ସମ୍ କୋଭିଡ୍ ହସ୍ପିଟାଲ୍ କାର୍ଯ୍ୟର ଅନୁଧ୍ୟାନ କଲେ ପାଣ୍ଡିଆନ୍

ଭୁବନେଶ୍ୱର: ସମ୍ ହସ୍ପିଟାଲ୍ ରେ ସ୍ଥାପନ ହେଉଥିବା ଦେଶର ସର୍ବବୃହତ୍ତ ୫୦୦ ।ଯ୍ୟା ବିଶିଷ୍ଟ କୋଭିଡ୍-୧୯ ହସ୍ପିଟାଲ୍ କାର୍ଯ୍ୟର ଅନୁଧ୍ୟାନ କରିଛନ୍ତି ୫-ଟି ସଚିବ ଭି.କେ. ପାଣ୍ଡିଆନ୍ । ଆଜି ସଂଧ୍ୟାରେ ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର, କୃଷି ସଚିବ ସୌରଭ ଗର୍ଗଙ୍କ ସହ ଶ୍ରୀ ପାଣ୍ଡିଆନ୍ ସୋଆ କ୍ୟାମ୍ପସ୍ ୨ର କନଭେନସନ ସେଣ୍ଟରରେ କାର୍ଯ୍ୟକ୍ଷମ ହେବାକୁ ଯାଉଥିବା କୋଭିଡ୍-୧୯ ହସ୍ପିଟାଲ୍ ପରିଦର୍ଶନ କରି ଏହାର ଭିତ୍ତିଭୂମି ଅନୁଧ୍ୟାନ କରିଥିଲେ ।

ସୋଆର ପ୍ରତିଷ୍ଠାତା ସଭାପତି ପ୍ରଫେସର ମନୋଜ ନାୟକ ହସ୍ପିଟାଲ୍ ଅଗ୍ରଗତି ସମ୍ପର୍କରେ ରାଜ୍ୟ ସରକାରଙ୍କ ଏହି ବରିଷ୍ଠ ଅଧିକାରୀମାନଙ୍କୁ ବିସ୍ତୃତ ତଥ୍ୟ ଦେଇଥିଲେ । ପାଣ୍ଡିଆନ୍ ଙ୍କ ସରକାରଙ୍କ ନିର୍ଦ୍ଦେଶ ଅନୁଯାୟୀ ଆସନ୍ତା ୧୫ ଦିନ ମଧ୍ୟରେ ଏହି ସ୍ୱତନ୍ତ୍ର ହସ୍ପିଟାଲ୍ କାର୍ଯ୍ୟକ୍ଷମ ହେବ ବୋଲି ସେ ପ୍ରତିଶ୍ରୁତି ଦେଇଛନ୍ତି । ଏଠାରେ କୋଭିଡ୍-୧୯ ସଂକ୍ରମିତଙ୍କ ଚିକିତ୍ସା ପାଇଁ ସ୍ୱତନ୍ତ୍ର ବ୍ୟବସ୍ଥା ସହ ରୋଗୀ ସେବା, ଡାକ୍ତର, ନର୍ସ, ପାରାମେଡ଼ିକାଲ ଷ୍ଟାଫ୍, ଲାବୋରେଟୋରି, ରେଡ଼ିଓଲୋଜିକାଲ, ଆଇସିୟୁ ଏବଂ ଅନ୍ୟାନ୍ୟ ସାହାଯ୍ୟ ଯୋଗାଇ ଦିଆଯିବ ବୋଲି କର୍ତ୍ତୃପକ୍ଷ ଜଣାଇଛନ୍ତି ।

ସୁଚନାଯୋଗ୍ୟ, କିମସ୍ ଏବଂ ସମ୍ ରେ ୫୦୦ ଶଯ୍ୟା ଲେଖାଏଁ ଦୁଇଟି କୋଭିଡ୍ ହସ୍ପିଟାଲ୍ ସ୍ଥାପନ ପାଇଁ ଗତ ୨୬ ତାରିଖରେ ଲୋକସେବା ଭବନରେ ତ୍ରିପକ୍ଷୀୟ ରାଜିନାମା ସ୍ୱାକ୍ଷରିତ ହୋଇଥିଲା । ରାଜ୍ୟ ସରକାର, କିମସ୍ ଓ ସମ୍ ହସ୍ପିଟାଲ୍ କର୍ତ୍ତୃପକ୍ଷ ଭିତ୍ତିଭୂମି ଯୋଗାଉଥିବା ବେଳେ ଓଡ଼ିଶା ଖଣି ନିଗମ ଓ ମହାନଦୀ କୋଲ୍ ଫିଲଡସ୍ ସିଏସଆର ପାଣ୍ଠିରୁ ଅର୍ଥ ଦେଉଛନ୍ତି । ରାଜ୍ୟ ସରକାର ସମସ୍ତ ସହଯୋଗ ଦେଇ ଏହାର ସମ୍ପୂର୍ଣ୍ଣ ତତ୍ତ୍ୱାବଧାନ କରୁଛନ୍ତି ।

ଗତକାଲି ସଂଧ୍ୟାରେ ମୁଖ୍ୟଶାସନ ସଚିବ ଅସିତ୍ ତ୍ରିପାଠୀ, ୫-ଟି ସଚିବ ଶ୍ରୀ ପାଣ୍ଡିଆନ୍, ସ୍ୱାସ୍ଥ୍ୟ ସଚିବ ନିକୁଞ୍ଜ କିଶୋର ଧଳ ଏବଂ ଡିଏମଇଟି ସିବିକେ ମହାନ୍ତି କିମସ୍ ଯାଇ କୋଭିଡ୍ ହସ୍ପିଟାଲ୍ ଅଗ୍ରଗତିର ଅନୁଧ୍ୟାନ କରିଥିଲେ ।

ଆଜି ପାଣ୍ଡିଆନ୍ ଙ୍କ ସମ୍ ହସ୍ପିଟାଲ୍ ପରିଦର୍ଶନ ବେଳେ ସୋଆ କୁଳପତି ଡାକ୍ତର ଅଶୋକ ମହାପାତ୍ର, ସମ୍ ହସ୍ପିଟାଲ୍ ସୁପରିଟେଣ୍ଡେଣ୍ଟ ପ୍ରଫେସର ପୁଷ୍ପରାଜ ସାମନ୍ତସିଂହାର, ଅତିରିକ୍ତ ମେଡ଼ିକାଲ୍ ସୁପରିଟେଣ୍ଡେଣ୍ଟ ଡାକ୍ତର ରାଜେଶ ଲେଙ୍କା, ଆଇଟିଇଆର୍ ନିର୍ଦ୍ଦେଶକ ପ୍ରଫେସର ମାନସ କୁମାର ମଲ୍ଲିକ, ସୋଆ ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ପ୍ରମୁଖ ଉପସ୍ଥିତ ଥିଲେ ।