ନିବେଶକଙ୍କୁ ନବୀନ ଦେଲେ ନିର୍ଭର ପ୍ରତିଶ୍ରୁତି

ପୁଞ୍ଜି ନିବେଶ ପାଇଁ ୱାନ୍ ଟୁ ୱାନ୍, ରୋଡ୍ ସୋ’

ମୁମ୍ବାଇ: ପୁଞ୍ଜି ନିବେଶ ପାଇଁ ଓଡ଼ିଶା ପ୍ରକୃଷ୍ଟ ସ୍ଥାନ । ଏଠାରେ ପର୍ଯ୍ୟାପ୍ତ ସୁଯୋଗ ରହିଛି । ଆଗ୍ରହୀ ନିବେଶକଙ୍କୁ ରାଜ୍ୟ ସରକାର ସବୁ ପ୍ରକାର ସୁବିଧା ସହଯୋଗ ଯୋଗାଇ ଦେବେ । ଦୃଢ଼ ପ୍ରତିଶ୍ରୁତି ସହ ଆଜି ମୁମ୍ବାଇରେ ଏମିତି ଭାଷାରେ ନିବେଶକଙ୍କୁ ନିମନ୍ତ୍ରଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆସନ୍ତା ନଭେମ୍ବର ୧୧ରୁ ୧୫ ତାରିଖ ଯାଏଁ ଭୁବନେଶ୍ୱରରେ ହେବାକୁ ଥିବା ‘ମେକ୍ ଇନ୍ ଓଡ଼ିଶା’ କନକ୍ଲେଭ୍ ରେ ଯୋଗଦେବାକୁ ମୁଖ୍ୟମନ୍ତ୍ରୀ ଏହି ନିମନ୍ତ୍ରଣ କରିଛନ୍ତି । ଏଥିସହ ମୁଖ୍ୟମନ୍ତ୍ରୀ ପୁଞ୍ଜି ନିବେଶକଙ୍କ ସହ ୱାନ୍ ଟୁ ୱାନ୍ ଆଲୋଚନା କରିଥିଲେ । ରୋଡ୍ ସୋ’ କରିଥିଲେ । ଏହି ଅବସରରେ ମୁଖ୍ୟମନ୍ତ୍ରୀ ‘ମେକ୍ ଇନ୍ ଓଡ଼ିଶା’ ଦ୍ୱିତୀୟ କନକ୍ଲେଭ୍ ର ଥିମ୍ “ଆଇ ଆମ୍ ଓଡ଼ିଶା” ଅଭିଯାନର ଶୁଭାରମ୍ଭ କରିଥିଲେ ।

ନିବେଶକଙ୍କ ସମ୍ମିଳନୀରେ ଉଦବୋଧନ ଦେଇ ମୁଖ୍ୟମନ୍ତ୍ରୀ କହିଥିଲେ, ଓଡ଼ିଶା ପୁଞ୍ଜି ନିବେଶ ପାଇଁ ପ୍ରକୃଷ୍ଟ ସ୍ଥାନ । ଶିଳ୍ପ ପାଇଁ ଏଠାରେ ପର୍ଯ୍ୟାପ୍ତ ସୁଯୋଗ ରହିଛି । ଓଡ଼ିଶା ହେଉଛି ଇଷ୍ଟର୍ଣ୍ଣ ଗେଟ୍ ୱେ ଅଫ ଇଣ୍ଡିଆ । ଇଷ୍ଟର୍ଣ୍ଣ ଇଣ୍ଡିଆର ମ୍ୟାନଫ୍ୟାକଚରିଂ ହବ୍ ଭାବେ ଏହା ଛିଡ଼ା ହେଲାଣି । ପ୍ରାକୃତିକ ସମ୍ପଦଠାରୁ ଆରମ୍ଭ କରି ପାଣି, ବିଜୁଳି କେଉଁଥିରେ ଅଭାବ ନାହିଁ । ଓଡ଼ିଶାରେ ଦକ୍ଷ ମାନବ ସମ୍ବଳ ରହିଛି । ସଡ଼କ ସଂଯୋଗ ତଥା ମାଲ ପରିବହନ ପାଇଁ ପାରାଦ୍ୱୀପ ଓ ଧାମରା ଭଳି ବୃହତ୍ତ ବନ୍ଦର ସୁବିଧା ରହିଛି । ଦେଶର ଶ୍ରେଷ୍ଠ ୫୦ଟି ସ୍ମାର୍ଟ ସିଟି ଭିତରେ ଭୁବନେଶ୍ୱର ଏକ ନମ୍ବର ସ୍ଥାନରେ ଅଛି । ଷ୍ଟାର୍ଟ ଅପ୍ ଓଡ଼ିଶା ସଫଳତା ଲାଭ କରିଛି । ଅଳ୍ପ ସମୟ ମଧ୍ୟରେ ୨୫୦ ଷ୍ଟାର୍ଟ ଅପ୍ ପଞ୍ଜୀକୃତ ହୋଇଛି । ୨୦୨୦ ସୁଦ୍ଧା ୩ଟି ଷ୍ଟାର୍ଟ ଅପ୍ ରାଜ୍ୟ ଭିତରେ ଓଡ଼ିଶା ରହିବାକୁ ଯାଉଛି ।

‘ମେକ୍ ଇନ ଓଡ଼ିଶା’ କନକ୍ଲେଭ୍ ପ୍ରଥମ ସଂସ୍କରଣର ସଫଳତା ସମ୍ପର୍କରେ ମୁଖ୍ୟମନ୍ତ୍ରୀ ଅବତାରଣା କରିଥିଲେ । ସେଥିରେ ୨ ଲକ୍ଷ କୋଟିରୁ ଅଧିକ ଟଙ୍କାର ପୁଞ୍ଜି ବିନିଯୋଗ ପ୍ରସ୍ତାବ ଆସିଥିଲା । ୬୫ ପ୍ରତିଶତ ପ୍ରକଳ୍ପ କାର୍ଯ୍ୟ ଆଗେଇ ଚାଲିଥିବା ମୁଖ୍ୟମନ୍ତ୍ରୀ ସୂଚନା ଦେଇଥିଲେ । ଆଗାମୀ ଦିନରେ ଓଡ଼ିଶାରେ ପୁଞ୍ଜି ନିବେଶ ପାଇଁ ନିବେଶକଙ୍କୁ ସମସ୍ତ ସୁବିଧା ଯୋଗାଇବାକୁ ମୁଖ୍ୟମନ୍ତ୍ରୀ ଦୃଢ଼ ପ୍ରତିଶ୍ରୁତି ଦେଇଥିଲେ ।

ଅନ୍ୟମାନଙ୍କ ମଧ୍ୟରେ ଶିଳ୍ପମନ୍ତ୍ରୀ ଅନନ୍ତ ଦାସ, ଶିଳ୍ପ ସଚିବ ସଞ୍ଜିବ ଚୋପ୍ରା, ଦକ୍ଷତା ଉନ୍ନୟନ କର୍ତ୍ତୃପକ୍ଷ ଅଧ୍ୟକ୍ଷ ସୁବ୍ରତ ବାଗଚୀ ପ୍ରମୁଖ ଉପସ୍ଥିତ ଥିଲେ । ଦୁଇଦିନିଆ ମୁମ୍ବାଇ ଗସ୍ତ ସାରି ଆଜି ସଂଧ୍ୟାରେ ମୁଖ୍ୟମନ୍ତ୍ରୀ ଭୁବନେଶ୍ୱର ଫେରିବେ ।