ଭୁବନେଶ୍ୱର: ରାଜ୍ୟ ବିଜେପିରେ ସମୀର ମହାନ୍ତିଙ୍କ ଯୁଗ ଆରମ୍ଭ ହୋଇଛି । ଆଜି ରାଜ୍ୟ କାର୍ଯ୍ୟାଳୟଠାରେ ଆନୁଷ୍ଠାନିକ ଭାବେ ସଭାପତି ଦାୟିତ୍ୱ ଗ୍ରହଣ କରିଛନ୍ତି । ସେଥିପାଇଁ ଆୟୋଜିତ ସମ୍ବର୍ଦ୍ଧନା ସଭାରେ ରାଜ୍ୟରେ ବିଜେପି ସ୍ଥିତିକୁ ନେଇ ଜୋସ୍ ଦେଖାଇଛନ୍ତି ନୂଆ ସଭାପତି । ଆଗାମୀ ଦିନରେ ଦଳକୁ ଅଧିକ ସଂଗଠିତ କରାଯିବ ଏବଂ କେନ୍ଦ୍ରର ଜନକଲ୍ୟାଣ ଯୋଜନାକୁ ୩୭ ହଜାର ବୁଥ୍ ରେ ଥିବା ଲୋକମାନଙ୍କ ପାଖରେ ପହଞ୍ଚାଇବା ଉଦ୍ୟମକୁ ଆହୁରି ଜୋରଦାର କରାଯିବ ବୋଲି ଶ୍ରୀ ମହାନ୍ତି ଦୃଢ଼ ବିଶ୍ୱାସ ଦେଇଛନ୍ତି ।
ଜଣେ ଦକ୍ଷ ଓ ଟାଣୁଆ ସଂଗଠକ ଭାବେ ସମୀର ପରିଚିତ । ତେବେ ବର୍ତ୍ତମାନ ପାଇଁ ତାଙ୍କର ବଡ଼ ପରିଚୟ ହେଉଛି ସେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଅତି ପାଖ ଲୋକ । ସଭାପତି ରେସ୍ ରେ ଅନ୍ୟ ସମସ୍ତଙ୍କୁ ପଛରେ ପକାଇବା କେବଳ ଧର୍ମେନ୍ଦ୍ରଙ୍କ ଯୋଗୁଁ ସମ୍ଭବପର ହୋଇଛି । ଆଜିର ସମ୍ବର୍ଦ୍ଧନା ସଭାରେ ଏହାର ପ୍ରତିଫଳନ ଦେଖିବାକୁ ମିଳିଥିଲା ।
ସମୀର ତାଙ୍କ ଭାଷଣରେ ଧର୍ମେନ୍ଦ୍ର ପ୍ରଧାନ ଏବଂ ତାଙ୍କ ବାପା ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଦେବେନ୍ଦ୍ର ପ୍ରଧାନଙ୍କୁ ବାରମ୍ବାର ପ୍ରଶଂସା କରିଥିଲେ । ବିଜେପିରେ ତାଙ୍କ କ୍ୟାରିୟର୍ ଗଢ଼ିବା ପଛରେ ଦେବେନ୍ଦ୍ର ପ୍ରଧାନଙ୍କ ଅବଦାନକୁ ସ୍ମରଣ କରି ସେ ତାଙ୍କୁ ଗୁରୁ ବୋଲି ମାନିଥିଲେ । ସମୀରଙ୍କ ପ୍ରତି ଧର୍ମେନ୍ଦ୍ର ବି ତାଙ୍କ ଭଲ ପାଇବା ଦେଖାଇଥିଲେ । ସମୀରଙ୍କୁ ସମ୍ବର୍ଦ୍ଧିତ କରିବା ପାଇଁ ଦିଆଯାଇଥିବା ବିରାଟ ଫୁଲତୋଡ଼ାକୁ ନିଜେ ଟେକି ଧରିଥିଲେ ଧର୍ମେନ୍ଦ୍ର ।
