ମୁଖ୍ୟ ଶାସଚ ସଚିବଙ୍କ ସହ ୪ ଜିଲ୍ଲା ବୁଲିଲେ ପାଣ୍ଡିଆନ୍

ଭୁବନେଶ୍ୱର: ରାଜ୍ୟରେ ନୂଆ କୋଭିଡ୍ ହସ୍ପିଟାଲ୍ ଏବଂ ଲକ୍ ଡାଉନ୍ ସ୍ଥିତିରେ କୃଷି, ମନରେଗା ଆଦି କାର୍ଯ୍ୟକ୍ରମର ଅନୁଧ୍ୟାନ ପାଇଁ ୫-ଟି ସଚିବ ଭି.କେ.ପାଣ୍ଡିଆନ୍ ଙ୍କ ଜିଲ୍ଲା ଗସ୍ତ ଜାରି ରହିଛି । ଆଜି ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀଙ୍କ ସହ ବଲାଙ୍ଗୀର, ବରଗଡ଼, ସୋନପୁର ଏବଂ କନ୍ଧମାଳ ଗସ୍ତ କରିଥିଲେ ପାଣ୍ଡିଆନ୍ । ଏହି ଜିଲ୍ଲାଗୁଡ଼ିକରେ କୋଭିଡ୍ ହସ୍ପିଟାଲ୍ ର ଅଗ୍ରଗତି ଏବଂ ଅନ୍ୟାନ୍ୟ କାର୍ଯ୍ୟର ସମୀକ୍ଷା କରିଥିଲେ ।

ରାଜ୍ୟ ସରକାରଙ୍କ ପକ୍ଷରୁ ବଲାଙ୍ଗୀରରେ ୨୦୦ ବେଡ୍ କୋଭିଡ୍ ହସ୍ପିଟାଲ୍ କାର୍ଯ୍ୟକ୍ଷମ ହୋଇସାରିଛି । ଏଥିରେ ୨୦ ଆଇସିୟୁ ବ୍ୟବସ୍ଥା ରହିଛି । ଓଏମସି ଏଥିପାଇଁ ଆର୍ଥିକ ସହାୟତା ଦେଇଥିବା ବେଳେ କିମସ୍ ଏହାର ପରିଚାଳନା କରୁଛି ।

କନ୍ଧମାଳରେ ୧୫୦ ବେଡ୍ ଏବଂ ୧୦ ଆଇସିୟୁ ବିଶିଷ୍ଟ କୋଭିଡ୍ ହସ୍ପିଟାଲ୍ କାର୍ଯ୍ୟକ୍ଷମ ହୋଇଛି । ଓଏମସି ଆର୍ଥିକ ସହାୟତା ଦେଇଥିବା ବେଳେ କିମସ୍ ଏହାର ପରିଚାଳନା କରୁଛି ।

ସୋନପୁରରେ ୨୦୦ ବେଡ୍ ର କୋଭିଡ୍ ହସ୍ପିଟାଲ୍ ମଧ୍ୟ କାର୍ଯ୍ୟକ୍ଷମ ହୋଲାଣି । ରାଜ୍ୟ ସରକାରଙ୍କ ସ୍ୱାସ୍ଥ୍ୟ ବିଭାଗ ଏହାର ପରିଚାଳନା କରୁଛି ।

ବରଗଡ଼ରେ ୧୦ଟି ଆଇସିୟୁ ବ୍ୟବସ୍ଥା ସହ ୨୦୦ ବେଡ୍ କୋଭିଡ୍ ହସ୍ପିଟାଲ୍ ର କାମ ଚାଲିଛି । ଆଇଓସିଏଲ୍ ଆର୍ଥିକ ସହାୟତା ଦେଉଥିବା ବେଳେ ବରଗଡ଼ର ବିକାଶ ଗ୍ରୁପ୍ ଏହାର ପରିଚାଳନା ଦାୟିତ୍ୱ ନେଇଛି ।

ମୁଖ୍ୟ ଶାସନ ସଚିବ ଶ୍ରୀ ତ୍ରିପାଠୀ ଏବଂ ୫-ଟି ସଚିବ ଶ୍ରୀ ପାଣ୍ଡିଆନ୍ ଏସବୁ କୋଭିଡ୍ ହସ୍ପିଟାଲ୍ ର ଭିତ୍ତିଭୂମି ଏବଂ ଅନ୍ୟାନ୍ୟ ଆନୁସଙ୍ଗିକ ବ୍ୟବସ୍ଥାର ତଦାରଖ କରି ସନ୍ତୋଷ ପ୍ରକାଶ କରିଥିଲେ । ଏଥିସହ ସଂପୃକ୍ତ ଜିଲ୍ଲାଗୁଡ଼ିକର ଜିଲ୍ଲାପାଳ ଓ ଏସପିଙ୍କ ସହିତ ଆଲୋଚନା କରି ଲକ୍ ଡାଉନ୍ କଟକଣାରୁ ବାଦ୍ ଦିଆଯାଇଥିବା କୃଷି କାର୍ଯ୍ୟକ୍ରମ ସୁରୁଖୁରୁରେ କରାଇବାକୁ ନିର୍ଦ୍ଦେଶ ଦେଇଥିଲେ । ମେ ପ୍ରଥମ ସପ୍ତାହରୁ ରବି ଫସଲ ଅମଳରେ ଯେଭଳି ଚାଷୀଙ୍କର କୌଣସି ଅସୁବିଧା ନହୁଏ ସେଥିପ୍ରତି ସଜାଗ କରିଥିଲେ । ନରେଗା କାର୍ଯ୍ୟାନ୍ୱୟ ଏବଂ ଅସହାୟ ଗରିବଙ୍କୁ ଖାଦ୍ୟ ଯୋଗାଣରେ କୌଣସି ବ୍ୟତିକ୍ରମ ନ ହେବା ପ୍ରତି ସତର୍କ କରାଇଥିଲେ । ଜଙ୍ଗଲ ଲଘୁଜାତ ଦ୍ରବ୍ୟ ସଂଗ୍ରହରେ ସୁବିଧା କରାଇବାକୁ କନ୍ଧମାଳ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଥିଲେ ।

ଲକ୍ ଡାଉନ୍ କଟକଣାକୁ କଡ଼ାକଡ଼ି ପାଳନ କରିବା ପାଇଁ ଏସପିମାନେ ଦୃଷ୍ଟି ରଖିବାକୁ କୁହାଯାଇଥିଲା । ଓଡ଼ିଶା-ଛତିଶଗଡ଼ ସୀମାନ୍ତ ଉପରେ କଡ଼ା ନଜର ରଖିବାକୁ ବରଗଡ଼ ଏସପିଙ୍କୁ ନିର୍ଦ୍ଦେଶ ଦେଇଥିଲେ ।