ଭୁବନେଶ୍ୱର: ବିଧାନସଭା ଟିକେଟ ଖଣ୍ଡିଏ ପାଇଁ ୩ କୋଟି ଲାଞ୍ଚ । ତେଲେଙ୍ଗାନାର ରାଙ୍ଗାରେଡି ଜିଲ୍ଲା ଇବ୍ରାହିମପଟ୍ଟନମ୍ ଆସନରୁ ନିର୍ବାଚନ ଲଢ଼ିବା ପାଇଁ କେ.ମାଲେସ୍ ଙ୍କୁ ୩ କୋଟି ଟଙ୍କା ମଗାଯାଇଥିଲା । ତେଲେଙ୍ଗାନା ପାଇଁ କଂଗ୍ରେସ ସ୍କ୍ରିନିଂ କମିଟି ମୁଖ୍ୟ ଥିବା ଓଡ଼ିଶାର ବରିଷ୍ଠ ନେତା ଭକ୍ତଚରଣ ଦାସ ତାଙ୍କ ପୁଅ ସାଗର ଜରିଆରେ ଏହି ଟଙ୍କା ଦାବି କରିଥିଲେ । ନିଜେ ମାଲେସ୍ ଏକ ସାମ୍ବାଦିକ ସମ୍ମିଳନୀ କରି ଏହି ଅଭିଯୋଗ ଆଣିବା ପରେ ଦେଶର କଂଗ୍ରେସ ରାଜନୀତିରେ ହଇଚଇ ସୃଷ୍ଟି ହୋଇଛି । ଭକ୍ତ ଦାସଙ୍କ ବିରୋଧରେ ଏହି ସଙ୍ଗୀନ ଅଭିଯୋଗ ଓଡ଼ିଶା କଂଗ୍ରେସକୁ ବେଶ୍ ଲଜ୍ଜିତ କରିଛି । ତେବେ ଭକ୍ତ ଏହି ଅଭିଯୋଗକୁ ଖଣ୍ଡନ କରିଛନ୍ତି ।
ଅଭିଯୋଗକାରୀ ମାଲେସ୍ ଜଣେ ଯାହି ତାହି ନେତା ନୁହଁନ୍ତି । ରାଙ୍ଗାରେଡି ଜିଲ୍ଲାର ସେ ହେଉଛନ୍ତି କଂଗ୍ରେସ ସଭାପତି । ସେ ଖାଲି ଅଭିଯୋଗ ଆଣିନାହାନ୍ତି ବରଂ ଭକ୍ତ ଦାସଙ୍କ ପୁଅ ସାଗର ସହ ଟଙ୍କା କାରବାର ନେଇ ହୋଇଥିବା କଥାବାର୍ତ୍ତାର ଅଡିଓ ଟେପ୍ ଜାରି କରି ପ୍ରମାଣ ଦେଖାଇଛନ୍ତି । ଏହା ସୋସିଆଲ୍ ମିଡ଼ିଆଠାରୁ ଆରମ୍ଭ କରି ଜାତୀୟ ଗଣମାଧ୍ୟମରେ ବେଶ୍ ଚର୍ଚ୍ଚାର ବିଷୟ ହୋଇଛି । କଂଗ୍ରେସରେ ଟିକେଟ ବିକ୍ରୀ ଅଭିଯୋଗ ଏକ ସାଧାରଣ କଥା । ଅତୀତରେ ଓଡ଼ିଶା ସମେତ ଅନ୍ୟ କିଛି ରାଜ୍ୟରେ କଂଗ୍ରେସର ଟିକେଟ ବିକ୍ରୀ ଅଭିଯୋଗ ହୋଇ ଆସୁଥିଲା । ଏବେ ଓଡ଼ିଶାର ବରିଷ୍ଠ ନେତାଙ୍କ ନାଁରେ ଟଙ୍କା ମାଗିବା ଅଭିଯୋଗ ରାଜ୍ୟ କଂଗ୍ରେସକୁ ବି ଭୀଷଣ ବଦନାମ କରିଛି ।
ଡିସେମ୍ବର ୭ ତାରିଖରେ ତେଲେଙ୍ଗାନାରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ରାଜ୍ୟରେ କଂଗ୍ରେସ ଟିକେଟ ବଣ୍ଟନରେ ବ୍ୟାପକ ଅନିୟମିତତା, ହେରଫେର ଓ ଅର୍ଥ କାରବାରର ଅଭିଯୋଗ ହୋଇଥିଲା । ଏବେ ଦଳୀୟ ଟିକେଟରୁ ବଂଚିତ ଜିଲ୍ଲା ସଭାପତି ମାଲେସ୍ ଅଡ଼ିଓ ଟେପ୍ ର ପ୍ରମାଣ ଧରି ପଦାକୁ ଆସିବା ଏହି ପ୍ରସଙ୍ଗକୁ ସଙ୍ଗୀନ ମୋଡ଼ ଦେଇଛି । ମାଲେସ୍ କହିଛନ୍ତି, ଇବ୍ରାହିମପଟ୍ଟନମ୍ ଆସନରୁ କଂଗ୍ରେସ ଟିକେଟ ପାଇଁ ସେ ମୁଖ୍ୟ ଦାବିଦାର ଥିଲେ । ହେଲେ ତାଙ୍କୁ ସେଥିପାଇଁ ୩ କୋଟି ଟଙ୍କା ଦେବାକୁ କୁହାଯାଇଥିଲା । ଏଆଇସିସି ସ୍କ୍ରିନିଂ କମିଟି ମୁଖ୍ୟ ଭକ୍ତ ଦାସଙ୍କ ପୁଅ ସାଗର ସେଥିପାଇଁ ମଧ୍ୟସ୍ଥତା କରିଥିଲେ । ତେବେ ସେ ଟଙ୍କା ଦେଇ ନ ପାରିବାରୁ ତାଙ୍କୁ ଟିକେଟ ମିଳିଲା ନାହିଁ ବୋଲି ଅଭିଯୋଗ କରିଛନ୍ତି ।
ତେବେ ମାଲେସ୍ ଙ୍କ ଅଭିଯୋଗକୁ ଭକ୍ତ ଦାସ ଖଣ୍ଡନ କରିଛନ୍ତି । ସେ କହିଛନ୍ତି ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ ଓ ସେଥିରେ କୌଣସି ସତ୍ୟତା ନାହିଁ । କେ. ମାଲେସ୍ ଆବେଦନ କରିଥିବା ଆସନଟି ମେଣ୍ଟ ସହଯୋଗୀଙ୍କୁ ଦିଆଯାଇଛି । କଂଗ୍ରେସ ନେତୃତ୍ୱର ନିଷ୍ପତ୍ତିକ୍ରମେ ଦଳ ନିର୍ବାଚନୀ ମେଣ୍ଟକୁ ଯାଇଛି । ସେଥିରେ ସ୍କ୍ରିନିଂ କମିଟି ଅଧ୍ୟକ୍ଷଙ୍କ କିଛି ଭୂମିକା ନାହିଁ । ତେଣୁ ସମସ୍ତେ ମିଶି ଷଡ଼ଯନ୍ତ୍ର କରିଛନ୍ତି । ମାଲେସ୍ ଟିକେଟ ପାଇ ନ ଥିବାରୁ ପୁଅକୁ ମୋହରା କରି ତାଙ୍କୁ ବଦନାମ କରୁଛନ୍ତି । ମେଣ୍ଟ ଆସନ ଭାଗବଣ୍ଟରା ଯୋଗୁଁ ଅନେକ ବରିଷ୍ଠ କଂଗ୍ରେସ ନେତାଙ୍କ ଟିକେଟ କଟିଛି । ତେଣୁ ସମସ୍ତେ ମିଶି ଷଡ଼ଯନ୍ତ କରିଛନ୍ତି । ଟିକେଟ ପାଇଁ କେହି ଯଦି ୫ ଟଙ୍କା ନେଇଥିବାର ପ୍ରମାଣ ଆସେ ତେବେ ସେ ରାଜନୀତି ଛାଡ଼ିବେ ବୋଲି ଭକ୍ତ କହିଛନ୍ତି ।
