ଭୁବନେଶ୍ୱର: ମହାନ୍ ରାଷ୍ଟ୍ରନେତା ଅଟଳ ବିହାରୀ ବାଜପେୟୀଙ୍କ ବିୟୋଗରେ ସାରା ଦେଶ ଶୋକରେ ବୁଡ଼ିଥିବା ବେଳେ ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ଏକ ଟୁଇଟ୍ ଅନେକଙ୍କୁ ଆଘାତ ଦେଇଛି । ଖାଲି ରାଜ୍ୟ ନୁହେଁ ରାଜ୍ୟ ବାହାରୁ ମଧ୍ୟ ବୈଜୟନ୍ତଙ୍କୁ ଭର୍ତ୍ସନା କରାଯାଇଛି । ବାଜପେୟୀଙ୍କ ମୃତ୍ୟୁରେ ଗତକାଲି ବୈଜୟନ୍ତ ଟୁଇଟ୍ କରିଥିଲେ-ଅଟଳ ବିହାରୀ ବାଜପେୟୀ ସଦାସର୍ବଦା ମୋର ଆଦର୍ଶ ଥିଲେ । କିନ୍ତୁ ଲମ୍ବା ସମୟ ଧରି ସେ ‘ଭୁଲ ଦଳରେ ଠିକ୍ ମଣିଷ’ ଥିଲେ । ଅର୍ଥାତ୍ ବାଜପେୟୀଙ୍କ ବିଜେପିକୁ ବୈଜୟନ୍ତ ଭୁଲ୍ ଦଳ ବୋଲି ଦର୍ଶାଇଥିଲେ ।
ବୈଜୟନ୍ତଙ୍କ ଏହି ଟୁଇଟ୍ ର ସାଂଘାତିକ ପ୍ରତିକ୍ରିୟା ଦେଖିବାକୁ ମିଳିଛି । ଶ୍ରୀବତ୍ସ ମାଧବନ୍ ରିଟୁଇଟ୍ କରି କହିଛନ୍ତି, ପଣ୍ଡାଜୀ, ଅଟଳଜୀ ତାଙ୍କ ନିଜ ପସନ୍ଦରେ ଦଳ ତିଆରି କରିଥିଲେ, ତାକୁ ପାଳିଥିଲେ । ଦୟାକରି ତାଙ୍କୁ ଭୁଲ୍ ଦଳରେ ଠିକ୍ ଲୋକ ବୋଲି କୁହନ୍ତୁନୁ । ଏମିତି କହି ଆପଣ ଅଟଳଜୀଙ୍କ ମୃତ୍ୟୁ ପରେ ତାଙ୍କୁ ଅପମାନିତ କରନ୍ତୁ ନାହିଁ । ଏ.କେ.ପୀତାମ୍ବରନ୍ ବୈଜୟନ୍ତଙ୍କ ମନ୍ତବ୍ୟକୁ ରୁକ୍ଷ ଓ ଅପରିପକ୍ୱ ବୋଲି ଲେଖିଛନ୍ତି । ସତ୍ୟନାରାୟଣ ସାମନ୍ତ ନାମକ ଜଣେ ବ୍ୟକ୍ତି ବୈଜୟନ୍ତଙ୍କୁ ଏଭଳି ଅଯାଚିତ ଟୁଇଟ୍ ତୁରନ୍ତ ପ୍ରତ୍ୟାହାର ପାଇଁ ତାଗିଦ୍ କରିଛନ୍ତି । ବାଜପେୟୀଜୀ ଖାଲି ଆପଣଙ୍କର ଆଦର୍ଶ ନୁହଁନ୍ତି, ସେ ସମସ୍ତଙ୍କ ପାଇଁ ଆଦର୍ଶ । ବିଜେପିକୁ ଗଢ଼ିଥିବା ବାଜପେୟୀଜୀଙ୍କୁ ଆପଣ ଭୁଲ୍ ଦଳରେ ଠିକ୍ ବୋଲି କେମିତି କହିବାକୁ ସାହାସ କଲେ ବୋଲି ସେ ପ୍ରଶ୍ନ କରିଛନ୍ତି । ସତୀଶ. ଜି ନାମକ ଜଣେ ବ୍ୟକ୍ତି କହିଛନ୍ତି, ବାଜପେୟୀ କେବେ ହେଲେ ନିଜକୁ ଭୁଲ୍ ଦଳରେ ଠିକ୍ ଲୋକ ବୋଲି ଭାବୁ ନ ଥିଲେ କି ଏଭଳି କହିବାକୁ ବରଦାସ୍ତ କରୁ ନ ଥିଲେ । ନେଭି ମହାନ୍ତି ନାମକ ଜଣେ ବ୍ୟକ୍ତି ବୈଜୟନ୍ତଙ୍କୁ ମୁଣ୍ଡବିହୀନ କୁକୁଡ଼ା ଦର୍ଶାଇଛନ୍ତି । ଦେଶର ସବୁଠାରୁ ଜନପ୍ରିୟ ରାଜନେତାଙ୍କ ମୃତ୍ୟୁ ଉପରେ ସେ ମଇଳା ରାଜନୀତି କରୁଛନ୍ତି ବୋଲି ଲେଖିଛନ୍ତି ।
