ବାଟରେ ଯମଯନ୍ତ୍ରଣା ଭୋଗୁଛନ୍ତି ସୁରତ ଫେରନ୍ତା

ଭୁବନେଶ୍ୱର: ଜଣକେ ସାଢ଼େ ତିନି ହଜାର ଟଙ୍କା ଚାନ୍ଦା ଅସୁଲ କରି ସୁରତରୁ ୪ଟି ବସ୍ ରେ ଗଂଜାମ ନିଜ ଗାଁକୁ ଫେରୁଛନ୍ତି ୨୨୮ ଶ୍ରମିକ । ଆସନ୍ତାକାଲି ଦିନ ପ୍ରାୟ ୧୨ଟା ବେଳକୁ ଗାଁରେ ପହଞ୍ଚିବେ । ଲକ୍ ଡାଉନ୍ ଯନ୍ତ୍ରଣାରୁ ତ୍ରାହି ପାଇବେ । ରୋଜଗାର ନ ହେଉ ପଛେ ବାପା,ମାଆ, ସ୍ତ୍ରୀ, ପିଲାଙ୍କ ମୁହଁ ଚାହିଁ ବଞ୍ଚିଯିବେ । ତେବେ ଏହି ଫେରନ୍ତା ଯାତ୍ରାରେ ଖୁସି ତ ଅଛି ହେଲେ ଖୁସିଠାରୁ ଦହଗଂଜ ଆହୁରି ବଳିଯାଇଛି । ଆଈ ମା’ ଠାରୁ ଶୁଣିଥିବା ନର୍କପୁରୀର ଯମଯନ୍ତ୍ରଣାଠାରୁ ଅଧିକ ହୋଇଛି ଗାଁକୁ ଫେରିବାର ଯନ୍ତ୍ରଣା ।

ଗତକାଲି ସଂଧ୍ୟାରେ ସୁରତ୍ ଛାଡ଼ିଥିବା ଏହି ଶ୍ରମିକମାନେ ଅଧାବାଟ ପାର୍ କଲେଣି । ତେବେ ସେମାନଙ୍କର ଯାତ୍ରା ସଂଘର୍ଷପୂର୍ଣ୍ଣ ଓ ଭାରି କଷ୍ଟଦାୟକ ହୋଇଛି । ବସ୍ ରେ ଆସୁଥିବା ଶେରଗଡ଼ ବ୍ଲକ୍ ଅନ୍ତର୍ଗତ ବରଗଡ଼ ଗାଁର ନୀଳାଚଳ ରାଉତଙ୍କ କହିବାନୁଯାୟୀ, କାଲି ସଂଧ୍ୟାରେ ସୁରତ୍ ଛାଡ଼ିଲା ବେଳେ ଯେତିକି ଖାଇଥିଲୁ ସେତିକି । ବାଟସାରା କେଉଁଠି ଖାଇବାକୁ ମିଳୁନି । ପିଇବାକୁ ପାଣି ବି ମିଳୁନି । ରାସ୍ତାର କିଛି ଜାଗାରେ ଗାଁ ନଳକୂଅରୁ ପାଣି ଆଣିବାକୁ ଚେଷ୍ଟା କରିଥିଲୁ । ମାତ୍ର ଗାଁ ଲୋକେ ଘଉଡାଇ ଦେଲେ । କରୋନା ଡରରେ ଲୋକେ ସବୁଠି ଛେଇ ଛେଇ ମାର୍ ମାର୍ କରୁଥିବାରୁ ବାହାରୁ ଜିନିଷ ଦେଖିଲେ ବି ଆଣି ପାରୁନାହୁଁ ।

ଖାଇବା, ପିଇବା କଥା ଛାଡ଼ନ୍ତୁ ଆଜ୍ଞା । ଲୋକଙ୍କ ଆକଟ ଏବଂ ପାଣି ଅଭାବ ଯୋଗୁଁ ଝାଡା, ପରିତ୍ସା ବି କରିପାରୁନାହୁଁ । ଗାଡ଼ି ରଖି ତଳକୁ ଓହ୍ଲାଇବା କଷ୍ଟକର ହେଉଛି । ଆଜି ସକାଳେ ଗୋଟେ ଜାଗାରେ ଚଢ଼ା ଦରରେ ପାଣି ବିକ୍ରୀ ହେଉଥିଲା । ୧୦ଟା ଖଣ୍ଡେ ବଟଲ୍ କିଣିଥିଲୁ । ସେଥିରେ ଦିନସାରା ଗଲାଣି । ଝାଡା ଯିବାକୁ ହେଲେ ସେହି କିଣା ବଟଲ୍ ରେ ପାଣି ସାରିବାକୁ ପଡୁଛି । ଅନ୍ୟ କିଛି ଉପାୟ ନାହିଁ ।

ଆଜ୍ଞା, କାହାରି ପାଖରେ ପଇସାପତ୍ର ନାହିଁ । କମ୍ପାନୀ ଉପରେ ଦେଢ଼ମାସର ପଇସା ବାକି ଅଛି । ଧାର ଉଧାର ମାଗିଯାଚି ବସ୍ ଖର୍ଚ୍ଚ ପାଇଁ ସାଢ଼େ ତିନି ହଜାର ଯୋଗାଡ଼ କରିଛୁ । ହାତଖର୍ଚ୍ଚ ପାଇଁ କାହା କାହା ପାଖରେ ବେଶୀ ହେଲେ ଶହେ ଦୁଇ ଶହ ଥିଲା । ପାଣି କିଣାରେ ସେ ପଇସା ବି ସରିଲାଣି । ଖାଇବା ପାଇଁ କେଉଁଠି ମିଳିଲେ ବି ପଇସା ନାହିଁ । ଭୋକରେ ସମସ୍ତେ ଆଉଟୁ ପାଉଟୁ ହେଲେଣି । ହେଲେ ବାଟ କିଛି ନାହିଁ ।

ସେମାନଙ୍କର ଏହି ଦୁର୍ଦ୍ଦଶା ପାଇଁ ଗୁଜୁରାଟ, ଓଡ଼ିଶା,କେନ୍ଦ୍ର ସରକାରଙ୍କୁ ଗାଳି କରିଛନ୍ତି ଅଧିକାଂଶ ଶ୍ରମିକ । ଆମେମାନେ ନିଜ ଖର୍ଚ୍ଚରେ ଭିଟାମାଟି ଫେରୁଥିଲେ ବି କୌଣସି ସରକାର ଦାୟିତ୍ୱ ନେଇନାହାନ୍ତି । ଖାଲି ଗାଡ଼ି ପରିମିଟ୍ କୁ ଛାଡ଼ିଦେଲେ ଆଉ କିଛି ନାହିଁ । କେମିତି ଖାଇବୁ, ପିଇବୁ କାହାର ଚିନ୍ତା ହେଲାନି ବୋଲି ଦୁଃଖର ସହ ଆମ ପ୍ରତିନିଧିଙ୍କୁ କହିଛନ୍ତି ନୀଳାଚଳ ଏବଂ ଶେରଗଡ ବ୍ରାହ୍ମଣଛାଇ ଗାଁର ସନ୍ତୋଷ ।

ତେବେ ଏସବୁ ଯନ୍ତ୍ରଣାକୁ ଧରି ସେମାନେ ଓଡ଼ିଶାକୁ ଅଗ୍ରସର ହେଉଥିବା ବେଳେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିଷ୍ପତ୍ତି ତାଙ୍କ ପାଖରେ ପହଞ୍ଚିଛନ୍ତି । ସୂଚନାଯୋଗ୍ୟ, ଓଡ଼ିଶାକୁ ଫେରୁଥିବା ସବୁ ଯୋଗ୍ୟ ଶ୍ରମିକମାନେ ଯେପରି ଖାଦ୍ୟ ସୁରକ୍ଷାରୁ ବଞ୍ଚିତ ନ ହୁଅନ୍ତି ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଛନ୍ତି । ରାସନ୍ କାର୍ଡ ଥାଉ କି ନ ଥାଉ, ଏହି ଶ୍ରମିକ ଓ ତାଙ୍କ ପରିବାରକୁ ରାସନ୍ ଦେବା ପାଇଁ ଜିଲ୍ଲା କୋଭିଡ୍ ପର୍ଯ୍ୟବେକ୍ଷକମାନଙ୍କୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ସେହିପରି ନରେଗା ଜରିଆରେ ସୃଷ୍ଟି ହେଉଥିବା ୫ ଲକ୍ଷ ମାନବ ଦିବସକୁ ଦୁଇଗୁଣ କରି ଆଗାମୀ ସପ୍ତାହ ସୁଦ୍ଧା ଦୈନିକ ୧୦ ଲକ୍ଷ ମାନବ ଦିବସକୁ ବୃଦ୍ଧି କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ଦ୍ୱାରା ବାହାର ରାଜ୍ୟରୁ ଫେରୁଥିବା ଏହି ଶ୍ରମିକମାନେ ନରେଗା କାମ ପାଇବେ, ରାସନ୍ ପାଇବେ ଏବଂ ପରିବାର ଚଳାଇବେ ବୋଲି ଆଶା ବାନ୍ଧିଛନ୍ତି ।

ସୂଚନା ଥାଉକି, ବାହାର ରାଜ୍ୟରେ ଫସି ରହିଥିବା ଓଡ଼ିଆ ଶ୍ରମିକମାନଙ୍କୁ ଓଡ଼ିଶା ଫେରାଇ ଆଣିବାକୁ ସରକାର ପଦକ୍ଷେପ ନେଇଛନ୍ତି । ଦୁଇଦିନ ତଳେ ଗୁଜୁରାଟ ଏବଂ ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଥାବାର୍ତା କରି ସେମାନଙ୍କ ରାଜ୍ୟରେ ଥିବା ଓଡ଼ିଆ ଶ୍ରମିକଙ୍କୁ ନିରାପଦରେ ଫେରାଇ ଆଣିବାକୁ କହିଥିଲେ । ସରକାରୀସ୍ତରରେ ଏହାର ସଜବାଜ ଆରମ୍ଭ ହୋଇଥିବା ବେଳେ ଫସି ରହିଥିବା ଶ୍ରମିକମାନେ କିନ୍ତୁ ଧୈର୍ଯ୍ୟହରା ହୋଇଛନ୍ତି । ନିଜ ଖର୍ଚ୍ଚରେ ଫେରି ଆସିବାକୁ ବ୍ୟାକୁଳ ହୋଇଛନ୍ତି ।

ପୂର୍ବରୁ, ପ୍ରବାସୀ ଓଡ଼ିଆଙ୍କ ପାଇଁ ରେଜିଷ୍ଟ୍ରେସନ୍ ବାଧ୍ୟତାମୂଳକ କରାଯାଇଛି । ରେଜିଷ୍ଟ୍ରେସନ୍ କରି ଓଡ଼ିଶା ଫେରିବା ପରେ ନିଜ ପଞ୍ଚାୟତରେ ସେମାନଙ୍କୁ କ୍ୱାରେଣ୍ଟାଇନ୍ ରେ ରଖାଯିବ । ଏଥିପାଇଁ ସବୁ ଖର୍ଚ୍ଚବାଚ ସରକାର ବହନ କରିବେ । ଏହାବାଦ୍ ଜଣପିଛା ୨ ହଜାର ଟଙ୍କା ଦେବାକୁ ମଧ୍ୟ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ସରପଞ୍ଚଙ୍କୁ ଜିଲ୍ଲାପାଳ କ୍ଷମତା ଦେଇ ଏହାର ବନ୍ଦୋବସ୍ତ କରିଛନ୍ତି ।

ଏହି ଘୋଷଣାର ୪୮ ଘଣ୍ଟା ମଧ୍ୟରେ ୪ ଲକ୍ଷ ୮୬ ହଜାର ଲୋକ ରେଜିଷ୍ଟ୍ରେସନ୍ କରି ଓଡ଼ିଶା ଫେରିବାକୁ ଅପେକ୍ଷାରେ ରହିଲେଣି । ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ ଗତକାଲି ଏହି ସୂଚନା ଦେଇଥିଲେ । ଏହି ସଂଖ୍ୟା ଯଥେଷ୍ଟ ବଢ଼ିପାରେ ବୋଲି ଅନୁମାନ କରାଯାଉଛି । ତେବେ ଏତେ ସଂଖ୍ୟକ ପ୍ରବାସୀଙ୍କୁ ସାମାଜିକ ଦୂରତ୍ୱ ଗାଇଡଲାଇନ୍ ଭିତରେ କିଭଳି ରାଜ୍ୟକୁ ଫେରାଇ ଅଣାଯିବ ତାହା ସମସ୍ତଙ୍କ ପାଇଁ ଚିନ୍ତାର ବିଷୟ । ପରିସ୍ଥିତି ଏଭଳି ଯେ କାହାରିକୁ ଦୋଷ ବି ଦେଇହେବନି । କରୋନା ଯୋଗୁଁ ସୃଷ୍ଟି ହୋଇଥିବା ଏଭଳି ଅସାଧାରଣ ପରିସ୍ଥିତିର ଅସାଧାରଣ ସମାଧାନ କ’ଣ ତାହା ବୁଝି ହେଉନାହିଁ ।