ଭୁବନେଶ୍ୱର: ପୂର୍ତ୍ତ ଓ ସମବାୟ ବିଭାଗର ସଚିବ ଡ. କ୍ରିଷନ୍ କୁମାରଙ୍କ ମାଆ ରାମମୂର୍ତ୍ତି ଦେବୀ ଗର୍ଗଙ୍କର ପରଲୋକ ହୋଇଯାଇଛି । ଫୁସଫୁସ୍ ସଂକ୍ରମଣ ଏବଂ କିଡନୀଜନିତ ସମସ୍ୟା ଯୋଗୁଁ ୪ ଦିନ ତଳେ ଆପୋଲୋ ହସ୍ପିଟାଲ୍ ର ଆଇସିୟୁରେ ତାଙ୍କୁ ଭର୍ତ୍ତି କରାଯାଇଥିଲା । ଗତକାଲି ତାଙ୍କର ଡାଇଲିସିସ୍ ହୋଇଥିଲା । ମାତ୍ର ଅବସ୍ଥା ଅତ୍ୟନ୍ତ ଗୁରୁତର ହେବାରୁ ତାଙ୍କୁ ଭେଣ୍ଟେଲେଟର୍ ରେ ରଖାଯାଇଥିଲା । ହୃଦଘାତ ଯୋଗୁଁ ଶୁକ୍ରବାର ରାତି ୧.୪୦ ମିନିଟ୍ ରେ ସେ ଆଖି ବୁଜି ଦେଇଥିଲେ । ମୃତ୍ୟୁ ବେଳକୁ ତାଙ୍କୁ ୮୬ ବର୍ଷ ବୟସ ହୋଇଥିଲା ।
ଶ୍ରୀମତୀ ଗର୍ଗ ଜଣେ ଧର୍ମପରାୟଣା ମହିଳା ଥିଲେ । ଜୀବନବ୍ୟାପୀ ପ୍ରଭୁ ଶ୍ରୀକୃଷ୍ଣଙ୍କର ଥିଲେ ଏକାନ୍ତ ଅନୁଗାମୀ । ଏଥିସହ ଖୁବ୍ ମେଳାପୀ ଏବଂ ପରୋପକାରୀ ଥିଲେ । ତାଙ୍କ ସ୍ୱାମୀ ସ୍ୱର୍ଗତ ଲକ୍ଷ୍ମଣ ଦାସ ଗର୍ଗ ମଧ୍ୟ ପ୍ରଭୁ ଶ୍ରୀକୃଷ୍ଣଙ୍କର ପରମ ଭକ୍ତ ଥିଲେ । ୧୦ ବର୍ଷ ତଳୁ ତାଙ୍କର ଦେହାନ୍ତ ହୋଇଯାଇଛି । ତିନି ପୁଅ ଏବଂ ଚାରି ଝିଅଙ୍କୁ ଛାଡ଼ି ଶେଷରେ ଶ୍ରୀମତୀ ଗର୍ଗ ସଂସାରରୁ ବିଦାୟ ନେଇଛନ୍ତି । ସ୍ୱାମୀଙ୍କ ମୃତ୍ୟୁ ପରଠାରୁ ସାନପୁଅ ଡ. କ୍ରିଷନ୍ କୁମାରଙ୍କ ପାଖରେ ସେ ରହୁଥିଲେ । ମୃତ୍ୟୁଶଯ୍ୟା ନିକଟରେ କ୍ରିଷନ୍ ଏବଂ ପରିବାରର କେତେକ ସଦସ୍ୟ ଉପସ୍ଥିତ ଥିଲେ ।
ଡ. କୁମାରଙ୍କ ପାଇଁ ତାଙ୍କ ମାଆ ଥିଲେ ସବୁଠାରୁ ପ୍ରିୟ ମଣିଷ । ହସ୍ପିଟାଲ୍ ରେ ଚିକିତ୍ସାଧୀନ ମାଆଙ୍କ ପାଖ ଛାଡୁ ନ ଥିଲେ ସେ । ମାଆଙ୍କ ମୃତ୍ୟୁ ତାଙ୍କ ପାଇଁ ଦାରୁଣ ଆଘାତ ଆଣିଛି । ପରିବାର ସଦସ୍ୟମାନେ ଭୁବନେଶ୍ୱରରେ ପହଞ୍ଚିଲା ପରେ ଅପରାହ୍ନରେ ପୁରୀ ସ୍ୱର୍ଗଦ୍ୱାରକୁ ଶେଷକୃତ୍ୟ ସମ୍ପନ୍ନ ପାଇଁ ନିଆଯାଇଛି ।
ଶ୍ରୀମତୀ ଗର୍ଗଙ୍କ ଅନ୍ତିମ ଦର୍ଶନ ପାଇଁ ଡ. କୁମାରଙ୍କ ୟୁନିଟ୍-୯ ସ୍ଥିତ ସରକାରୀ ବାସଭବନରେ ବହୁ ମନ୍ତ୍ରୀ, ବିଧାୟକ, ବ୍ୟୁରୋକ୍ରାଟ୍, ବରିଷ୍ଠ ପୁଲିସ ଅଧିକାରୀ, ସାମ୍ବାଦିକ ଏବଂ ପ୍ରତିଷ୍ଠିତ ବ୍ୟକ୍ତିଙ୍କ ଭିଡ଼ ହୋଇଥିଲା ।
