ଭୁବନେଶ୍ୱର: ପିପିଲି ବେବିନା ଗଣଧର୍ଷଣ ଓ ହତ୍ୟା ମାମଲା ପୁଣି ମହଙ୍ଗା ପଡ଼ିଲା ପ୍ରଦୀପ ମହାରଥୀଙ୍କୁ । ଏହି ମାମଲାର ରାୟ ଉପରେ ବିବାଦୀୟ ମନ୍ତବ୍ୟ ଦେଇ ଚର୍ଚ୍ଚାରେ ଥିବା ମହାରଥୀ ଶେଷରେ ମନ୍ତ୍ରୀମଣ୍ଡଳରୁ ଇସ୍ତଫା ଦେଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଖକୁ ସେ ନିଜର ଇସ୍ତଫାପତ୍ର ପଠାଇ ଦେଇଛନ୍ତି । ଏହି ମାମଲାରେ ଛନ୍ଦି ହୋଇ ୨୦୧୨ ମସିହାରେ ମହାରଥୀ ଅନୁରୂପ ଭାବେ ମନ୍ତ୍ରୀପଦ ହରାଇଥିଲେ ।
ନିକଟରେ ପିପିଲି ଗଣଦୁଷ୍କର୍ମ ରାୟ ପ୍ରକାଶ ପାଇଥିଲା । ମାମଲାର ମୁଖ୍ୟ ଅଭିଯୁକ୍ତ ପ୍ରଶାନ୍ତ ପ୍ରଧାନ ଓ ସୁକାନ୍ତ ପ୍ରଧାନଙ୍କୁ ଭୁବନେଶ୍ୱର ପ୍ରଥମ ଅତିରିକ୍ତ ଜିଲ୍ଲା ଦୌରାଜଜ୍ ନିଦେ୍ର୍ଦାଷ ସାବ୍ୟସ୍ତ କରିଥିଲେ । ଏହି ରାୟ ଉପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସ୍ଥାନୀୟ ବିଧାୟକ ତଥା କୃଷି ଓ ପଞ୍ଚାୟତିରାଜ ମନ୍ତ୍ରୀ ମହାରଥୀ କହିଥିଲେ ଯେ କ୍ଷୀର ଓ ପାଣି ଅଲଗା ହୋଇଗଲା । ସତ୍ୟର ଜୟ ହୋଇଛି ଏବଂ ପୀଡ଼ିତାଙ୍କୁ ନ୍ୟାୟ ମିଳିଛି । ମହାରଥୀଙ୍କ ଏଭଳି ସାଂଘାତିକ ମନ୍ତବ୍ୟ ସମସ୍ତଙ୍କୁ ଚକିତ କରିଥିଲା । ସାରା ରାଜ୍ୟରେ ଏହା ଆଲୋଡ଼ନ ସୃଷ୍ଟି କରିଥିଲା । ମହାରଥୀଙ୍କ ଭାଷା ଗଣଦୁଷ୍କର୍ମ ପୀଡ଼ିତା ଓ ନାରୀସମାଜ ପ୍ରତି ଅବମାନନା ଦର୍ଶାଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ବିଜେପି ଓ କଂଗ୍ରେସ ଦଳ ପକ୍ଷରୁ ମହାରଥୀଙ୍କ ବହିଷ୍କାର ଦାବିରେ ବ୍ୟାପକ ଆନ୍ଦୋଳନ ହୋଇଥିଲା ।
ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାରିପଦାରେ ନାଁ ନନେଇ ପିପିଲି ପ୍ରସଙ୍ଗ ଉଠାଇଥିଲେ ଏବଂ ଏହି ମାମଲାର ତଦନ୍ତ ଠିକ୍ ହୋଇ ନ ଥିବା କହି ସମାଲୋଚନା କରିଥିଲେ । ସରକାର ଏହା ଉପରେ ଧ୍ୟାନ ଦେବାକୁ ପ୍ରଧାନମନ୍ତ୍ରୀ ପରାମର୍ଶ ଦେବା ପରେ ପ୍ରସଙ୍ଗର ଗୁରୁତ୍ୱ ଆହୁରି ବଢ଼ିଯାଇଥିଲା । ପ୍ରଧାନମନ୍ତ୍ରୀଙ୍କ ଏହି ମନ୍ତବ୍ୟ ମହାରଥୀଙ୍କ ମନ୍ତ୍ରୀପଦ ପ୍ରତି ଅଧିକରୁ ଅଧିକ ବିପଦ ସୃଷ୍ଟି କରିଥିଲା । ଗତକାଲି ସାମ୍ବାଦିକମାନେ ଏହା ଉପରେ ମୁଖ୍ୟମନ୍ତ୍ରୀଙ୍କଠାରୁ ପ୍ରତିକ୍ରିୟା ଲୋଡ଼ିବା ବେଳେ ତାଙ୍କ ମୁହଁର ଗମ୍ଭୀରତା ବାରିହୋଇଥିଲା । ବେବିନା ମାମଲାରେ ସରକାର ତତ୍ପର ବୋଲି ମୁଖ୍ୟମନ୍ତ୍ରୀ ମନ୍ତବ୍ୟ ଦେଇଥିଲେ । ମୁଖ୍ୟମନ୍ତ୍ରୀଙ୍କ ଏହି ଧାଡ଼ିକ ମନ୍ତବ୍ୟରୁ ମହାରଥୀଙ୍କ ମନ୍ତ୍ରୀପଦ ଯେ କୌଣସି ମୁହୁର୍ତ୍ତରେ ଚାଲିଯିବ ବୋଲି ଧାରଣା ଦୃଢ଼ୀଭୂତ ହୋଇଥିଲା ।
ମିଳିଥିବା ସୂଚନା ଅନୁଯାୟୀ, ମହାରଥୀଙ୍କୁ ମନ୍ତ୍ରୀପଦରୁ ହଟାଇବା ପାଇଁ ମୁଖ୍ୟମନ୍ତ୍ରୀ ପୂର୍ବରୁ ମନସ୍ଥିର କରିସାରିଥିଲେ । ତେବେ ୮ ତାରିଖରେ ଦିଲ୍ଲୀ ସମାବେଶ ପରେ ଏହା କାର୍ଯ୍ୟକାରୀ ହୋଇଥାଆନ୍ତା । ମାତ୍ର ଚାରିଆଡୁ ପ୍ରବଳ ଚାପ ବଢୁଥିବାରୁ ମୁଖ୍ୟମନ୍ତ୍ରୀ ଆଉ ସମୟ ଗଡ଼େଇବାକୁ ଚାହିଁ ନ ଥିଲେ । ଗତକାଲି ବିଳମ୍ବିତ ରାତିରେ ହିଁ ମହାରଥୀଙ୍କ ଇସ୍ତଫା ମାଗିଥିଲେ ମୁଖ୍ୟମନ୍ତ୍ରୀ । ସେହି ଅନୁଯାୟୀ ଆଜି ସକାଳେ ମହାରଥୀ ତାଙ୍କ ଇସ୍ତଫାପତ୍ର ମୁଖ୍ୟମନ୍ତ୍ରୀଙ୍କ ପାଖକୁ ପଠାଇ ଦେଇଛନ୍ତି ।
ଖାଲି ମହାରଥୀ ନୁହଁନ୍ତି, ଆଉ ଦୁଇମନ୍ତ୍ରୀଙ୍କ ପଦ ବି ବିପଦରେ ଅଛି । ଦୁଇଦିନ ପରେ ଏହା ସ୍ପଷ୍ଟ ହୋଇଯିବ ବୋଲି ଚର୍ଚ୍ଚା ଜୋର୍ ଧରିଛି । ସୂଚନାଯୋଗ୍ୟ, ମନ୍ତ୍ରୀମଣ୍ଡଳରୁ ୩ ଜଣ ମନ୍ତ୍ରୀ ହଟିବେ ବୋଲି ଏକ ବିଶ୍ୱସ୍ତ ସୂତ୍ରର ସୂଚନା ଆଧାରରେ ‘ମିଡ଼ଡ଼େ ଓଡ଼ିଶା’ ପ୍ରଥମେ ଖବର ଦେଇଥିଲା ।
ନିଜ ଆଡୁ ଇସ୍ତଫା ଦେଇଥିବା ମହାରଥୀଙ୍କ ସଫେଇ
ମନ୍ତ୍ରୀମଣ୍ଡଳରୁ ଇସ୍ତଫା ଦେବାକୁ ସେ ନିଜ ଆଡୁ ନିଷ୍ପତ୍ତି ନେଇଥିଲେ । ଏଥିପାଇଁ ତାଙ୍କ ଉପରେ କୌଣସି ଚାପ ପଡ଼ି ନ ଥିଲା । ମନ୍ତ୍ରୀମଣ୍ଡଳରୁ ଇସ୍ତଫା ଦେବା ପରେ ଗଣମାଧ୍ୟମ ଆଗରେ ଏହି ପ୍ରତିକ୍ରିୟା ଦେଇଛନ୍ତି ପ୍ରଦୀପ ମହାରଥୀ । ସେ କହିଛନ୍ତି, ମୁଁ ବିଜୁ ଜନତା ଦଳର ଜଣେ ସଚ୍ଚୋଟ କର୍ମୀ । ବିଜେଡ଼ି ଓ ନବୀନ ପଟ୍ଟନାୟକଙ୍କ ପ୍ରତି ମୋର ଗଭୀର ସମ୍ମାନ ରହିଛି । ମୋତେ ନେଇ ଦଳ ଉପରେ ଚାପ ନ ବଢ଼ୁ ସେହି ଦୃଷ୍ଟିର ମୁଁ ନିଜ ଆଡୁ ଇସ୍ତଫା ଦେବାକୁ ନିଷ୍ପତ୍ତି ନେଲି ବୋଲି ମହାରଥୀ ସଫେଇ ଦେଇଛନ୍ତି ।
