ନୂଆଦିଲ୍ଲୀ: ଦିଲ୍ଲୀରୁ ନିଜର ତାକତ୍ ଦେଖାଇଛନ୍ତି ପ୍ରସାଦ ହରିଚନ୍ଦନ । ଓଡ଼ିଶା ପାଇଁ ଆଜି ଘୋଷିତ ଏଆଇସିସିର ୭୮ ଜଣିଆ ସଭ୍ୟ ତାଲିକାରେ ୯ ଜଣ ବିଧାୟକଙ୍କୁ ସ୍ଥାନ ମିଳିନାହିଁ । ସେମାନଙ୍କ ମଧ୍ୟରେ ଅଛନ୍ତି ପ୍ରସାଦଙ୍କୁ ଖୋଲାଖୋଲି ଗାଳି କରୁଥିବା ମୁଖ୍ୟ ସଚେତକ ତାରାପ୍ରସାଦ ବାହିନୀପତି, ଡାକ୍ତର ପ୍ରଫୁଲ୍ଲ ମାଝୀ ଏବଂ ଯୋଗେଶ ସିଂ । ତାଲିକାରେ ସ୍ଥାନ ପାଇ ନ ଥିବା ଅନ୍ୟ ବିଧାୟକମାନେ ହେଉଛନ୍ତି ଦେବେନ୍ଦ୍ର ଶର୍ମା, ଅଂଶୁମାନ ମହାନ୍ତି, ପ୍ରକାଶ ବେହେରା, ଜାକବ ପ୍ରଧାନ, ଚନ୍ଦ୍ରଶେଖର ମାଝୀ ଓ କେ.ସୂରିୟା ରାଓ । ପ୍ରସାଦଙ୍କ ଦୃଢ଼ ବିରୋଧୀ ଏବଂ ନିରଞ୍ଜନ ପଟ୍ଟନାୟକଙ୍କର ଦୃଢ଼ ସମର୍ଥକ ପୁରୁଖା ନେତା ଅନନ୍ତ ସେଠୀଙ୍କୁ ତାଲିକାରୁ ବାଦ ଦିଆଯାଇଛି । ସେହିଭଳି ପୂର୍ବତନ ମନ୍ତ୍ରୀ ତଥା ପିସିସି ମୁଖପାତ୍ର ଗଣେଶ୍ୱର ବେହେରା ମଧ୍ୟ ତାଲିକାରୁ ବାଦ୍ ପଡ଼ିଛନ୍ତି । ୭୮ ଜଣିଆ ଏଆଇସିସି ତାଲିକା ଏବଂ ୨୦ ଜଣିଆ ସହଯୋଗୀ ତାଲିକାରେ ପ୍ରସାଦ ହରିଚନ୍ଦନଙ୍କର ପଲା ଭାରି ରହିଥିବା କୁହାଯାଉଛି ।
ଆଜିଠାରୁ ଏଆଇସିସି କାର୍ଯ୍ୟାଳୟରେ ଆରମ୍ଭ ହୋଇଛି କଂଗ୍ରେସ ମହାଅଧିବେସନ । ରାହୁଲ ଗାନ୍ଧୀ ସଭାପତି ଦାୟିତ୍ୱ ନେଲା ପରେ କଂଗ୍ରେସର ଏହା ପ୍ରଥମ ମହାଅଧିବେସନ । ଏଆଇସିସି ଅଧିବେସନ ସହ ସଂଗଠନ ପୁର୍ନବିନ୍ୟାସ କାମ ଆରମ୍ଭ ହୋଇଛି । ଓଡ଼ିଶାରେ ପିସିସି ସଭାପତି ପ୍ରସାଦ ହରିଚନ୍ଦନଙ୍କ ବିରୋଧରେ ବିଧାୟକଙ୍କ ମେଳି ଓ ଅସନ୍ତୋଷ ଉତ୍କଟ ରୂପ ଧାରଣ କରିସାରିଛି । ଦୁଇଦିନ ତଳେ ବିରୋଧୀ ଦଳ ନେତା ନରସିଂହ ମିଶ୍ରଙ୍କ ବାସଭବନରେ ବିଧାୟକ ଦଳର ବୈଠକରେ ପ୍ରସାଦଙ୍କୁ ଗାଦିଚ୍ୟୁତ କରିବାର ଆଲୋଚନା ହୋଇଥିବା ଚର୍ଚ୍ଚା ହୋଇଥିଲା । ଇତିମଧ୍ୟରେ ଏଆଇସିସି ଅଧିବେସନ ସରିଲା ପରେ ୧୯ ତାରିଖରେ ବିଧାୟକ ଦଳ ରାହୁଲ ଗାନ୍ଧୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ପ୍ରସାଦଙ୍କୁ ଯଥାଶୀଘ୍ର ହଟାଇବାକୁ ସେମାନେ ରାହୁଲଙ୍କ ପାଖରେ ଦାବି କରିବେ ବୋଲି କିଛି ବିଧାୟକ କହିଛନ୍ତି । ତେବେ ଏଭଳି ସମୟରେ ଏଆଇସିସି ସଦସ୍ୟ ତାଲିକାରୁ ପ୍ରସାଦ ବିରୋଧୀ ବିଧାୟକ ଓ ବରିଷ୍ଠ ନେତାଙ୍କୁ ବାଦ୍ ଦିଆଯିବା ଘଟଣା ଚର୍ଚ୍ଚାର ବିଷୟ ହୋଇଛି ।
ଏଆଇସିସି ବୈଠକରେ ଯୋଗଦେବାକୁ ଆସିଥିବା ନିରଞ୍ଜନ ପଟ୍ଟନାୟକ ଏହା ଉପରେ ସିଧାସଳଖ କିଛି ନ କହି ତେର୍ଚ୍ଛାବାଣ ମାରିଛନ୍ତି । ପ୍ରସାଦ ପିସିସି ସଭାପତି ପଦରେ ରହିବାକୁ ନେଇ ସେ ତାତ୍ସଲ୍ୟ କରିଛନ୍ତି । ବିରୋଧୀ ଦଳ ନେତା ନରସିଂହ ମିଶ୍ର ସେଭଳି କିଛି କହି ନ ଥିଲେ ମଧ୍ୟ ଦଳରେ ନୂଆ ସମୀକରଣ ସମ୍ଭାବନାର ଇଙ୍ଗିତ ଦେଇଛନ୍ତି । ତେବେ ନୂଆ ଏଆଇସିସି ତାଲିକାକୁ ନେଇ ଓଡ଼ିଶା କଂଗ୍ରେସରେ ନୂଆ ଝଡ଼ ସୃଷ୍ଟି ହୋଇଛି । ତାଲିକାରୁ ବାଦ୍ ପଡ଼ିଥିବା ନେତାମାନେ କ୍ଷୁବ୍ଧ ହୋଇପଡ଼ିଛନ୍ତି । ରାହୁଲ ଗାନ୍ଧୀଙ୍କୁ ବଙ୍କେଇକି ଗାଳି କରିଥିବା ବେଳେ ପ୍ରସାଦଙ୍କ ଚଉଦ ପୁରୁଷ ଉଦ୍ଧାର କରିଛନ୍ତି । କଂଗ୍ରେସକୁ ଏହା ବିଭାଜନସ୍ତରକୁ ନେଇଯାଇଛି ।
