ଭୁବନେଶ୍ୱର: ଗଲୱାନ୍ ଭ୍ୟାଲିରେ ଚୀନ୍ ସେନା ସହ ରକ୍ତାକ୍ତ ସଂଘର୍ଷରେ ସହିଦ ହୋଇଥିବା ୨୦ ଭାରତୀୟ ଯବାନଙ୍କ ମଧ୍ୟରେ ଅଛନ୍ତି ଓଡ଼ିଆ ପୁଅ ଚନ୍ଦ୍ରକାନ୍ତ ପ୍ରଧାନ ଏବଂ ନନ୍ଦୁରାମ ସୋରେନ୍ । ଦେଶ ପାଇଁ ବଳିଦାନ ଦେଇଥିବା ଏହି ବୀର ଯବାନଙ୍କ ପାଇଁ ଆଜି ସମଗ୍ର ଦେଶବାସୀଙ୍କ ଆଖିରୁ ଲୁହ ଝରୁଛି । ନିଜ ଘରସଂସାରକୁ ପର କରିଦେଇଥିଲେ ମଧ୍ୟ ମା ମାଟି ପାଇଁ ତ୍ୟାଗ ସେମାନଙ୍କୁ ଚିରକାଳ ଅମର କରିଦେଇଛି ।
କନ୍ଧମାଳ ଜିଲ୍ଲା ରାଇକିଆ ବିଅରପଙ୍ଗା ନିବାସୀ ଚନ୍ଦ୍ରକାନ୍ତ ପ୍ରଧାନ(୨୮)। ୨୦୧୪ ମସିହାରେ ବିହାର-୧୬ ରେଜିମେଣ୍ଟରେ ସିପାହୀ ଭାବେ ଯୋଗଦେଇଥିଲେ । ଘରେ ବାପା, ମାଆ, ଏକମାତ୍ର ବଡ଼ଭଉଣୀ ଏବଂ ଦୁଇ ସାନଭାଇ ଅଛନ୍ତି । ଗତ ଡିସେମ୍ବରରେ ଛୁଟିରେ ଘରକୁ ଆସି ଫେବୃଆରୀରେ ଫେରି ଯାଇଥିଲେ । ତାଙ୍କର ସାହାସୀ ଓ ସରଳ ବ୍ୟବହାର ପାଇଁ ଗାଁ ସାରା ଲୋକ ବହୁତ ଭଲ ପାଉଥିଲେ । ଗାଁରେ ଛୁଟି କଟାଉ ଥିବା ବେଳେ ଚୀନ୍ ବର୍ଡରରେ ଟେନସନ୍ ଚାଲିଥିବା ବର୍ଣ୍ଣନା କରିଥିଲେ । ମଙ୍ଗଳବାର ରାତି ୧୧ଟାରେ ତାଙ୍କର ମୃତ୍ୟୁ ଖବର ପ୍ରଥମେ ବାପା କରୁଣାକର ପ୍ରଧାନ ପାଇଲା ପରଠୁ ତାଙ୍କ ଆଖିରୁ ଲୁହ ଶୁଖୁନି । ନିଜର କାମ ପ୍ରତି ଚନ୍ଦ୍ରକାନ୍ତଙ୍କର ନିଷ୍ଠା, କଠୋର ପରିଶ୍ରମ ଓ ସାହାସିକତାକୁ ମନେ ପକାଉଛନ୍ତି ବାପା ।
ଅବିବାହିତ ଏକମାତ୍ର ରୋଜଗାରିଆ ପୁଅକୁ ହରାଇ କରୁଣାକର ଭାଙ୍ଗିପଡ଼ିଥିଲେ ମଧ୍ୟ ଦେଶ ମାତୃକାର ସେବାରେ ପୁଅ ଜୀବନକୁ ଉତ୍ସର୍ଗ କରିଥିବାରୁ ମନକୁ ଶାନ୍ତ୍ୱନା ଦେଇଛନ୍ତି । ଗ୍ରାମବାସୀଙ୍କ ମନରେ ଚନ୍ଦ୍ରକାନ୍ତଙ୍କ ମୃତ୍ୟୁ ପାଇଁ ଦୁଃଖ ଯେତିକି ଗର୍ବ ମଧ୍ୟ ସେତିକି ଦେଖିବାକୁ ମିଳିଛି ।
