ପୁରୀ: ପୁରୀକୁ ବିଶ୍ୱ ଐତିହ୍ୟ ନଗରୀରେ ପରିଣତ କରିବା ପାଇଁ ରାଜ୍ୟ ସରକାରଙ୍କ ପଦକ୍ଷେପକୁ ବଡ଼ ସମର୍ଥନ ମିଳିଛି । ଆଜି ପୁରୀ ପରିଦର୍ଶନରେ ଆସିଥିବା ସୁପ୍ରିମକୋର୍ଟଙ୍କ ପ୍ରତିନିଧି ତଥା ଆମିକସ୍ କ୍ୟୁରି ରଞ୍ଜିତ୍ କୁମାର ବିଭିନ୍ନ ପକ୍ଷଙ୍କ ସହ ଆଲୋଚନା କରିବା ପରେ ରାଜ୍ୟ ସରକାରଙ୍କ ପଦକ୍ଷେପକୁ ନେଇ ଖୁସି ହୋଇଛନ୍ତି । ପୁରୀ ସହରର ସର୍ବାଙ୍ଗୀନ ବିକାଶ କରି ଏହାକୁ ବିଶ୍ୱ ଐତିହ୍ୟ ଭାବେ ଗଢ଼ି ତୋଳିବାକୁ ରାଜ୍ୟ ସରକାର ଠିକଣା ପଦକ୍ଷେପ ନେଇଥିବା ସେ ଯୁକ୍ତି ଦର୍ଶାଇଛନ୍ତି । ଶ୍ରୀଜଗନ୍ନାଥ ମନ୍ଦିର ଚତୁଃପାଶ୍ୱର୍ରେ ଉଚ୍ଛେଦ ପ୍ରକ୍ରିୟାକୁ ସମର୍ଥନ କରିଛନ୍ତି ଆମିକସ୍ କ୍ୟୁରି ।
ଶ୍ରୀ କୁମାର କହିଛନ୍ତି, ମେଘନାଦ ପାଚେରିରୁ ୭୫ ମିଟର ଦୂରତାରେ ଥିବା ଜବରଦଖଲକୁ ଉଚ୍ଛେଦ କରାଯାଉଛି । ସେଥିପାଇଁ କାହାରିକୁ ବାଧ୍ୟ କରାଯାଉ ନାହିଁ । ସମସ୍ତଙ୍କ ସହ ଆଲୋଚନା ଏବଂ ଉପଯୁକ୍ତ କ୍ଷତିପୂରଣ ବ୍ୟବସ୍ଥା କରାଯାଇ ଏହି ବଡ଼ ପଦକ୍ଷେପ ନିଆଯାଇଛି । ଭବିଷ୍ୟତକୁ ଦୃଷ୍ଟିରେ ରଖି ସରକାର ଏଭଳି ଐତିହାସିକ ନିଷ୍ପତ୍ତି ନେଇଛନ୍ତି । ପୁରୀ ଜନସାଧାରଣ, ଶ୍ରୀମନ୍ଦିର ସେବକ ଏବଂ ଜଗନ୍ନାଥଙ୍କ ଦର୍ଶନ ପାଇଁ ଆସୁଥିବା ଭକ୍ତମାନଙ୍କ ସ୍ୱାର୍ଥକୁ ଆଖିରେ ରଖାଯାଇଛି । ଏହି ସୌନ୍ଦର୍ଯ୍ୟକରଣ ପ୍ରକ୍ରିୟା ଦ୍ୱାରା ଜଗନ୍ନାଥ ସଂସ୍କୃତି ସାରା ବିଶ୍ୱରେ ପ୍ରସାର ଲାଭ କରିବ ଏବଂ ଆଗକୁ ସମସ୍ତେ ଏହାର ସୁଫଳ ପାଇବେ ବୋଲି ଦୃଢ଼ୋକ୍ତି ପ୍ରକାଶ କରିଥିଲେ ଆମିକସ୍ କ୍ୟୁରି ।
