ଭୁବନେଶ୍ୱର: ନବୀନ ସରକାର ମହିଳାମାନଙ୍କୁ ସୁରକ୍ଷା ଦେବାରେ ବିଫଳ ହୋଇଛନ୍ତି । ପିପିଲି ବେବିନା ଗଣଦୁଷ୍କର୍ମ ମାମଲାରେ ଅଭିଯୁକ୍ତମାନେ ନିଦେ୍ର୍ଦାଷରେ ଖଲାସ ହୋଇଛନ୍ତି । ପୁଲିସ ଓ କ୍ରାଇମବ୍ରାଞ୍ଚକୁ ହାତବାରିସୀ କରି ସରକାର ଅପରାଧୀଙ୍କୁ ସୁରକ୍ଷା ଦେଉଛନ୍ତି । ରାଜ୍ୟ ସରକାରଙ୍କ ବିରୋଧରେ ଏହି ସଙ୍ଗୀନ ଅଭିଯୋଗ ଧରି ବିଜେପି ମହିଳା ମୋର୍ଚ୍ଚା ଆଜି ଭୁବନେଶ୍ୱର ରାଜରାସ୍ତାରେ ବଳ ଦେଖାଇଛି । ମହିଳାଙ୍କୁ ସୁରକ୍ଷା ଓ ବେବିନା ଗଣଦୁଷ୍କର୍ମ ମାମଲାର ସିବିଆଇ ତଦନ୍ତ ଦାବିରେ ମୋର୍ଚ୍ଚାର ନେତ୍ରୀ ଓ କର୍ମୀମାନେ ଲାଲଚୁଡ଼ି ରାଲିରେ ଯାଇ ସଚିବାଳୟଙ୍କୁ ଧସେଇ ପଶିବାକୁ ଉଦ୍ୟମ କରିଥିଲେ । ମୁଖ୍ୟମନ୍ତ୍ରୀଙ୍କୁ ଲାଲଚୁଡ଼ି ପ୍ରଦାନ କରିବାକୁ ସେମାନଙ୍କ ଯୋଜନା ଥିଲା । ପୁଲିସ ସେମାନଙ୍କୁ ଅବରୋଧ କରିବାରୁ ଉଭୟ ପକ୍ଷ ମଧ୍ୟରେ ଠେଳାପେଲା, ଧସ୍ତାଧସ୍ତି ହୋଇଥିଲା ।
ବିଜେପି ମହିଳା ମୋର୍ଚ୍ଚା ପକ୍ଷରୁ ଆଜି ନବୀନ ନିବାସ ଘେରାଉ କାର୍ଯ୍ୟକ୍ରମ ଘୋଷଣା କରାଯାଇଥିଲା । ମୁଖ୍ୟମନ୍ତ୍ରୀଙ୍କୁ ଲାଲଚୁଡ଼ି ପିନ୍ଧାଇବେ ବୋଲି କୁହାଯାଇଥିଲା । ଏହାକୁ ଦୃଷ୍ଟିରେ ରଖି ନବୀନ ନିବାସ ଆଖପାଖର ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିଲା । ତେବେ ମହିଳା ମୋର୍ଚ୍ଚା କର୍ମୀମାନେ ପୁଲିସକୁ ଚକମା ଦେଇ ବିଜେପି ଅଫିସରୁ ମାଷ୍ଟରକ୍ୟାଣ୍ଟିନ୍ ହୋଇ ପିଏମଜି ଯାଇଥିଲେ । ସେଠାରେ ପୁଲିସ ସେମାନଙ୍କୁ କର୍ଡନ କରି ଅଟକାଇବା ବେଳେ ଆଉ କିଛି କର୍ମୀ ସିଧା ସଚିବାଳୟ ରାସ୍ତା ଧରିସାରିଥିଲେ । ସଚିବାଳୟ ୪ ନମ୍ବର ଗେଟ୍ ଦେଇ ଭିତରକୁ ପଶିବାକୁ ଉଦ୍ୟମ କରିବାରୁ ପୁଲିସ ସହ ଧସ୍ତାଧସ୍ତି ହୋଇଥିଲା ।
ଆଜିର ବିକ୍ଷୋଭ ବେଳେ ପୁଲିସ ହିଂସ୍ର ପରାୟଣ ହୋଇ ମହିଳାମାନଙ୍କ ଉପରେ ଆକ୍ରମଣ କରିଛି ବୋଲି ମୋର୍ଚ୍ଚା ସଭାନେତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଅଭିଯୋଗ କରିଛନ୍ତି । ପୂର୍ବ ସୂଚନା ଥାଇ ବି ପୁଲିସ ଆବଶ୍ୟକ ସଂଖ୍ୟକ ମହିଳା ପୁଲିସକୁ ନିୟୋଜିତ କରି ନ ଥିଲା । ପୁରୁଷ ପୁଲିସ ଲଗାଇ ମହିଳାମାନଙ୍କ ଉପରେ ଆକ୍ରମଣ କରିଥିଲା । ମହିଳା ଜାତିଙ୍କୁ ଅସମ୍ମାନିତ ଓ ଅପମାନିତ କରାଯାଇଛି ବୋଲି ସେ ଅଭିଯୋଗ କରିଛନ୍ତି ।
