କରୋନା ରୋଗୀଙ୍କ ପାଇଁ ମେଡ଼ିସିନ୍

ଭୁବନେଶ୍ୱର: କରୋନା ରୋଗୀଙ୍କ ପାଇଁ ଆଶା ସଂଚାର କରିଥିବା ବିକଳ୍ପ ଔଷଧ ଓଡ଼ିଶାକୁ ଆସିଯାଇଛି । ‘ଡେକ୍ସାମେଥାସନ୍’ ଟାବଲେଟ୍ ଓ ଇଂଜେକ୍ସନ୍ ପରେ ଆଜି ଆସିଛି ‘ରେମଡେସିଭିର୍’ ଓ ‘ଫାବି ଫ୍ଲୁ’ ।

ଆଇସିଏମଆର୍ ସ୍ୱୀକୃତ ଏହି ମେଡ଼ିସିନ୍ ଓ ଇଂଜେକ୍ସନ୍ ତିନି ପର୍ଯ୍ୟାୟ କରୋନା ଆକ୍ରାନ୍ତଙ୍କୁ ଦିଆଯାଇପାରିବ । ସାମାନ୍ୟରୁ ମଧ୍ୟମ ଧରଣର ରୋଗୀଙ୍କୁ ଦିଆଯିବ ଫାବି ଫ୍ଲୁ । ମଧ୍ୟମରୁ ଗୁରୁତର ରୋଗୀଙ୍କୁ ଦିଆଯିବ ରେମଡେସିଭର । ଅତି ଗୁରୁତର ବା ସିଭିୟର୍ ଲକ୍ଷଣ ଥିବା ରୋଗୀଙ୍କୁ ଦିଆଯିବ ଡେକ୍ସାମେଥାସନ୍ । ସବୁ ହସ୍ପିଟାଲ୍ ରେ ଏହି ଔଷଧ ଉପଲବ୍ଧ ହେବ ନାହିଁ । କେବଳ କୋଭିଡ୍ ହସ୍ପିଟାଲ୍ ରେ ଉପଲବ୍ଧ ହେବ ।

ମଧ୍ୟମରୁ ଗୁରୁତର ସଂକ୍ରମଣ ଥିବା ରୋଗୀଙ୍କ ପାଇଁ ଉଦ୍ଦିଷ୍ଟ ରେମଡେସିଭିର୍ ମେଡ଼ିସିନ୍ ଅଳ୍ପ କିଛି ହସ୍ପିଟାଲ୍ ରେ ପହଞ୍ଚିସାରିଛି । ଡାକ୍ତରଙ୍କ ପରାମର୍ଶ ଅନୁସାରେ ହିଁ ଏହା ରୋଗୀଙ୍କୁ ଦିଆଯାଇପାରିବ ।

ସାମାନ୍ୟରୁ ମଧ୍ୟମ ଧରଣର ରୋଗୀଙ୍କ ପାଇଁ ଉଦ୍ଦିଷ୍ଟ ମେଡ଼ିସିନ୍ ଫାବି ଫ୍ଲୁ କମ୍ ସଂଖ୍ୟାରେ ଆସିଛି । ପ୍ରଥମ ଦଫାରେ ଆସିଛି ୩୪ ଟାବଲେଟ୍ ବିଶିଷ୍ଟ ୧୨୦୦ ଷ୍ଟ୍ରିପ୍ ମେଡିସିନ୍ । ରୋଗୀଙ୍କ ଅନୁମତିକ୍ରମେ ଏହି ମେଡିସିନ୍ ଦିଆଯିବ ।

ଅତି ଗୁରୁତର ଓ ଭେଣ୍ଟିଲେଟର୍ ରେ ଥିବା ରୋଗୀଙ୍କ ପାଇଁ ଉଦ୍ଦିଷ୍ଟ ଡେକ୍ସାମେଥାସନ୍ ଟାବଲେଟ୍ ବିପୁଳ ପରିମାଣରେ ମହଜୁଦ ଅଛି । ୨ ଲକ୍ଷ ଟାବଲେଟ୍ ଏବଂ ୨ ଲକ୍ଷ ଇଂଜେକ୍ସନ୍ ଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି ।

କରୋନା ରୋଗୀଙ୍କ ପାଇଁ ଏହି ମେଡିସିନ୍ ଆଶ୍ୱସ୍ତି ଆଣିଥିଲେ ମଧ୍ୟ ଏହାର ରେଜଲ୍ଟ ଉପରେ ଡାକ୍ତରମାନେ ଗ୍ୟାରେଣ୍ଟି ଦେଇପାରିନାହାନ୍ତି । ଏହା ଆଶିଂକ ଫଳପ୍ରଦ ହେଉଥିବା କିଛି ବିଶେଷଜ୍ଞ ମତ ଦେଇଛନ୍ତି ।

ଅନ୍ୟପକ୍ଷରେ ରାଜ୍ୟରେ ହୁ ହୁ ହୋଇ ବଢୁଥିବା କରୋନା ଆକ୍ରାନ୍ତଙ୍କ ମଧ୍ୟରେ ଲୋକାଲ୍ କେସ୍ ଅଧିକରୁ ଅଧିକ ଆସୁଥିବାରୁ ଗୋଷ୍ଠୀ ସଂକ୍ରମଣ ଆଶଙ୍କା ବଢ଼ିଛି । ଆଇଏଲଏସ୍ ନିଦେ୍ର୍ଦଶକ ଗୋଷ୍ଠୀ ସଂକ୍ରମଣକୁ ଖଣ୍ଡନ କରିଥିଲେ ମଧ୍ୟ ବାସ୍ତବ ସ୍ଥିତି ପରଖିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ସେରୋଲୋଜିକାଲ୍ ସର୍ଭେ ପୁରୀରୁ ଆରମ୍ଭ ହୋଇଛି । ଆସନ୍ତା ୧ ରୁ ଭୁବନେଶ୍ୱରରେ ସର୍ଭେ ଆରମ୍ଭ ହେବ । ପରେ ପରେ କରୋନା ହଟସ୍ପଟ୍ ଜିଲ୍ଲା ଗଞ୍ଜାମ, ଗଜପତି ଓ କଟକ ଜିଲ୍ଲାରେ ସର୍ଭେ ହେବ । କୌଣସି ବ୍ୟକ୍ତିର ରକ୍ତରେ ଥିବା ଆଣ୍ଟିବଡି ପରିମାଣ ଅନୁସାରେ ସେ କରୋନାରେ ସଂକ୍ରମିତ ହୋଇଛନ୍ତି ନା ନାହିଁ ତାହା ଏଥିରୁ ଜାଣିହେବ ।