ମୁଖ୍ୟମନ୍ତ୍ରୀଙ୍କ ଦ୍ୱାରା ଚେନ୍ନାଇରେ ଓଡ଼ିଶା ଭବନ ଉଦଘାଟିତ

ଭୁବନେଶ୍ୱର: ଚେନ୍ନାଇ ଗସ୍ତରେ ଯାଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସଂଧ୍ୟାରେ ନବନିର୍ମିତ ଓଡ଼ିଶା ଭବନର ଉଦଘାଟନ କରିଛନ୍ତି । ତାମିଲନାଡୁ ସରକାରଙ୍କ ପକ୍ଷରୁ ମନ୍ତ୍ରୀ ଜୟକୁମାର ଏହି ଉତ୍ସବରେ ଯୋଗଦେଇଥିଲେ । ୨୨ କୋଟି ଟଙ୍କା ବ୍ୟୟରେ ନିର୍ମିତ ଏହି ଛଅ ମହଲା ବିଶିଷ୍ଟ ଓଡ଼ିଶା ଭବନରେ ୨୧ ଟି ରୁମ୍ ଓ ଏକ ବିରାଟ ସମ୍ମିଳନୀ କକ୍ଷ ରହିଛି । ୨୦୧୨ ମସିହା ମେ’ ୧୧ ତାରିଖରେ ତାମିଲାନାଡୁର ତତ୍କାଳୀନ ମୁଖ୍ୟମନ୍ତ୍ରୀ ଜୟଲଳିତାଙ୍କ ସହ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଏହାର ଶିଳାନ୍ୟାସ କରିଥିଲେ ।

ମୁଖ୍ୟମନ୍ତ୍ରୀ ତାଙ୍କ ଉଦଘାଟନୀ ଭାଷଣରେ କହିଥିଲେ, ଓଡ଼ିଶା ଓ ତାମିଲନାଡୁ ମଧ୍ୟରେ ଥିବା ସମ୍ପର୍କକୁ ଏହା ଆହୁରି ସୁଦୃଢ଼ କରିବାରେ ସହାୟକ ହେବ । ଏହା କେବଳ ରହଣି ସୁବିଧା ଦେବ ନାହିଁ ବରଂ ଓଡ଼ିଶାର କଳା, ସଂସ୍କୃତି, ହସ୍ତଶିଳ୍ପକୁ ଅଧିକ ପରିବ୍ୟାପ୍ତ କରିବ । ରାଜ୍ୟ ସରକାରଙ୍କ ବିଭିନ୍ନ ଏଜେନ୍ସୀର ଏହା କେନ୍ଦ୍ରବିନ୍ଦୁ ହେବ । ଓଡ଼ିଶା ଭବନ ନିର୍ମାଣରେ ତାମିଲନାଡୁଙ୍କ ସରକାରଙ୍କ ସହଯୋଗକୁ ମୁଖ୍ୟମନ୍ତ୍ରୀ ଭୂୟସୀ ପ୍ରଶଂସା କରିଥିଲେ । ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ଜୟଲଳିତାଙ୍କ ସହ ତାଙ୍କର ମଧୁର ସମ୍ପର୍କର ସ୍ମୃତିଚାରଣ କରି ଓଡ଼ିଶା ଭବନ ପାଇଁ ସେ ଜମି ଯୋଗାଇ ଦେଇଥିଲେ ବୋଲି କହିଥିଲେ ।

ଏହି ଉତ୍ସବରେ ଅନ୍ୟମାନଙ୍କ ମଧ୍ୟରେ ମନ୍ତ୍ରୀ ପ୍ରତାପ ଜେନା, ଅନନ୍ତ ଦାସ, ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ, ଉନ୍ନୟନ କମିଶନର ଆର.ବାଲକ୍ରିଷ୍ଣନ୍, ଗୃହ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ । ସୂଚନାଯୋଗ୍ୟ, ଓଡ଼ିଶା ବାହାରେ ରାଜ୍ୟ ସରକାରଙ୍କର ଏହା ଷଷ୍ଠ ଅତିଥି ଭବନ ହୋଇଛି । ବର୍ତ୍ତମାନ ଦିଲ୍ଲୀରେ ତିନିଟି, ମୁମ୍ବାଇ ଓ କୋଲକତାରେ ଗୋଟିଏ ଲେଖାଏଁ ଅତିଥି ଭବନ ରହିଛି ।