍ଷମତା ପ୍ରଦାନ, ସେମାନଙ୍କୁ ଟ୍ରେନିଂ ଏବଂ ସେମାନଙ୍କ କାର୍ଯ୍ୟକ୍ରମକୁ ମନିଟିରଂ କରିବା ପାଇଁ ବିଧିବଦ୍ଧ ବ୍ୟବସ୍ଥା ଗ୍ରହଣ କରାଯାଉ । ପ୍ରତି ପଞ୍ଚାୟତରେ କୋଭିଡ୍ ହୋମ୍ ସ୍ଥାପନ ଏବଂ କେତେକ ପଞ୍ଚାୟତକୁ ନେଇ ଟିଏମସି ଗଠନ, ସେମାନଙ୍କୁ ପାଣ୍ଠି ଯୋଗାଣ ଓ ସେବା ପ୍ରଦାନ ବ୍ୟବସ୍ଥା ଆଦି ବିଭିନ୍ନ ବିଷୟକୁ ଗୁରୁତ୍ୱ ଦିଆଯାଉ ।

~ ଘରୋଇ ହସ୍ପିଟାଲ୍ ଗୁଡ଼ିକ କୋଭିଡ୍ ଗାଇଡଲାଇନ୍ ପାଳନ କରୁଛନ୍ତି ନା ନାହିଁ, ତାହାର ବାରମ୍ବାର ଯାଞ୍ଚ କରାଯାଉ ଏବଂ ସେମାନଙ୍କୁ ଅଧିକରୁ ଅଧିକ ସଚେତନ କରାଯାଉ ।

~ ହଟସ୍ପଟ୍ ଅଞ୍ଚଳଗୁଡ଼ିକରେ ଜିଲ୍ଲାପାଳମାନେ ଆବଶ୍ୟକତା ଅନୁଯାୟୀ ସ୍ୱତନ୍ତ୍ର ରଣନୀତି ପ୍ରସ୍ତୁତ କରନ୍ତୁ । କୋଭିଡ୍ ଯୁଦ୍ଧରେ ରାଜ୍ୟ ସରକାରଙ୍କ ସମସ୍ତ ବିଭାଗ ସକ୍ରିୟ ଅଂଶଗ୍ରହଣ କରନ୍ତୁ ।

ବର୍ତ୍ତମାନ ସୁଦ୍ଧା ଆମେ କୋଭିଡ୍ ଯୁଦ୍ଧରେ ବହୁତ ଭଲ ପ୍ରଦର୍ଶନ କରୁଛୁ । ଆଗାମୀ ଦିନରେ ଏହା ଜାରି ରହିବ ବୋଲି କହିଥିଲେ ମୁଖ୍ୟମନ୍ତ୍ରୀ ।

ବୈଠକରେ ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ, ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର, ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍ ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ସବୁ ଜିଲ୍ଲାର ଜିଲ୍ଲାପାଳ ଓ ଏସପିମାନେ ଭିଡ଼ିଓ କନଫରେନ୍ସିଂରେ ଯୋଡି ହୋଇଥିଲେ ।