– ଖାଲି ଚିଲିକା ନୁହଁ, ଶ୍ରୀମନ୍ଦିର ଓ କୋଣାର୍କ ଉପରେ ହେଲିକପ୍ଟର ଭ୍ରମଣ
– ଉପରୁ ଶ୍ରୀମନ୍ଦିର ଭିଜୁଆଲ୍ ନେଇ ସୋସିଆଲ୍ ମିଡ଼ିଆରେ ଛାଡ଼ିଲେ ବୈଜୟନ୍ତଙ୍କ ବନ୍ଧୁ
– କୋଣାର୍କ ମନ୍ଦିର ସମ୍ପର୍କରେ ଦେଲେ ଅରୁଚିକର ମନ୍ତବ୍ୟ
– ବିଧାନସଭାରେ ଉଠିଲା ପ୍ରସଙ୍ଗ, ବୈଜୟନ୍ତଙ୍କ ଗିରଫ ଦାବି
ଭୁୁବନେଶ୍ୱର: ନିଜର ସଙ୍ଗୀନ ଅପରାଧିକ କାରସାଦିରେ ଚଦର ଘୋଡ଼ାଇବା ପାଇଁ ହୀନ ଉଦ୍ୟମ ଆରମ୍ଭ କରିଦେଇଛନ୍ତି ବୈଜୟନ୍ତ ପଣ୍ଡା । ମାମଲାରେ ତୃତୀୟ ମହଲା ନାଁ କୁ ଟାଣି ଖସିଯିବାକୁ ଉଦ୍ୟମ କରିଛନ୍ତି । ଦୁଇ ସାମ୍ବାଦିକ ବନ୍ଧୁଙ୍କ ସହ ହେଲିକପ୍ଟରରେ ଚିଲିକା ଭ୍ରମଣ କରି ଧରାପଡ଼ିବା ପରେ ଏବେ ଗଦା ଗଦା ମିଛ କହି କଥା ବାଆଁରୋଉଛନ୍ତି । ୧୫ ତାରିଖରେ ସେ ଭୁବନେଶ୍ୱରୁ କେନ୍ଦ୍ରାପଡ଼ା ଯାଇ ଫେରିଥିବା ଗତକାଲି ସଫେଇ ଦେଇଥିଲା ବେଳେ ତାଙ୍କ ହେଲିକପ୍ଟରଟି ପୁରୀ, କୋଣାର୍କ ଉପରେ ଉଡ଼ିଥିବା ତାଙ୍କ ଯାତ୍ରାପଥର ବିବରଣୀରୁ ସ୍ପଷ୍ଟ ହୋଇଛି । ସବୁଠାରୁ ସାଂଘାତିକ କଥା ହେଉଛି, ପୁରୀ ଶ୍ରୀମନ୍ଦିର ଓ କୋଣାର୍କ ଉପରେ ଉଡ଼ି ସେମାନେ ଏହାର ଭିଜୁଆଲ୍ ବି ନେଇଛନ୍ତି । ହେଲିକପ୍ଟରରେ ଥିବା ଅଭିଜିତ୍ ଆୟାର ଏହି ଭିଜୁଆଲ୍ କୁ ସୋସିଆଲ୍ ମିଡ଼ିଆରେ ଛାଡ଼ିବା ପରେ ବୈଜୟନ୍ତ ଲୁଚାଉଥିବା ସତ୍ୟ ପଦାକୁ ଆସିଛି । ଏଥିସହ ବୈଜୟନ୍ତଙ୍କ ଚିଲିକା ଉଡ଼ାଣ ଅପରାଧିକ ମାମଲାରେ ଆଉ ଏକ ଅପରାଧ ଯୋଡି ହୋଇଛି ।
ବୈଜୟନ୍ତଙ୍କ କାରସାଦି ଜଣାପଡ଼ିଯିବା ପରେ ସେ ମାମଲାରୁ ଦୃଷ୍ଟି ହଟାଇବାକୁ ଏଣୁତେଣୁ ସଫେଇ ଦେଇ ଚାଲିଛନ୍ତି । ତାଙ୍କ ହ୍ୟାଙ୍ଗର ଜବତ କରିବାକୁ ଆସିଥିବା ଅଧିକାରୀ କୁଆଡ଼େ ତୃତୀୟ ମହଲା ଅଫିସରଙ୍କ ଇଙ୍ଗିତରେ ଆସିଥିବା ବୈଜୟନ୍ତଙ୍କୁ କହିଥିଲେ । ବୈଜୟନ୍ତ ନିଜ ଟିଭିରେ ଏହାକୁ ଜୋର୍ ରେ ପ୍ରଚାର କରୁଛନ୍ତି । ବୈଜୟନ୍ତଙ୍କ ପାଖରେ ସଂପୃକ୍ତ ଅଫିସରଙ୍କ ଟୀପ୍ପଣୀର ପ୍ରମାଣ ଦେଇପାରିବେ କି ବୋଲି ଜଣେ ବରିଷ୍ଠ ପୁଲିସ ଅଧିକାରୀ କହିଛନ୍ତି । ସେହିଭଳି ନିଜେ ଚିଲିକା ଉପରେ ହେଲିକପ୍ଟର ଉଡ଼ାଇଥିବା କଥାକୁ ଅସ୍ୱୀକାର କରିଚାଲିଥିବା ବୈଜୟନ୍ତ ମୁଖ୍ୟମନ୍ତ୍ରୀଙ୍କ ଆଡକୁ କଥା ନେଇଛନ୍ତି । ଅତୀତରେ ମୁଖ୍ୟମନ୍ତ୍ରୀ ଚିଲିକା ଉପରେ ହେଲିକପ୍ଟର ଉଡ଼ାଇଥିବାରୁ ସେ କାହିଁକି ଦଣ୍ଡିତ ହେବେନି ବୋଲି ପ୍ରଶ୍ନ କରିଛନ୍ତି । ପୁଣି ବୈଜୟନ୍ତ ସଫେଇ ଦେଉଛନ୍ତି, ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ନୋ ଫ୍ଲାଇଂ ଜୋନ୍ ରେ ଚିଲିକା ଅନ୍ତର୍ଭୁକ୍ତ ନାହିଁ । ତେଣୁ ସେଠି ହେଲିକପ୍ଟର ଉଡ଼ାଇବା ଅପରାଧ ନୁହେଁ । ଏମିତି ଭାବେ ନିଜ ପାପ ଲୁଚାଇବାକୁ ବୈଜୟନ୍ତ ବାଉଳା ଚାଉଳା ହୋଇଯାଇଥିବା ସ୍ପଷ୍ଟ ଜଣାପଡୁଛି । ବୈଜୟନ୍ତଙ୍କ ମୁଣ୍ଡକୁ ନୂଆ ନୂଆ ତତ୍ତ୍ୱ ଆସୁଛି ।
ଆଜି ବିଧାନସଭାରେ ବିଜେଡ଼ି ସଭ୍ୟମାନେ ଏହି ପ୍ରସଙ୍ଗ ଉଠାଇ ଗୃହରେ ପ୍ରବଳ ହଟ୍ଟଗୋଳ କରିଥିଲେ । ବୈଜୟନ୍ତଙ୍କ ଗିରଫ ସେମାନଙ୍କର ଦାବି ଥିଲା । ବିଧାନସଭା ବାହାରେ ଗାନ୍ଧୀ ପ୍ରତିମୂର୍ତ୍ତି ତଳେ ସେମାନେ ଧାରଣା ଦେଇ ବୈଜୟନ୍ତଙ୍କ ସାଙ୍ଗରେ ହେଲିକପ୍ଟରରେ ଥିବା ବନ୍ଧୁ ଅଭିଜିତ୍ ଆୟାରଙ୍କୁ ଗିରଫ ପାଇଁ ମଧ୍ୟ ଦାବି କରିଥିଲେ । ବିଶ୍ୱପ୍ରସିଦ୍ଧ କୋଣାର୍କ ସୂର୍ଯ୍ୟ ମନ୍ଦିର ସମ୍ପର୍କରେ ସେ ଅରୁଚିକର ମନ୍ତବ୍ୟ ଦେଇ କୋଟି କୋଟି ଓଡ଼ିଆଙ୍କୁ ଆଘାତ ଦେଇଛନ୍ତି ବୋଲି ବିଜେଡ଼ି ବିଧାୟକମାନେ କହିଥିଲେ ।
ଶୂନ୍ୟକାଳରେ ବିରୋଧୀ ଦଳ ନେତା ନରସିଂହ ମିଶ୍ର ମଧ୍ୟ ଏହି ପ୍ରସଙ୍ଗ ଉଠାଇଥିଲେ । ସେ କହିଥିଲେ, ଜଗନ୍ନାଥଙ୍କ ମନ୍ଦିର ଉପରେ ହେଲିକପ୍ଟର ଉଡ଼ାଇବା ଆଇନ ବିରୋଧୀ । ହେଲିକପ୍ଟରରେ ଥିବା ଜଣେ ବ୍ୟକ୍ତିଙ୍କ ମନ୍ତବ୍ୟ ସୋସିଆଲ୍ ମିଡ଼ିଆରେ ଦେଖିବାକୁ ମିଳୁଛି । ସଂପୃକ୍ତ ବ୍ୟକ୍ତି କୋଣାର୍କ ଏବଂ ଜଗନ୍ନାଥ ମନ୍ଦିର ଉପରେ ବିବାଦୀୟ ମନ୍ତବ୍ୟ ଦେଉଛନ୍ତି । ଜଣେ ବରିଷ୍ଠ ରାଜନୈତିକ ନେତା ହେଲିକପ୍ଟର ଉଡ଼ାଇବା ଅଭିଯୋଗ ହେଉଛି । ଘଟଣା ସତ୍ୟ ହୋଇଥିଲେ, ସଂପୃକ୍ତ ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ହେଉ ବୋଲି ବିରୋଧୀ ଦଳ ନେତା କହିଥିଲେ ।
