ଭୁବନେଶ୍ୱର: ପୂର୍ବତନ ମନ୍ତ୍ରୀ ରଘୁନାଥ ମହାନ୍ତିଙ୍କ ଦୁଃଖ ଓ ପ୍ରତୀକ୍ଷାର ଅନ୍ତ ଘଟିଛି । ବିଜେଡ଼ି ସଭାପତି ନବୀନ ପଟ୍ଟନାୟକ ଶେଷରେ ତାଙ୍କୁ ତାଙ୍କର ପୁରୁଣା ଦାୟିତ୍ୱକୁ ଫେରାଇ ଆଣିଛନ୍ତି । ଦୀର୍ଘ ୬ ବର୍ଷ ପରେ ସଭାପତି ନବୀନ ପଟ୍ଟନାୟକ ତାଙ୍କୁ ପୁଣିଥରେ ଦଳର ଉପସଭାପତି ନିଯୁକ୍ତ କରିଛନ୍ତି । ଢ଼େଙ୍କାନାଳ ଜିଲ୍ଲାର ଦଳୀୟ ପର୍ଯ୍ୟବେକ୍ଷକ ଦାୟିତ୍ୱ ମଧ୍ୟ ଦେଇଛନ୍ତି । ଅର୍ଥାତ୍ ଦାମୋଦର ରାଉତଙ୍କ ହାତରେ ଥିବା ପୂର୍ବ ସାଂଗଠନିକ କ୍ଷମତା ମିଳିଛି ରଘୁଙ୍କୁ । ଏଥିସହ ସେ ବିଜେପିରେ ମିଶୁଥିବା ନେଇ ଚାଲିଥିବା କଳ୍ପନାଜଳ୍ପନାର ଅବସାନ ଘଟିଛି ।
ଏକଦା ମୁଖ୍ୟମନ୍ତ୍ରୀଙ୍କର ଏକଦା ବିଶ୍ୱସ୍ତ ଥିଲେ ରଘୁନାଥ ମହାନ୍ତି । ଶିଳ୍ପ, ଖଣି ଓ ସଂସଦୀୟ ବ୍ୟାପାର ଭଳି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଥିଲେ । ମାତ୍ର ୨୦୧୩ ମାର୍ଚ୍ଚ ମାସରେ ପାରିବାରିକ ବିବାଦରେ ଫସିଯାଇଥିଲେ ସେ । ବୋହୁ ବର୍ଷାସୋନି ଚୌଧୁରୀ ତାଙ୍କ ବିରୋଧରେ ଆଣିଥିଲେ ଯୌତୁକ ନିର୍ଯାତନା । ପରବର୍ତ୍ତୀ ସମୟରେ କୋଲକତାରୁ ଗିରଫ ହୋଇଥିଲେ ରଘୁ ଓ ତାଙ୍କ ପତ୍ନୀ । ତେବେ ଏହି ମାମଲାରେ ରଘୁଙ୍କ ମନ୍ତ୍ରୀ ପଦ ଚାଲିଯିବା ସହ ଦଳର ଉପସଭାପତି ପଦରୁ ବିଦା ହୋଇଥିଲେ । ୨୦୧୪ ସାଧାରଣ ନିର୍ବାଚନରେ ଦଳୀୟ ଟିକେଟରୁ ବଞ୍ଚିତ ହୋଇଥିଲେ ଏହି ପାଞ୍ଚ ଥରର ବିଧାୟକ । ରଘୁ ବିଜେଡ଼ିରେ ଥିଲେ ବି ଏକଦମ୍ ଅଲୋଡ଼ା ହୋଇପଡ଼ିଥିଲେ ।
ଗତବର୍ଷ ଜୁନ୍ ୧୯ ତାରିଖରେ ରଘୁଙ୍କୁ ହଠାତ ନବୀନ ନିବାସରେ ଦେଖିବାକୁ ମିଳିଥିଲା । ବାଲେଶ୍ୱର ଜିଲ୍ଲା ପର୍ଯ୍ୟବେକ୍ଷକ ଅତନୁ ସବ୍ୟସାଚୀ ନାୟକଙ୍କ ସହ ନବୀନ ନିବାସ ଯାଇ ସେ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ । ଦଳ ପାଇଁ କାର୍ଯ୍ୟ କରିବାକୁ ନବୀନ ତାଙ୍କୁ ପରାମର୍ଶ ଦେଇଥିଲେ । ମୁଖ୍ୟମନ୍ତ୍ରୀଙ୍କ ସହ ଏହି ଭେଟ ପରେ ରଘୁଙ୍କର ପୁର୍ନଜନ୍ମ ହେଲା ବୋଲି କୁହାଗଲା । ମାତ୍ର ପରବର୍ତ୍ତୀ ସମୟରେ ସେଭଳି କିଛି ଦେଖିବାକୁ ମିଳିଲାନି । ରଘୁଙ୍କୁ କୌଣସି ଦଳୀୟ ଦାୟିତ୍ୱ ମିଳିଲା ନାହିଁ । ଫଳରେ ଅସନ୍ତୁଷ୍ଟ ହୋଇପଡ଼ିଥିଲେ ରଘୁ । ବିଜେପିରେ ସେ ମିଶୁଥିବା ନେଇ ଜୋର୍ ଚର୍ଚ୍ଚା ହୋଇଥିଲା । ମାତ୍ର ଆଜି ତାଙ୍କର ପୁରୁଣା ‘ଉପସଭାପତି’ ଦାୟିତ୍ୱ ମିଳିବା ପରେ ସେହି ଚର୍ଚ୍ଚାରେ ଅବସାନ ଘଟିଛି ।
