ଭୁୁବନେଶ୍ୱର: ଓଡ଼ିଶା ଆଉ ଜଣେ ସୁଦକ୍ଷ ମଣିଷଙ୍କୁ ହରାଇଛି । ଅବସରପ୍ରାପ୍ତ ଆଇଏଏସ୍ ପ୍ରିୟବ୍ରତ ପଟ୍ଟନାୟକ ଆଉ ନାହାନ୍ତି । ଲିଭର୍ କ୍ୟାନସର୍ ରେ ପୀଡ଼ିତ ଶ୍ରୀ ପଟ୍ଟନାୟକ ମୁମ୍ବାଇରେ ଚିକିତ୍ସିତ ହେଉଥିଲେ । ଆଜି ସକାଳେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ମୃତ୍ୟୁ ବେଳକୁ ୬୭ ବର୍ଷ ବୟସ ହୋଇଥିଲା । ତାଙ୍କର ନିଧନ ବିଭିନ୍ନ ମହଲରେ ଶୋକର ଛାୟା ଖେଳାଇ ଦେଇଛି ।
୧୯୭୬ ବ୍ୟାଚ୍ ର ଆଇଏଏସ୍ ଅଧିକାରୀ ଥିଲେ ପ୍ରିୟବ୍ରତ ପଟ୍ଟନାୟକ । ଚାକିରି ଜୀବନ କାଳରେ ଅନେକ ଗୁରୁତ୍ୱପୂର୍ଣ୍ଣ ପଦପଦବୀ ସମ୍ଭାଳିଥିଲେ । ତାଙ୍କର ଦକ୍ଷତା ଓ ଭିନ୍ନ କାର୍ଯ୍ୟଶୈଳୀ ପାଇଁ ସେ ବେଶ୍ ପରିଚିତ ଥିଲେ । ପାରମ୍ପରିକ କାର୍ଯ୍ୟଶୈଳୀଠାରୁ ସେ ନିଜକୁ ଅଲଗା ରଖୁଥିଲେ । ଯୋଜନା କାର୍ଯ୍ୟକାରିତାରେ ସେ ବେଶ୍ କଠୋର ଆଭିମୁଖ୍ୟ ରଖୁଥିଲେ । ଲୋକଙ୍କ ସମସ୍ୟା ଓ ଆପତ୍ତି ଅଭିଯୋଗକୁ ସବୁବେଳେ ପ୍ରାଧାନ୍ୟ ଦେଉଥିବା ଶ୍ରୀ ପଟ୍ଟନାୟକ କୌଣସି ରାଜନୈତିକ ଚାପର ବଶବର୍ତ୍ତୀ ହେଉ ନ ଥିଲେ । ସେଥିପାଇଁ ଅନେକ ସମୟରେ ବିବାଦ ଘେରରେ ରହୁଥିଲେ ।
ଓଡ଼ିଶାକୁ ଶିଳ୍ପାୟନରେ ଦ୍ରୁତ ପ୍ରଗତି ଆଣିବା ପାଇଁ ତାଙ୍କର ଉଦ୍ୟମ ଚିର ସ୍ମରଣୀୟ । ଚାକିରି ଜୀବନର ଶେଷରେ ମୁଖ୍ୟ ଶାସନ ସଚିବ ପାହ୍ୟାରେ ସେ ଇଡ଼କୋର ସିଏମଡି ଭାବେ କାର୍ଯ୍ୟ କରିଥିଲେ । ସେହି ସମୟରେ ଓଡ଼ିଶାକୁ ବଡ଼ ବଡ଼ ଶିଳ୍ପ ଆଣିବା ପାଇଁ ସେ ନିରନ୍ତର ଉଦ୍ୟମ କରିଥିଲେ । ଜଗତସିଂହପୁରରେ ପୋସ୍କୋ ପ୍ରକଳ୍ପ ପାଇଁ ତାଙ୍କର ପ୍ରବଳ ପ୍ରଚେଷ୍ଟା ଥିଲା । ଅବଶ୍ୟ ବିଭିନ୍ନ କାରଣରୁ ତାହା ହୋଇ ପାରି ନ ଥିଲା ।
ମୋଟାମୋଟି ଭାବେ ଜଣେ ଦକ୍ଷ ପ୍ରଶାସକ ଭାବେ ତାଙ୍କର ଏକ ସ୍ୱତନ୍ତ୍ର ପରିଚୟ ଥିଲା । କୌଣସି ଚାପ ଆଗରେ ମୁଣ୍ଡ ନୂଆଁଇ ହାର୍ ମାନିବା ଅଧିକାରୀ ନ ଥିଲେ ।
ଖାଲି ପ୍ରଶାସକ ନୁହଁନ୍ତି, ଜଣେ କ୍ରୀଡ଼ା ସଂଗଠକ ଭାବେ ତାଙ୍କର ଅଶେଷ ଖ୍ୟାତି ଥିଲା । ଓଡ଼ିଶା ଜୁଡୋ ଆସୋସିଏସନ୍ ର ସେ ସଭାପତି ଥିଲେ । ‘ଭୁବନେଶ୍ୱର କ୍ଲବ୍’ ପ୍ରତିଷ୍ଠା ତଥା ଏହାର ସଭାପତି ଭାବେ ତାଙ୍କର କାର୍ଯ୍ୟ ତରିକା ପ୍ରଶଂସନୀୟ ଥିଲା ।
ସ୍ୱର୍ଗତ ପଟ୍ଟନାୟକଙ୍କର ପତ୍ନୀ ବିଜେବି କଲେଜରେ ଅର୍ଥନୀତି ପ୍ରାଧ୍ୟାପିକା ଅଛନ୍ତି । ତାଙ୍କର ଦୁଇ ପୁଅ ଓ ଗୋଟିଏ ଝିଅ । ବଡ଼ପୁଅ ଓ ଝିଅ ଆମେରିକାରେ ରହୁଥିବା ବେଳେ ସାନପୁଅ ଏଠି ପାଠ ପଢ଼ୁଛନ୍ତି ।
ସ୍ୱର୍ଗତ ପଟ୍ଟନାୟକଙ୍କ ମରଶରୀର ଆସନ୍ତାକାଲି ଭୁବନେଶ୍ୱର ଅଣାଯାଇ ଶେଷକୃତ୍ୟ ସମ୍ପନ୍ନ ହେବ ବୋଲି ଜଣାପଡିଛି ।
