ଧର୍ମେନ୍ଦ୍ରଙ୍କୁ ଧକ୍କା! ସଙ୍ଗୀନ ହେଲାଣି ବିଜେପି ସ୍ଥିତି

ଭୁବନେଶ୍ୱର: ନୀଳଗିରିରେ ଲେଖାଶ୍ରୀ ସାମନ୍ତସିଂହାରଙ୍କୁ ଟିକେଟ ଦେଇ ପ୍ରତାପ ଷଡ଼ଙ୍ଗୀଙ୍କୁ ବାଲେଶ୍ୱର ଲୋକସଭା ଆସନରେ ଛିଡ଼ା କରାଇବାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଚାଲ୍ ରଖିଛନ୍ତି । ସେଠି ପ୍ରତାପ ଷଡ଼ଙ୍ଗୀଙ୍କୁ ଜିତାଇ ଆଣିବାର ଲକ୍ଷ୍ୟ ନାହିଁ । ବରଂ କିଭଳି ଅପମାନଜନକ ଭାବେ ହାରିବେ ତାହାର ଯୋଜନା ହେଉଛି । ବରଗଡ଼ରେ ସୁବାସ ଚୌହାନଙ୍କୁ ପ୍ରାର୍ଥୀ କରାଇ ନ ଦେବା ପାଇଁ ମଧ୍ୟ ଅନୁରୂପ ଜାଲ୍ ବିଛାଯାଉଛି । ଗତଥର ତାଙ୍କ ପ୍ରାର୍ଥୀତ୍ୱକୁ ରୋକିବା ପାଇଁ ଧର୍ମେନ୍ଦ୍ର ଚାଲ୍ ଖେଳିଥିଲେ । ମାତ୍ର ଶେଷ ମୁହୁର୍ତ୍ତରେ ନାଗପୁରରେ ବସି ସୁବାସ ଟିକେଟ ନେଇ ଆସିଥିଲେ ।

ରାଜ୍ୟରେ ଦଳର ସ୍ଥିତି ଉପରେ ମତ ଦେବାକୁ ଯାଇ ବିଜେପିର ଜଣେ ବରିଷ୍ଠ ନେତା ନିଜ ନାଁ ଗୋପନ ରଖିବା ସର୍ତ୍ତରେ ଏହି ଗୁମର ଖୋଲିଛନ୍ତି । ସେ କହିଛନ୍ତି, ଉପରକୁ ଆମେ ଯେତେ ଫୁଟାଣି ମାରିଲେ ବି ଆମ ସ୍ଥିତି ସଙ୍ଗୀନ ଅବସ୍ଥାକୁ ଆସିଲାଣି । ଦଳ ସଜାଡ଼ି ହେବା ପରିବର୍ତ୍ତେ ଦିନକୁ ଦିନ ବିଗିଡ଼ି ଚାଲିଛି । ଖାଲି ଟିଭି ଓ ଖବରକାଗଜରେ ବିଜେପି ଅଛି । ଲୋକଙ୍କ ପାଖରେ ନାହିଁ । ବର୍ଷ ବର୍ଷ ଧରି ଦଳ ପାଇଁ ଯେଉଁମାନଙ୍କର ନିଷ୍ଠା ଅଛି, ଦଳ ପାଇଁ ଯେଉଁମାନେ ଦରକାରୀ ଧର୍ମେନ୍ଦ୍ର ସେମାନଙ୍କୁ ଖତମ୍ କରିଦେଲେଣି । କିଛି ‘ୟେସ୍ ବସ୍’ ଧାରୀ ଅପାଂକ୍ତେୟ, ଅଯୋଗ୍ୟଙ୍କୁ ଧରି ରାଜନୀତି କରୁଛନ୍ତି । ଆମଦାନୀ ନେତାଙ୍କୁ ଗୁରୁତ୍ୱ ଦେଉଛନ୍ତି । ଦଳରେ ପଡ଼ି ରହିଥିବା ତୃଣମୂଳସ୍ତରର ନେତା ଓ କର୍ମୀମାନେ ଧର୍ମେନ୍ଦ୍ର ରାଜ୍ ରେ ପେଶି ହୋଇଗଲେଣି । ନିର୍ବାଚନ ବେଳକୁ ଏହା ଭୀଷଣ ବିଦ୍ରୋହର ରୂପ ନେବ ବୋଲି ସେହି ବରିଷ୍ଠ ନେତାଜଣଙ୍କ ଆଶଙ୍କା ପ୍ରକାଶ କରିଛନ୍ତି ।

ଅପରପକ୍ଷେ, ଦଳର ସ୍ଥିତି ଦେଖି ନିକଟ ଅତୀତରେ ବିଜେଡ଼ି କି କଂଗ୍ରେସ ଛାଡ଼ି ବିଜେପିରେ ଯୋଗଦେଇଥିବା ଅଧିକାଂଶ ନେତା ଏବେ ଘରବାହୁଡ଼ା ପାଇଁ ଆଗ୍ରହ ଦେଖାଇଛନ୍ତି । ବିଜେପିରେ ସେମାନଙ୍କ ମନ ଛିଣ୍ଡିଗଲାଣି । ବିଜେପି ତୃଣମୂସ୍ତରର କର୍ମୀଙ୍କଠାରୁ ସେମାନେ ସହଯୋଗ ପାଉନାହାନ୍ତି । ସଂଗଠନର ହାଲ୍ ଦେଖି ସେମାନେ ନିଜକୁ ଅସୁରକ୍ଷିତ ମଣୁଛନ୍ତି । ଦଳୀୟ ସଂଗଠନ ଉପରେ ଛିଡ଼ା ହେବାର ଶକ୍ତି ସେମାନେ ପାଉନାହାନ୍ତି । ସଂଗଠନକୁ ସବଳ କରିବାର ସାମର୍ଥ ସେମାନଙ୍କ ପାଖରେ ନାହିଁ । ପ୍ରଚାରରେ ଚହଟ ଚିକ୍କଣ ଦେଖାଯାଉଥିବା ଏହି ଦଳରେ ରହି ଭବିଷ୍ୟତ ଗଢ଼ିବା ସମ୍ଭବ ନୁହେଁ ବୋଲି ଅବିଭକ୍ତ କଟକ ଜିଲ୍ଲାର ଜଣେ ନେତା କହିଛନ୍ତି । ଆମେ ଆମର ପୁରୁଣା ଦଳକୁ ଫେରିବା ସୁଯୋଗକୁ ଅନାଇଛୁ ଏବଂ ସେଥିପାଇଁ କଥାବାର୍ତ୍ତା କରୁଛୁ ବୋଲି ସେ ସ୍ୱୀକାର କରିଛନ୍ତି ।ସୂଚନାଯୋଗ୍ୟ, ଇତିମଧ୍ୟରେ ଏଭଳି କିଛି ନେତା ବିଜେପି ଛାଡ଼ିବାକୁ ଆରମ୍ଭ କରିଛନ୍ତି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଧର୍ମେନ୍ଦ୍ରଙ୍କ ମାମଲତକାରକୁ ସଂଘ ପରିବାର ଆଦୌ ବରଦାସ୍ତ କରିବା ସ୍ଥିତିରେ ନାହାନ୍ତି । ବସନ୍ତ ପଣ୍ଡାଙ୍କ ବଦଳରେ ପ୍ରତାପ ଷଡ଼ଙ୍ଗୀଙ୍କୁ ବିଜେପି ସଭାପତି ଭାବରେ ବସାଇବାର ଉଦ୍ୟମ ଫେଲ୍ ହେବା ପରେ ସଂଘ ପରିବାରର ଅଧିକାଂଶ ସଦସ୍ୟଙ୍କ ରାଗ ବଢ଼ିଯାଇଥିବା ଚର୍ଚ୍ଚା ହେଉଛି । ଧର୍ମେନ୍ଦ୍ରଙ୍କ ଚାଲ୍ ର ପ୍ରତିଶୋଧ ନେବାକୁ ସେମାନେ ସୁଯୋଗ ଉଣ୍ଡିଥିବା ଏକ ସୂତ୍ରରୁ ଜଣାପଡ଼ିଛି । ସଂଗଠନ ମନ୍ତ୍ରୀ ମାନସ ମହାନ୍ତିଙ୍କ ସମର୍ଥକମାନେ ଧର୍ମେନ୍ଦ୍ରଙ୍କ ଉପରେ ରକ୍ତ ଚାଉଳ ଚୋବାଉଥିବା ଏହି ସୂତ୍ରରୁ ପ୍ରକାଶ ।

ରାଜନୈତିକ ସମୀକ୍ଷକଙ୍କ ମତରେ, ବିଜେପି ଯେତେ ହାୱା କରୁଛି ବାସ୍ତବରେ ତାହାର କାଣିଚାଏ ଦମ୍ ନାହିଁ । ସଂଗଠନକୁ ବଢ଼ାଇ ସଶକ୍ତ କରିବାରେ ମୁଖ୍ୟମନ୍ତ୍ରୀ ଦାବିଦାର ଧର୍ମେନ୍ଦ୍ର ପ୍ରଧାନ ଏ ଯାଏଁ ସମ୍ପୂର୍ଣ୍ଣ ବିଫଳ ହୋଇଛନ୍ତି । ବରିଷ୍ଠ ନେତାମାନଙ୍କୁ ସେ ସାଙ୍ଗରେ ନେଇ ଚାଲିବା ପରିବର୍ତ୍ତେ ସେମାନଙ୍କୁ କୋଣଠେସା କରିଛନ୍ତି । ସଚ୍ଚା ନେତା ଓ କର୍ମୀଙ୍କୁ ଗୁରୁତ୍ୱ ନ ଦେଇ ଆମଦାନୀ ନେତା ଓ କର୍ମୀଙ୍କୁ ଗୁରୁତ୍ୱ ଦେଉଥିବାରୁ ଦଳ ଭିତରେ ପ୍ରବଳ ଅସନ୍ତୋଷ ଦେଖାଦେଇଛି । ମଣ୍ଡଳୀରୁ ଆରମ୍ଭ କରି ଭୁବନେଶ୍ୱର ପର୍ଯ୍ୟନ୍ତ ଦଳୀୟ ମତଭେଦ ସାଂଘାତିକ ହୋଇଛି । ବର୍ଷ ବର୍ଷ ଧରି ଟିକେଟ ଆଶାରେ ପଡ଼ି ରହିଥିବା ନେତାମାନେ ନିରୁତ୍ସାହିତ ହୋଇପଡ଼ିଛନ୍ତି । ବୋଧହୁଏ ଧର୍ମେନ୍ଦ୍ର ନିଜ ଦଳର ଶକ୍ତି ନ ଥିବା ଅନୁଭବ କରି ଅନ୍ୟ ଦଳର ଶକ୍ତି ଆହରଣ କରିବାକୁ ଚାହିଁ ବସିଛନ୍ତି । ପ୍ରବଳ ଅର୍ଥ ବଳରେ ସେ ଅସମ୍ଭବକୁ ସମ୍ଭବ କରିବେ ବୋଲି ଯଦି ଭାବୁଥାଆନ୍ତି ତେବେ ତାହା ମରିଚିକା ସଦୃଶ ବୋଲି ଧରିନେବାକୁ ହେବ ।