ଦିଲ୍ଲୀ ଫଳାଫଳ(ଅପରାହ୍ନ ୫.୧୫ ସୁଦ୍ଧା)
ଆମ୍ ଆଦମୀ ପାର୍ଟି– ୬୩
ଭାରତୀୟ ଜନତା ପାର୍ଟି– ୦୭
କଂଗ୍ରେସ– ୦୦
ଭୁବନେଶ୍ୱର: ୧୦ ମାସ ତଳେ ଅନୁଷ୍ଠିତ ସାଧାରଣ ନିର୍ବାଚନରେ ନରେନ୍ଦ୍ର ମୋଦି ଓ ତାଙ୍କ ବିଜେପିକୁ ଦେଶବାସୀ ଅକୁଣ୍ଠ ସମର୍ଥନ ଦେଇ ପୁନର୍ବାର କ୍ଷମତାକୁ ଆଣିଥିଲେ । ମୋଦି ଯାଦୁରେ ଝୁମିଥିଲା ସାରା ଦେଶ । ହେଲେ ବଦଳିଗଲାଣି ଚିତ୍ର । ଗୋଟିଏ ପରେ ଗୋଟିଏ ରାଜ୍ୟ ବିଜେପି ହାତରୁ ଖସୁଥିବା ବେଳେ ଦିଲ୍ଲୀ ଦଖଲର ସ୍ୱପ୍ନ ଧୂଳିସାତ୍ ହୋଇଛି । ଅରବିନ୍ଦ କେଜ୍ରିୱାଲ୍ ଙ୍କ ଲୋକପ୍ରିୟତା ଆଗରେ ମୁଣ୍ଡ ନୂଆଁଇଛନ୍ତି ସୁପର୍ ପାୱାରଫୁଲ୍ ମୋଦି-ଶାହା ଯୋଡି ।
ଦିଲ୍ଲୀ ପାଇଁ ବିଜେପି କର ବା ମରର ଚାଲେଂଜ ରଖିଥିଲା । ଦିଲ୍ଲୀ ରାଜ୍ୟ ଦଖଲ ପାଇଁ ନିର୍ବାଚନ ପ୍ରଚାରରେ ପ୍ରଧାନମନ୍ତ୍ରୀ ମୋଦି ସୁପର୍ ଷ୍ଟାର୍ ପ୍ରଚାରକ ଥିବା ବେଳେ ‘ଆଙ୍କର’ ଭୂମିକା ନେଇଥିଲେ ଅମିତ୍ ଶାହା । ଶେଷ ଦୁଇ ସପ୍ତାହ ପ୍ରଚାର ଦାୟିତ୍ୱ ନିଜ ହାତକୁ ନେଇଥିଲେ ଶାହା । ୩୫ଟି ରାଲି, ରୋଡ ସୋକୁ ମିଶାଇ ଏକାକୀ ୪୭ ଟି ନିର୍ବାଚନ ସଭା କରିଥିଲେ । ଦ୍ୱାର ଦ୍ୱାର ବୁଲି ଭୋଟ ମାଗିଥିଲେ । ବିଜେପିର ନବାଗତ ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା ବି ୪୦ଟି ନିର୍ବାଚନ ସଭା କରିଥିଲେ । ସାହିନବାଗ୍ ସିଏଏ ବିରୋଧୀ ପ୍ରତିବାଦକୁ ବିଜେପି-ସପକ୍ଷ ପୁଂଜି କରିବାକୁ ଜାତୀୟତାବାଦର ନାରାରେ ଦିଲ୍ଲୀବାସୀଙ୍କ ମନ ଜିଣିବାକୁ ପ୍ରାଣମୂର୍ଚ୍ଛା ଉଦ୍ୟମ କରାଗଲା ।
ଲୋକସଭା ଓ ରାଜ୍ୟସଭାର ପ୍ରାୟ ସମସ୍ତ ବିଜେପି ସାଂସଦ ୭୦ଟି ଯାକ ବିଧାନସଭା କ୍ଷେତ୍ରରେ ଡେରା ପକାଇ ଜଗିଥିଲେ । ୨୮ ଜଣ କେନ୍ଦ୍ରମନ୍ତ୍ରୀ, ୬ ପୂର୍ବତନ ମୁଖ୍ୟମନ୍ତ୍ରୀ, ୪ ମୁଖ୍ୟମନ୍ତ୍ରୀ ବି ଏଥିରେ ସାମିଲ ଥିଲେ । ୧୦୦୦ରୁ ଅଧିକ ବିଜେପି କାର୍ଯ୍ୟକର୍ତ୍ତା, ସଂଘ ପ୍ରଚାରକ ଦିଲ୍ଲୀର ଗଳିକନ୍ଦି ଛାଇ ଯାଇଥିଲେ । କଳ, ବଳ, କୌଶଳ କିଛି ବି କମ୍ ନ ଥିଲା । ଭୋଟରଙ୍କୁ ଆକର୍ଷିତ କରିବା ପାଇଁ ଦମଦାର ଭାଷଣର ବି ଅଭାବ ନ ଥିଲା ।
ମାତ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ୍ ଶାହା ଓ ତାଙ୍କ ବିଶାଳ ବାହିନୀ ଦିଲ୍ଲୀବାସୀଙ୍କ ଆସ୍ଥା ଓ ବିଶ୍ୱାସ ଜିଣିପାରିଲେ ନାହିଁ । କେଜ୍ରିୱାଲ୍ ଙ୍କ ବିକାଶ ମଡ଼େଲ ଏବଂ ଦୁର୍ନୀତି ବିରୋଧୀ ଆଭିମୁଖ୍ୟ ଉପରେ ଦିଲ୍ଲୀବାସୀ ପୁଣି ଆସ୍ଥା ରଖି ‘ଆପ୍’ କୁ ପୁନର୍ବାର ଜିତାଇ ଆଣିଛନ୍ତି । କେଜ୍ରିୱାଲ୍ ଙ୍କ ଚମକ ଆଗରେ ଫିକା ପଡ଼ିଛନ୍ତି ମୋଦି-ଶାହା ଯୋଡି ।
ମୋଦି ସାମ୍ରାଜ୍ୟର ପ୍ରଥମ ପାଳିର ଶେଷରୁ ଦ୍ୱିତୀୟ ପାଳି ଏ ପର୍ଯ୍ୟନ୍ତ ବିଭିନ୍ନ ରାଜ୍ୟରେ ବିଜେପି ଗୋଟିଏ ପରେ ଗୋଟିଏ ଝଟକା ପାଇଚାଲିଛି । ୨୦୧୮ମାର୍ଚ୍ଚ ବେଳକୁ ଦେଶର ୨୦ଟି ରାଜ୍ୟରେ ବିଜେପି ଏବଂ ବିଜେପି ମେଣ୍ଟ ସରକାର ଥିଲା ବେଳେ ଏବେ ତାହା ୧୫ରେ ପହଞ୍ଚିଛି । ୨୦୧୮ ଡିସେମ୍ବରରେ ଅନୁଷ୍ଠିତ ବିଧାନସଭା ନିର୍ବାଚନରେ ବିଜେପି ହାତରୁ ରାଜସ୍ଥାନ, ମଧ୍ୟପ୍ରଦେଶ ଏବଂ ଛତିଶଗଡ଼ ପଳାଇଥିଲା । ଗତବର୍ଷ ଅକ୍ଟୋବରରେ ଅନୁଷ୍ଠିତ ନିର୍ବାଚନରେ ବିଜେପି ମହାରାଷ୍ଟ୍ରକୁ ହରାଇଥିବା ବେଳେ ହରିଆନାରେ ନିଜ ବଳରେ ସରକାର ଗଢ଼ିବାକୁ ସମର୍ଥ ନହୋଇ ଜେଜେପି ହାତ ଧରିବାକୁ ପଡ଼ିଲା । ପରେ ପରେ ଝାଡ଼ଖଣ୍ଡ ବି ବିଜେପି ହାତରୁ ଚାଲିଗଲା । ଏବେ ଦିଲ୍ଲୀ ସ୍ୱପ୍ନ ମରିଗଲା ।
ସାମ୍ପ୍ରତିକ ସ୍ଥିତିରୁ ଏହା ସ୍ପଷ୍ଟ ଯେ ଦେଶବାସୀ କେନ୍ଦ୍ରର ଶାସନ ଦାୟିତ୍ୱ ମୋଦି ଓ ବିଜେପିକୁ ଦେବାରେ ଆଗ୍ରହ ରଖିଥିଲେ ମଧ୍ୟ ଅଧିକାଂଶ ରାଜ୍ୟରେ ବିଜେପି ହାତରେ ଶାସନଭାର ଦେବାକୁ ବିମୁଖ ଅଛନ୍ତି । ଯାହା ‘ସ୍ପ୍ଲିଟ୍ ଭୋଟିଂ’ ର ଯୁଗ ଆଣିଛି । ବିଶେଷକରି ଗତ ସାଧାରଣ ନିର୍ବାଚନରେ ଓଡ଼ିଶାବାସୀ ଏହି ଧାରାକୁ ଜନ୍ମ ଦେଇଥିବା କୁହାଯାଉଛି । ପଞ୍ଚମ ଥର ପାଇଁ ଓଡ଼ିଶାବାସୀ ବିଜେଡ଼ିକୁ ନିରଙ୍କୁଶ ଶାସନକ୍ଷମତା ଦେଇଥିବା ବେଳେ କେନ୍ଦ୍ରରେ ମୋଦିଙ୍କୁ ସମର୍ଥନ ଜଣାଇ ୮ ବିଜେପି ଲୋକସଭା ପ୍ରାର୍ଥୀଙ୍କୁ ଜିତାଇଥିଲେ । ସମାନଭାବେ, ଗତ ସାଧାରଣ ନିର୍ବାଚନରେ ଦିଲ୍ଲୀର ୭ଟି ଯାକ ବିଧାନସଭା ଆସନକୁ ବିଜେପି ଅକ୍ତିଆର କରିଥିଲେ ମଧ୍ୟ ରାଜ୍ୟ ଶାସନଭାର ପାଇବାରେ ସମର୍ଥ ହୋଇନାହାନ୍ତି । କେଜ୍ରିୱାଲ୍ ଙ୍କ ଉପରେ ଦିଲ୍ଲୀବାସୀ ସମ୍ପୂର୍ଣ୍ଣ ଆସ୍ଥା ରଖିଛନ୍ତି ।
ଭୋଟ ରାଜନୀତିରେ କାହାରି ଅହଂକାର, ବଡ଼ ଭାଷଣ, ବ୍ୟକ୍ତିଗତ ଆକ୍ଷେପ, ଜାତି-ଧର୍ମର ରାଜନୀତି, ଅସହିଷ୍ଣୁତାର ସ୍ଥାନ ନାହିଁ । ବରଂ ଶିକ୍ଷା, ସ୍ୱାସ୍ଥ୍ୟ, ବିଜୁଳି, ସଡ଼କ, ପାଣି ଭଳି ସର୍ବନିମ୍ନ ଆବଶ୍ୟକତାକୁ ପ୍ରାଥମିକତା ଦେଇ ବିକାଶର ରାସ୍ତା ଦେଖାଉଥିବା ଦଳ ବା ନେତାଙ୍କୁ ଲୋକେ ସେମାନଙ୍କ ହୃଦୟରୁ କେବେ ବି ଦୂରେଇ ଦେବେନି । ଦିଲ୍ଲୀ ଫଳାଫଳ ଏହା ହିଁ ଶିକ୍ଷା ଦେଇଥିବା ବୁଦ୍ଧିଜୀବୀ ମହଲର ମତ ।