ଭୁବନେଶ୍ୱର: ମହାମାରୀ କରୋନା ପାଇଁ ଅନିଶ୍ଚିତତା ଭିତରେ ଥିବା ଚଳିତବର୍ଷର ରଥଯାତ୍ରାକୁ ନେଇ ଆଶା ଆଶଙ୍କା ଲାଗି ରହିଥିବା ବେଳେ ରଥଖଳାରେ ରଥ ନିର୍ମାଣ କାର୍ଯ୍ୟ ଆରମ୍ଭ ହେବାକୁ ଯାଉଛି । ପୁରୀ ଗଜପତି ମହାରାଜା ଶ୍ରୀ ଶ୍ରୀ ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଆଜି ଶ୍ରୀମନ୍ଦିର ପରିଚାଳନା କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି । ସରକାରଙ୍କ ଗାଇଡଲାଇନ୍ ଅନୁଯାୟୀ ରଥ ନିର୍ମାଣ କାର୍ଯ୍ୟ ହେବ ବୋଲି କୁହାଯାଇଛି ।
ଗଜପତି ମହାରାଜାଙ୍କ ସୂଚନା ଅନୁଯାୟୀ, କୌଣସି ଧର୍ମୀୟ ଉତ୍ସବ, ସଭାସମିତି ଉପରେ କଟକଣା ରହିଛି । ମାତ୍ର ପୁରୀ ଗ୍ରୀନ୍ ଜୋନ୍ ରେ ରହିଥିବାରୁ ରଥ ନିର୍ମାଣ କାର୍ଯ୍ୟ ଏଥିରେ ଅନ୍ତର୍ଭୁକ୍ତ ହେଉନାହିଁ । କାରଣ ଏହା ଧାର୍ମିକ ପର୍ବ ନୁହେଁ, ବରଂ ସମ୍ପୂର୍ଣ୍ଣ ଭାବେ ଏକ ନିର୍ମାଣ କାର୍ଯ୍ୟ । ତେବେ ରଥଯାତ୍ରା ହେବ କି ନାହିଁ ଲକଡାଉନ୍ ପରିସ୍ଥିତିକୁ ଚାହିଁ ସରକାର ନିଷ୍ପତ୍ତି ନେବେ । କରୋନା ଭଳି ଭୟଙ୍କର ସଙ୍କଟ ପରିସ୍ଥିତିରେ ଲୋକଙ୍କ ଜୀବନ ସୁରକ୍ଷା ବଡ଼କଥା । ତେଣୁ ପରିସ୍ଥିତି ବାଧ୍ୟ କଲେ ରଥଯାତ୍ରା ହୋଇ ନ ପାରେ । ତାହାକୁ ସମସ୍ତେ ଗ୍ରହଣ କରିବା ଉଚିତ୍ ।
ଗଜପତି କହିଛନ୍ତି, ରଥଯାତ୍ରାର ୨ ମାସ ପୂର୍ବରୁ ରଥ ନିର୍ମାଣ ହୋଇଥାଏ । ଚଳିତବର୍ଷ କରୋନା ପାଇଁ ରଥ ନିର୍ମାଣରେ ବିଳମ୍ବ ହୋଇଛି । ପୁରୀ ଜିଲ୍ଲା ଗ୍ରୀନ୍ ଜୋନ୍ ରେ ଅର୍ନ୍ତଭୁକ୍ତ ହେବା ସହ ରଥଖଳା ସର୍ବସାଧାରଣଙ୍କ ପାଇଁ ଉଦ୍ଦିଷ୍ଟ ହୋଇ ନ ଥିବାରୁ ରଥ ନିର୍ମାଣ କାର୍ଯ୍ୟ ହୋଇପାରିବ । ଏହା ରାଜ୍ୟ ସରକାରଙ୍କୁ ଜଣାଇବାକୁ ପରିଚାଳନା କମିଟି ବୈଠକରେ ନିଷ୍ପତ୍ତି ହୋଇଛି ।
ଋଥ ନିର୍ମାଣ କାର୍ଯ୍ୟ ବିଳମ୍ବ ହୋଇଛି ସତ ହେଲେ ଏବେଠୁ ଆରମ୍ଭ କଲେ ରଥ କାମ ସରିପାରିବ । ରାଜ୍ୟ ସରକାର ପରିସ୍ଥିତିକୁ ଦେଖି ଯାହା ନିଷ୍ପତ୍ତି ନେବେ ଆମେ ତାହା ଗ୍ରହଣ କରିବୁ ବୋଲି ଗଜପତି କହିଛନ୍ତି ।
