ଭୁବନେଶ୍ୱର: ବରିଷ୍ଠ ନେତା ତଥା ବିଜୁ ଜନତା ଦଳର ପ୍ରତିଷ୍ଠାତା ସଭ୍ୟ ଦିଲ୍ଲୀପ ରାୟ ଆଜି ସଂଧ୍ୟାରେ ନବୀନ ନିବାସ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି । ପ୍ରାୟ ଅଧଘଣ୍ଟା ଧରି ଉଭୟଙ୍କ ମଧ୍ୟରେ ଆଲୋଚନା ହେବା ପରେ ନବୀନ ନିବାସ ଛାଡ଼ିଥିଲେ ଦିଲ୍ଲୀପ ରାୟ । ଆସନ୍ତାକାଲି ଦିଲ୍ଲୀପ ବିଧିବଦ୍ଧ ଭାବେ ବିଜୁ ଜନତା ଦଳକୁ ଫେରିଆସିବେ ବୋଲି ସୂଚନା ମିଳିଛି । ନବୀନ ନିବାସକୁ ଦିଲ୍ଲୀପ ଆସିଥିବା ଖବର ପ୍ରଚାରିତ ହେଲା ପରେ ସେଠାରେ ତାଙ୍କ ସମର୍ଥକମାନଙ୍କର ଭିଡ଼ ଜମିଥିଲା । ଦିଲ୍ଲୀପ ରାୟଙ୍କ ସମର୍ଥନରେ ସେମାନେ ଅତ୍ୟଧିକ ଉତ୍ସାହିତ ହୋଇ ସ୍ଲୋଗାନ ରେ ମାତିଯାଇଥିଲେ ।
ଆଜି ସଂଧ୍ୟା ପ୍ରାୟ ୭.୪୫ ମିନିଟ୍ ବେଳକୁ ନବୀନ ନିବାସକୁ ପ୍ରବେଶ କରିଥିଲା ବିଧାୟକ ପ୍ରଣବ ପ୍ରକାଶ ଦାସଙ୍କ ଗାଡ଼ି । ଗାଡ଼ି ଭିତରେ ଥିଲେ ଦିଲ୍ଲୀପ ରାୟ । ଦିଲ୍ଲୀପଙ୍କୁ ସାଙ୍ଗରେ ଧରି ପ୍ରଣବ ସିଧା ଯାଇଥିଲେ ସୁପ୍ରିମୋଙ୍କ ପାଖକୁ । ପୂର୍ବରୁ ସେଠାରେ ଉପସ୍ଥିତ ଥିଲେ ଦଳର ବରିଷ୍ଠ ନେତା ତଥା ମନ୍ତ୍ରୀ ବିକ୍ରମ କେଶରୀ ଆରୁଖ, ଅନଙ୍ଗ ଉଦୟ ସିଂହଦେଓ ଓ ପ୍ରସନ୍ନ ଆଚାର୍ଯ୍ୟ । କିଛି ସମୟ ପରେ ଶ୍ରୀ ସିଂହଦେଓ ଓ ପ୍ରସନ୍ନ ଆଚାର୍ଯ୍ୟ ନବୀନ ନିବାସରୁ ବାହାରି ଆସିଥିଲେ ମଧ୍ୟ ନବୀନଙ୍କ ସହ ଦିଲ୍ଲୀପଙ୍କ ଆଲୋଚନା ଜାରି ରହିଥିଲା । ପ୍ରାୟ ୮. ୪୦ ମିନିଟ୍ ବେଳକୁ ନବୀନ ନିବାସରୁ ବାହାରିଥିଲେ ଦିଲ୍ଲୀପ । ଆସନ୍ତାକାଲି ଦିଲ୍ଲୀପ ବିଧିବଦ୍ଧ ଭାବେ ବିଜେଡ଼ିରେ ଯୋଗଦେବେ ବୋଲି ସୂଚନା ମିଳିଛି । ତେବେ ଏ ସମ୍ପର୍କରେ ଦଳ ପକ୍ଷରୁ କେହି ସ୍ପଷ୍ଟ କରିନାହାନ୍ତି ।
ଅନ୍ୟପକ୍ଷରେ ବିଜୟ ମହାପାତ୍ରଙ୍କୁ ନେଇ ବି ଚର୍ଚ୍ଚା ଜୋର୍ ଧରିଛି । ଯେ କୌଣସି ମୁହୁର୍ତ୍ତରେ ସେ ବିଜେଡ଼ିକୁ ଫେରିପାରନ୍ତି ବୋଲି କୁହାଯାଉଛି ।
