ଭୁବନେଶ୍ୱରର ସୂର୍ଯ୍ୟନଗର ଅଞ୍ଚଳ ସିଲ୍, ପ୍ରବେଶ କଟକଣା
ଭୁୁବନେଶ୍ୱର: ଗତକାଲି ଚିହ୍ନଟ ପଞ୍ଚମ କରେନା ଆକ୍ରାନ୍ତଙ୍କ ପରିଚୟକୁ ପ୍ରଥମ ଥର ପାଇଁ ସାର୍ବଜନୀନ କରିଛି ବିଏମସି । ଜନହିତ ପାଇଁ ପରିଚୟ ଜଣାଇବା ଜରୁରୀ ଦର୍ଶାଇ ଆଜି ସଂଧ୍ୟାରେ ଏକ ସାମ୍ବାଦିକ ସମ୍ମିଳନୀରେ ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ ଆକ୍ରାନ୍ତଙ୍କ ପରିଚୟ ପ୍ରକାଶ କରିଛନ୍ତି ।
ଆକ୍ରାନ୍ତ ବ୍ୟକ୍ତିଙ୍କ ନାଁ ପ୍ରଦୀପ୍ତ ଦଳବେହେରା । ଘର ସୂର୍ଯ୍ୟନଗର ପ୍ଲଟ୍ ନଂ-୩୭, ୟୁନିଟ୍-୭ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ସଂପୃକ୍ତ ବ୍ୟକ୍ତି ବିଦେଶ ଯାଇ ନ ଥିଲେ କି ଅନ୍ୟ କୌଣସି ରାଜ୍ୟ ଗସ୍ତ କରିନାହାନ୍ତି । ସୁତରାଂ ଭୁବନେଶ୍ୱରରେ ରହି ହିଁ ସଂକ୍ରମଣର ଶିକାର ହୋଇଛନ୍ତି ।
ଆକ୍ରାନ୍ତଙ୍କ ପରିଚୟ ଜଣାଇବା ସହ ସୂର୍ଯ୍ୟନଗର ଅଞ୍ଚଳକୁ ସିଲ୍ କରିଦିଆଯାଇଛି । ସ୍ଥାନୀୟ ଅଞ୍ଚବାସୀ ଘରୁ ବାହାରକୁ ଯାଇପାରିବେ ନାହିଁ କି କେହି ଅଞ୍ଚଳକୁ ଆସିପାରିବେ ନାହିଁ । ଗୋପବନ୍ଧୁ ଛକରୁ ଏଲଆଇସି ଛକ, ଏଲଆଇସି ଛକରୁ ଗଙ୍ଗନଗର ଛକ, ଗଙ୍ଗନଗର ଛକରୁ ଶିରିପୁର ଛକ ଏବଂ ଶିରିପୁର ଛକରୁ ଗୋପବନ୍ଧୁ ଛକ ରାସ୍ତାକୁ ସିଲ୍ କରାଯାଇଛି । ସଂପୃକ୍ତ ଅଞ୍ଚଳର ସମସ୍ତ ପ୍ରବେଶ ଓ ପ୍ରସ୍ଥାନ ରାସ୍ତାକୁ ବନ୍ଦ କରାଯାଇ ଅନ୍ୟାଦେଶ ପର୍ଯ୍ୟନ୍ତ ନିଷିଦ୍ଧାଞ୍ଚଳ ଘୋଷଣା କରାଯାଇଛି । ବିଏମସି ପକ୍ଷରୁ ସ୍ଥାନୀୟ ଅଞ୍ଚଳବାସୀଙ୍କୁ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଯୋଗାଇ ଦେବାର ବ୍ୟବସ୍ଥା କରାଯାଇଛି । ଡାକ୍ତରୀ ଟିମ୍ ଘରକୁ ଘର ବୁଲି ସ୍ୱାସ୍ଥ୍ୟ ସମସ୍ୟା ବୁଝିବେ । ଲୋକମାନେ ଆତଙ୍କିତ ନହୋଇ ସତର୍କ ରହିବାକୁ ବିଏମସି କମିଶନର ଅନୁରୋଧ କରିଛନ୍ତି ।
ଯେଉଁମାନେ ଆକ୍ରାନ୍ତଙ୍କ ସଂସ୍ପର୍ଶରେ ଆସିଛନ୍ତି ସେମାନେ ହୋମ୍ କ୍ୱାରେଣ୍ଟାଇନ୍ ରେ ରହିବାକୁ କୁହାଯାଇଛି । ୧୦୪ ନମ୍ବର ଯୋଗେ ରେଜିଷ୍ଟ୍ରି କରି ୧୪ ଦିନ ହୋମ୍ କ୍ୱାରେଣ୍ଟାଇନ୍ ରେ ରହନ୍ତୁ । କିଛି ଲକ୍ଷଣ ଦେଖାଗଲେ ସରକାରୀ ନିୟମ ଅନୁଯାୟୀ କାର୍ଯ୍ୟ କରିବାକୁ ବିଏମସି କମିଶନର ପରାମର୍ଶ ଦେଇଛନ୍ତି ।
