ସମସ୍ତେ ସୁରତ ଫେରନ୍ତା
ଭୁବନେଶ୍ୱର: ଯାହା ଆଶଙ୍କା କରାଯାଉଥିଲା ସତ । ରାଜ୍ୟରେ କରୋନା କାୟା ବିସ୍ତାର କଲାଣି । ଦକ୍ଷିଣରେ ଗଞ୍ଜାମରୁ ଏକାଥରେ ୧୭ ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ସେପଟେ ଉତ୍ତରରେ ମୟୁରଭଞ୍ଜକୁ କରୋନା ଡେଇଁ ୩ ଜଣଙ୍କୁ ଆକ୍ରାନ୍ତ କରିଛି । ଏହିଭଳି ଭାବେ ଦିନକରେ ନୂଆ ୨୦ କରୋନା ପଜିଟିଭ୍ ଙ୍କ ସମ୍ପର୍କରେ ରାଜ୍ୟ ସ୍ୱାସ୍ଥ୍ୟ ବିଭାଗର ୱେବସାଇଟ୍ ରେ ସୂଚନା ଦିଆଯାଇଛି । ସମସ୍ତେ ସୁରତ ଫେରନ୍ତା ବୋଲି ଜଣାପଡ଼ିଛି । ଏଥିସହ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୨୦୫ କୁ ବୃଦ୍ଧି ପାଇଛି ।
ଗଞ୍ଜାମ ନୂଆ ଆକ୍ରାନ୍ତଙ୍କ ମଧ୍ୟରେ ୧୬ ଜଣ ପୁରୁଷ ଏବଂ ଜଣେ ମହିଳା ଅଛନ୍ତି । ସେମାନଙ୍କର ବୟସ ଯଥାକ୍ରମେ ୨୭,୨୭,୨୦, ୩୮,୨୩, ୨୯, ୫୦, ୩୦,୨୯,୨୧,୪୩, ୪୩, ୩୯, ୪୬, ୧୮, ୨୪ ଏବଂ ୨୦ ବର୍ଷ । ମୟୁରଭଞ୍ଜର ଆକ୍ରାନ୍ତ ସମସ୍ତେ ପୁରୁଷ ଏବଂ ସେମାନଙ୍କର ବୟସ ଯଥାକ୍ରମେ ୨୧,୩୬ ଏବଂ ୪୪ ବର୍ଷ ।
ଗତ ଏପ୍ରିଲ୍ ୫ ତାରିଖରେ କେବଳ ଭୁବନେଶ୍ୱରରୁ ୧୮ ପଜିଟିଭ୍ ଚିହ୍ନଟ ହୋଇଥିଲେ । ସେହି ସଂଖ୍ୟାକୁ ଟପିଯାଇଛି ଆଜିର ସଂଖ୍ୟା । ୪ ଦିନ ତଳେ ଗଞ୍ଜାମରୁ ଜଣେ ବି ପଜିଟିଭ୍ ନ ଥିଲା ବେଳେ ଆଜି ଦିନରେ ଜିଲ୍ଲାରୁ ୨୧ ଜଣ ପଜିଟିଭ୍ ଚିହ୍ନଟ ହେଲେଣି । ପୂର୍ବରୁ ଚିହ୍ନଟ ୪ ଆକ୍ରାନ୍ତ ସୁରଟ୍ ଫେରନ୍ତା ହୋଇଥିବା ବେଳେ ଏବେ ନୂଆ ୧୭ ଆକ୍ରାନ୍ତମାନେ ମଧ୍ୟ ସୁରତ ଫେରନ୍ତା ବୋଲି ସରକାରୀ ଭାବେ କୁହାଯାଇଛି ।
ସେହିଭଳି ମୟୁରଭଞ୍ଜ ଜିଲ୍ଲାରେ ପ୍ରଥମ ଥର ପାଇଁ ପଜିଟିଭ୍ ଚିହ୍ନଟ ହୋଇଛନ୍ତି । ଜିଲ୍ଲାର ୩ ପଜିଟିଭ୍ ମଧ୍ୟ ସୁରତ ଫେରନ୍ତା । ଏମାନେ ସମସ୍ତେ କ୍ୱାରେଣ୍ଟାଇନ୍ ରେ ଥିଲେ ।
ମୋଟାମୋଟି ଦେଖିଲେ, ଦିନକୁ ଦିନ କରୋନା ଆକ୍ରାନ୍ତ ଜିଲ୍ଲା ସଂଖ୍ୟା ବଢ଼ି ଚାଲିଲାଣି । ତାଲିକାରେ ମୟୁରଭଞ୍ଜ ଯୋଡି ହେଲା ପରେ ଜିଲ୍ଲା ସଂଖ୍ୟା ୧୮ ହୋଇଛି । ଗତକାଲି ଜଗତସିଂହପୁର ଜିଲ୍ଲା ଏହି ତାଲିକାରେ ଯୋଡି ହୋଇଥିଲା । ଜିଲ୍ଲାରୁ ୪ ଜଣ ପଜିଟିଭ୍ ଚିହ୍ନଟ ହୋଇଥିଲେ ।
ଏବେ ୧୮ ଟି ଜିଲ୍ଲାରୁ କରୋନା ଆକ୍ରାନ୍ତଙ୍କ ସଂଖ୍ୟା ୨୦୫ ହୋଇଥିବା ବେଳେ ୬୧ ଜଣ ସୁସ୍ଥ ହୋଇଛନ୍ତି । ୨ ଜଣ ମୃତ୍ୟୁବରଣ କରିଛନ୍ତି । ଆକ୍ଟିଭ୍ ରୋଗୀଙ୍କ ସଂଖ୍ୟା ଏବେ ୧୪୨ ।
