ମିିଳିଲା ୪୩୭୩ କୋଟି, କମିଲା ୧୬୨୦ କୋଟି

ଭୁୁବନେଶ୍ୱର: ୨୦୨୦-୨୧ ଆର୍ଥିକ ବର୍ଷ ବଜେଟ୍ ରେ ଓଡ଼ିଶାର ରେଳ ପ୍ରକଳ୍ପ ପାଇଁ ବ୍ୟୟ ଅଟକଳର ହିସାବ ଆସିଛି । ଓଡ଼ିଶା ଭାଗରେ ପଡ଼ିଛି ୪,୩୭୩ କୋଟି ଟଙ୍କା । ଗତ ବଜେଟ୍ ରେ ପୂର୍ବତଟ ରେଳପଥର ପ୍ରକଳ୍ପ ପାଇଁ ରେକର୍ଡ ୫,୯୯୩ କୋଟି ଟଙ୍କା ମିଳିଥିଲା । ସୁତରାଂ ଗତଥର ତୁଳନାରେ ଏଥର ଓଡ଼ିଶାକୁ ୧୬୨୦ କୋଟି କମ ପାଣ୍ଠି ମିଳିଛି ।

ସମ୍ବଲପୁର-ଗୋପାଳପୁର ଭାୟା ଫୁଲବାଣୀ ୨୪୧ କିମିର ନୂଆ ରେଳଲାଇନ୍ ପ୍ରକଳ୍ପ ମଂଜୁର ହୋଇଛି ସତ ହେଲେ ବଜେଟ୍ ରେ ପ୍ରତିଫଳିତ ହୋଇନାହିଁ । ଏଥିପାଇଁ ୨୯୫୭ କୋଟି ଟଙ୍କାର ବ୍ୟୟ ଅଟକଳକୁ ନୀତି ଆୟୋଗଙ୍କ ଚୂଡ଼ାନ୍ତ ଅନୁମୋଦନ ପାଇଁ ଛଡ଼ାଯାଇଛି ।

ବହୁ ପ୍ରତୀକ୍ଷିତ ଖୋର୍ଦ୍ଧା-ବଲାଙ୍ଗୀର ରେଳଲାଇନ୍ ପାଇଁ ଗତଥର ୩୫୦ କୋଟି ଟଙ୍କା ମିଳିଥିଲା ବେଳେ ଏଥର ମିଳିଛି ୫୨୦ କୋଟି ଟଙ୍କା । ସୂଚନାଥାଉକି, ଏହି ରେଳପଥ ନିର୍ମାଣ କାର୍ଯ୍ୟ ଅତିଶୀଘ୍ର ସମ୍ପୂର୍ଣ୍ଣ କରିବା ନିମନ୍ତେ ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁତ୍ୱ ଦେଉଛନ୍ତି । ଅନ୍ୟପକ୍ଷରେ ଅନଗୁଳ-ସୁକିନ୍ଦା ପ୍ରକଳ୍ପକୁ ଗତଥର ୨୫୦ କୋଟି ଟଙ୍କା ମିଳିଥିବା ବେଳେ ଏଥର ୪୫୦ କୋଟି ଟଙ୍କା ଦିଆଯାଇଛି । ହରିଦାସପୁର-ପାରାଦ୍ୱୀପ ପ୍ରକଳ୍ପ କାର୍ଯ୍ୟ ସରି ସରି ଆସୁଥିବାରୁ ମାତ୍ର ୧୦୦ କୋଟି ଟଙ୍କା ଦିଆଯାଇଛି । ଗତଥର ପ୍ରକଳ୍ପକୁ ମିଳିଥିଲା ୪୦୦ କୋଟି । ମାର୍ଚ୍ଚ ସୁଦ୍ଧା ପ୍ରକଳ୍ପ କାର୍ଯ୍ୟକ୍ଷମ ହେବ ।

ସମ୍ବଲପୁର-ତାଳଚେର, ସମ୍ବଲପୁର-ଟିଟିଲାଗଡ଼, ଟିଟିଲାଗଡ଼-ରାୟଗଡ଼ା ଏବଂ ଟିଟିଲାଗଡ଼-ରାଇପୁର ରେଳପଥ ଦୋହରୀକରଣ କାର୍ଯ୍ୟ ପାଇଁ ବଜେଟ୍ ରେ ଅଧିକ ଅର୍ଥବରାଦ କରାଯାଇଛି । ଖୋର୍ଦ୍ଧାରୋଡ-ବଲାଙ୍ଗୀର ଏବଂ ଲାଂଜିଗଡ-ଜୁନାଗଡ଼ ଲାଇନ୍ ର ବିଦ୍ୟୁତିକରଣ କାର୍ଯ୍ୟକୁ ଗୁରୁତ୍ୱ ଦିଆଯାଇଛି । ସମ୍ବଲପୁର ନିକଟ ମାନେଶ୍ୱରଠାରେ ୱାଗନ୍ ମରାମତି କାରଖାନା ପାଇଁ ୨୦ କୋଟି ଟଙ୍କା ଦିଆଯାଇଛି ।

ରେଳବାଇ ନିରାପତ୍ତା ଦୃଷ୍ଟିରୁ ଲେଭଲ କ୍ରସିଂ ବଦଳରେ ରୋଡ୍ ଓଭର ବ୍ରିଜ୍ ଏବଂ ରୋଡ୍ ଅଣ୍ଡର ବି୍ରଜ୍ ନିର୍ମାଣକୁ ଗୁରୁତ୍ୱ ଦିଆଯାଇ ୧୧୬୫ କୋଟି ଟଙ୍କା ମଂଜୁର କରାଯାଇଛି ।

କେଉଁ ପ୍ରକଳ୍ପ ପାଇଁ କେତେ

(ନୂଆ ରେଳପଥ)

ଅନୁଗୁଳ-ସୁକିନ୍ଦା (୯୮.୭କିମି)- ୪୫୦ କୋଟି
ହରିଦାସପୁର-ପାରାଦ୍ୱୀପ(୮୨ କିମି)- ୧୦୦ କୋଟି
ଖୋର୍ଦ୍ଧା ରୋଡ୍-ବଲାଙ୍ଗୀର(୨୮୯କିମି)- ୫୨୦ କୋଟି
ତାଳଚେର-ବିମଳାଗଡ଼(୧୫୪ କିମି)- ୧୪୦ କୋଟି
ଜୟପୁର-ମାଲକାନଗିରି(୧୩୦ କିମି)- ୩୩ କୋଟି
ଜୟପୁର-ନବରଙ୍ଗପୁର(୩୮ କିମି)-୨୦ କୋଟି
ଖୋର୍ଦ୍ଧା ରୋଡ୍-ବିଜିଆନଗରମ୍ ବାଇପାସ୍-୨୦ କୋଟି
ନୂଆପଡ଼ା-ଗୁଣୁପୁର-ଥେରୁବାଲି(୭୯.୪୫କିମି)- ୦.୦୧କୋଟି
ଗୋପାଳପୁର-ସମ୍ବଲପୁର(ଭା-ଫୁଲବାଣୀ)- ୦.୦୧ କୋଟି
ତାଳଚେର-ଅନୁଗୁଳ(୧୪.୫ କିମି)- ୦.୦୧ କୋଟି

ଦୋହରୀକରଣ
ସମ୍ବଲପୁର-ତାଳଚେର(୧୭୪.୧୧ କିମି)-୨୯୨ କୋଟି
ସମ୍ବଲପୁର-ଟିଟିଲାଗଡ଼(୧୮୨.୧୧ କିମି)- ୩୮୨ କୋଟି
ଟିଟିଲାଗଡ଼-ବିଜିଆନଗରମ୍(୨୬୪.୬ କିମି)- ୩୮୦ କୋଟି
ଇାସପାଣି-ଦୈତାରୀ-ଟମକା-ଯଖପୁରା(୧୮୦ କିମି)- ୮୦ କୋଟି
ବୃନ୍ଦାମାଳ-ଝାରସୁଗୁଡ଼ା ଫ୍ଲାଏ ଓଭର୍(୬.୬କିମି)- ୧୦ କୋଟି
ଭଦ୍ରକ-ନେରଗୁଣ୍ଡି ତୃତୀୟ ଲାଇନ୍(୮୦ କିମି)- ୧୦୨ କୋଟି
ଜରପଡ଼ା-ବୁଢ଼ାପଙ୍କ(ତୃତୀୟ ଓ ଚତୁର୍ଥ ଲାଇନ୍)- ୧୧୮ କୋଟି
ବୁଢ଼ାପଙ୍କ-ସାଲେଗାଁ(ତୃତୀୟ ଓ ଚତୁର୍ଥ ଲାଇନ୍)-୨୦୫ କୋଟି
କୋରାପୁଟ-ସିଙ୍ଗାପୁର ରୋଡ୍- ୨୦୧ କୋଟି
ଜଗଦଲପୁର-କୋରାପୁଟ(୧୧୦ କିମି)- ୧୩୦ କୋଟି
କୋଟ୍ଟାବାଲାସ-କୋରାପୁଟ(୧୮୯ କିମି)- ୧୯୬ କୋଟି
ରାୟପୁର-ଟିଟିଲାଗଡ଼(୨୦୩ କିମି)-୧୪୬ କୋଟି
ଖୋର୍ଦ୍ଧା ରୋଡ୍-ବାରଙ୍ଗ(ତୃତୀୟ ଲାଇନ୍)- ୩୫ କୋଟି
ଝାରସୁଗୁଡ଼ା-ବିଳାସପୁର ଚତୁର୍ଥ ଲାଇନ୍(୨୦୬ କିମି)- ୨୮୦ କୋଟି
ବାଘୁଆପାଲ ଫ୍ଲାଇଓଭର୍- ୧୦ କୋଟି
ମନୋହରପୁର-ବଣ୍ଡାମୁଣ୍ଡା ତୃତୀୟ ଲାଇନ୍- ୩୫ କୋଟି
ରାଉରକେଲା-ଝାରସୁଗୁଡ଼ା ତୃତୀୟ ଲାଇନ୍-୧୭୦ କୋଟି
ବଣ୍ଡମୁଣ୍ଡା-ରାଞ୍ଚି ଦୋହରୀକରଣ-୨୦ କୋଟି
ନାରାୟଣଗଡ଼-ଭଦ୍ରକ ତୃତୀୟ ଲାଇନ୍- ୫୦ କୋଟି
ବଣ୍ଡମୁଣ୍ଡା-ରାଉରକେଲା ଚତୁର୍ଥ ଲାଇନ୍- ୨୩ କୋଟି
ଚମ୍ପା-ଝାରସୁଗୁଡ଼ା ତୃତୀୟ ଲାଇନ୍- ୨୦ କୋଟି

ଦ୍ୱନ୍ଦରେ ପକାଇଲା ଧର୍ମେନ୍ଦ୍ରଙ୍କ ଟୁଇଟ୍

କେନ୍ଦ୍ର ବଜେଟ୍ ରେ ଓଡ଼ିଶାର ରେଳପ୍ରକଳ୍ପ ପାଇଁ ମିଳିଥିବା ପାଣ୍ଠିକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟୁଇଟ୍ ଯୋଗେ ଖୁସିବ୍ୟକ୍ତ କରିଛନ୍ତି । ସମ୍ବଲପୁର-ଗୋପାଳପୁର ଭାୟା ଫୁଲବାଣୀ ୨୪୧ କିମିର ନୂଆ ରେଳଲାଇନ୍ ପ୍ରକଳ୍ପ ପାଇଁ ୨୯୫୭ କୋଟି ଅନୁଦାନ ହୋଇଥିବା କେନ୍ଦ୍ରମନ୍ତ୍ରୀ ଟୁଇଟ୍ କରିଛନ୍ତି । ଏହା କେବଳ ଜନଜାତି ଅଞ୍ଚଳରେ ରେଳ ସଂଯୋଗ ସ୍ଥାପନ କରିବ ନାହିଁ । ସ୍ଥାନୀୟ ଅର୍ଥନୀତିକୁ ମଧ୍ୟ ସମୃଦ୍ଧ କରିବ ବୋଲି କେନ୍ଦ୍ରମନ୍ତ୍ରୀ ଲେଖିଛନ୍ତି । କେନ୍ଦ୍ରମନ୍ତ୍ରୀଙ୍କ ଏହି ଟୁଇଟ୍ କୁ ରାଜ୍ୟ ବିଜେପି ଏକ ପ୍ରେସ୍ ରିଲିଜ୍ କରି ପଠାଇଛି ।

ତେବେ କେନ୍ଦ୍ରମନ୍ତ୍ରୀଙ୍କ ଏହି ତଥ୍ୟକୁ ନେଇ ଦ୍ୱନ୍ଦ ସୃଷ୍ଟି ହୋଇଛି । କାରଣ ଓଡ଼ିଶା ପ୍ରକଳ୍ପ ପାଇଁ ଆବଣ୍ଟିତ ପାଣ୍ଠି ତାଲିକାରୁ ଏହା ମିଳୁନାହିଁ । ଓଡ଼ିଶାର କେଉଁ ପ୍ରକଳ୍ପକୁ କେତେ ଟଙ୍କା ମିଳିଛି ରେଳବାଇ ତାର ସାରଣୀ ଦେଇଛି । ସେଥିରେ ଗୋପାଳପୁର-ସମ୍ବଲପୁର(ଭାୟା-ଫୁଲବାଣୀ) ରେଳଲାଇନ୍ ପ୍ରକଳ୍ପ ପାଇଁ ମାତ୍ର ୦.୦୧ କୋଟି ଟଙ୍କା ମଂଜୁର ଉଲ୍ଲେଖ ରହିଛି । ଏହି ପ୍ରକଳ୍ପ ପାଇଁ ୨୯୫୭ କୋଟି ଟଙ୍କାର ବ୍ୟୟ ଅଟକଳ ହୋଇଥିଲେ ବି ତାହା ନୀତି ଆୟୋଗଙ୍କ ଚୂଡ଼ାନ୍ତ ଅନୁମୋଦନ ଆବଶ୍ୟକ କରୁଛି । ନୀତି ଆୟୋଗ ଅନୁମୋଦନ ଦେଲେ ଯାଇ ଏହି ପାଣ୍ଠି ଆସିବ ।

ଏଭଳିସ୍ଥଳେ କେନ୍ଦ୍ରମନ୍ତ୍ରୀଙ୍କ ଏହି ଟୁଇଟ୍ ଏବଂ ବିଜେପି ତାହାକୁ ବଡ଼ ଜୋର୍ ରେ ପ୍ରଚାର କରିବା ସାଧାରଣ ଜନତାଙ୍କୁ ଦ୍ୱନ୍ଦରେ ପକାଇଛି । କେନ୍ଦ୍ରମନ୍ତ୍ରୀଙ୍କ କଥା ସତ ନା ବଜେଟ୍ ବ୍ୟୟବରାଦର ସରକାରୀ ପ୍ରେସ୍ ରିଲିଜ୍ ସତ ବୁଝିପାରୁନାହାନ୍ତି ।