ଭୁବନେଶ୍ୱର(ମିଡ-ଡେ ଓଡ଼ିଶା): ଶଶୀଭୂଷଣ ବେହେରା ହେଉଛନ୍ତି ବିଜେଡ଼ିର ମୁଖପାତ୍ର । ଭୁବନେଶ୍ୱର ଜୟଦେବ ନିର୍ବାଚନ ମଣ୍ଡଳୀର ବିଧାୟକ । ପୂର୍ବଥର ଏମପି ଥିଲେ । ତାହା ପୁଣି ରାଜ୍ୟସଭାର । ବିଜେଡ଼ିର ଏହି ବରିଷ୍ଠ ନେତା କହିଛନ୍ତି ନବୀନ ନିବାସକୁ ବହୁତ ଲୋକଆସନ୍ତି । ସରୋଜ ସାହୁ ସେମିତି ଆସୁଥିଲେ । ସିଏ ବିଜେଡ଼ିର ଜଣେ ସାଧାରଣ କର୍ମୀ । ସରୋଜଙ୍କୁ ନ୍ୟୁନ କରି ଦେଖାଇବା ଉଦ୍ଦେଶ୍ୟରେ ଟିଭି ଆଗରେ ଏହା କହିଛନ୍ତି ମାନ୍ୟବର ଶଶୀଭୂଷଣ ବେହେରା । ଏମିତିକା ଅଲାଜୁକ ନେତାଙ୍କ ମନ୍ତବ୍ୟ ଉପରେ ଚର୍ଚ୍ଚା କରିବାକୁ ଆମକୁ ଦ୍ୱିଧା ଲାଗୁଛି । ନେତାମାନେ ତେଲ ମାରି କ୍ଷମତା ଚଉକିରେ ବସିବାକୁ କେଉଁସ୍ତରକୁ ଯାଇପାରନ୍ତି ତାହା ଶଶୀଭୂଷଣ ବେହେରା ପୁଣି ଥରେ ଦେଖାଇ ଦେଇଛନ୍ତି । ସାଧାରଣ ଲୋକଙ୍କୁ ମୁର୍ଖ, ଭକୁଆ ଭାବୁଥିବା ଏହି ନେତାମାନଙ୍କୁ ଆମେ ସହ୍ୟ କରୁଛେ । ଭୋଟ ଦେଇ ଜିତୋଉଛେ ଯାହା ଆହୁରି କଷ୍ଟଦାୟକ ।
ସରୋଜ ସାହୁ କିଏ ? ତାଙ୍କର କ୍ଷମତା କ’ଣ ? ତାଙ୍କର ପ୍ରତିପତ୍ତି କ’ଣ ? ତାହା ଶଶୀଭୂଷଣଙ୍କଠାରୁ ବେଶୀ ଆଉ କେହି ଜାଣି ନ ଥିବେ । ବିଧାୟକଙ୍କୁ ମନେ ପକାଇ ଦେବାକୁ ଚାହୁଁ ଯେ ୨୦୧୪ ନିର୍ବାଚନ ଫଳାଫଳ ବାହାରିବା ଦିନ ବିଜୟ ଘୋଷିତ ହେଲା ପରେ ନବୀନଙ୍କୁ ଭେଟିବା ପାଇଁ ସେ ରାତି ୮ ଟା ବେଳକୁ ନବୀନ ନିବାସ ଯାଇଥିଲେ । ସେତେବେଳକୁ ନବୀନ ନିବାସ ୱେଟିଂ ରୁମ୍ ରେ ଟିଭି ସାମ୍ବାଦିକଙ୍କ ଭିଡ଼ ଥିଲା । ନବୀନ ଜଣ ଜଣ କରି ସାମ୍ବାଦିକଙ୍କୁ ସାକ୍ଷାତକାର ଦେଉଥିଲେ । ଏହି ସମୟରେ ଶଶୀଭୂଷଣ ପହଞ୍ଚିଥିଲେ । ମାତ୍ର ଭିତର ପ୍ରବେଶଦ୍ୱାରରେ ଜଗୁଆଳି ତାଙ୍କୁ ଅଟକାଇଥିଲେ । ଭିତରକୁ ଛାଡ଼ି ନ ଥିଲେ । ଅନୋନ୍ୟପାୟ ହୋଇ ଶଶୀଭୂଷଣ ଖୋଜିଥିଲେ ସରୋଜ ବାବୁଙ୍କୁ । ହେଲେ ସରୋଜ ବାବୁ ବି ତାଙ୍କୁ ଭେଟ ଦେଇ ନ ଥିଲେ । ବହୁ ନେହୁରା ହୋଇଥିଲେ ସରୋଜବାବୁଙ୍କ ଦର୍ଶନ ପାଇଁ । ତାଙ୍କ ଜରିଆରେ ନବୀନଙ୍କୁ ଭେଟିପାରିବେ ଏବଂ ଫୁଲତୋଡ଼ା ଦେଇପାରିବେ ବୋଲି ସେ ଜାଣିଥିଲେ । ଯାହାହେଉ ବହୁ କଷ୍ଟରେ ସାମ୍ବାଦିକଙ୍କ ଧାସରେ ଶଶୀଭୂଷଣ ଭିତରକୁ ପଶିଗଲେ । ଅବଶ୍ୟ ସେଠିକା ଦୃଶ୍ୟ ନ କହିବା ଭଲ । ଶଶୀଭୂଷଣଙ୍କୁ ଭିତରେ ଦେଖି ନବୀନ କାହିଁକି କେଜାଣି ଚିହିଁକି ଉଠିଲେ । ସାମ୍ବାଦିକଙ୍କ ଉପସ୍ଥିତିକୁ ଖାତିର ନ କରି ବହେ ଗାଳି କଲେ ଏବଂ ତାଙ୍କୁ ଗେଟ୍ ଆଉଟ୍ କହି ତଡ଼ିଦେଲେ ।
ଏ ବାବୁ ହେଉଛନ୍ତି ସେହି ଶଶୀଭୂଷଣ ବେହେରା । ଏବେ କହୁଛନ୍ତି କ’ଣ ନା ସରୋଜ ସାହୁ ବିଜେଡ଼ିର ଜଣେ ସାଧାରଣ କର୍ମୀ । ନବୀନ ନିବାସକୁ ଅନ୍ୟ କର୍ମୀଙ୍କ ଭଳି ଆତଯାତ କରନ୍ତି । ଏକଥା କହିଲା ବେଳେ ଶଶୀଭୂଷଣ ବାବୁଙ୍କୁ କେମିତି ଲଜ୍ଜା ସରମ୍ ଲାଗିଲାନି ତାହା ଆଚମ୍ବିତ ଲାଗୁଛି । ଦଳର ମୁଖପାତ୍ର ଭାବେ ଦଳକୁ ସୁରକ୍ଷା ଦେବାରେ ଭୁଲ୍ ନାହିଁ । ସେଥିପାଇଁ ଯୁକ୍ତି ଅଛି । ତା ବୋଲି କଳାକୁ ଧଳା କହିବା ଓ ସମସ୍ତଙ୍କୁ ମୁର୍ଖ, ଭକୁଆ ବନାଇବା ଜଣେ ମାର୍ଜିତ ରାଜନେତାଙ୍କଠାରୁ ଆଶା କରାଯାଏନି । ଏଠି ଲୋକ ନିରୀହ ହୋଇପାରନ୍ତି କିନ୍ତୁ ସଚେତନ । ସେମାନଙ୍କୁ ମୁର୍ଖ, ଅଜ୍ଞ ମନେ କରି ସରୋଜ ସାହୁଙ୍କ ପରିଚୟକୁ ବିଭ୍ରାନ୍ତ କରିବାକୁ ଚାହିଁଲେ ଲୋକ ସହିବେନି । କହିବା ବାହୁଲ୍ୟ, ନବୀନ ନିବାସ ସହିତ ସରୋଜ ସାହୁ ନାମଟି ଓତଃପ୍ରୋତ ଭାବେ ଜଡ଼ିତ । ନବେ ଦଶକରେ ଖବରକାଗଜ ବାଣ୍ଟୁଥିବା ସରୋଜଙ୍କୁ ଦେବାଶିଷ ନାୟକ ଆବିଷ୍କାର କରି ନବୀନଙ୍କ ଘରେ ବୋଲହାକ ପାଇଁ ରଖିଥିଲେ । ପରେ ସେଠି ତାଙ୍କୁ ଟାଇପ୍ ଶିଖାଇ ଟାଇପିଷ୍ଟ କାମ ଦିଆଯାଇଥିଲା । ସେବେଠାରୁ ସେ ଅଛନ୍ତି ନବୀନ ନିବାସରେ । ନବୀନଙ୍କର ବିଶ୍ୱସ୍ତ ପାଲଟି ଯାଇଛନ୍ତି । ସରୋଜଙ୍କ ଅନେକ ପରାମର୍ଶକୁ ନବୀନ ବିନା ଦ୍ୱିଧାରେ ଗ୍ରହଣ କରିନିଅନ୍ତି ବୋଲି ସମସ୍ତେ ଜାଣନ୍ତି । ନବୀନ ନିବାସରେ ସରୋଜଙ୍କର ଖାଦି ଓ ପ୍ରତିପତ୍ତି ଆଗରେ ବିଜେଡ଼ିର ବରିଷ୍ଠ ନେତା ଓ ମନ୍ତ୍ରୀମାନେ ବି ଧରାଶାୟୀ । ଏମିତିକି ସରୋଜଙ୍କୁ ଭେଟିବାକୁ ବି ନବୀନ ନିବାସ ଯାଇ ମନ୍ତ୍ରୀମାନେ ଅପେକ୍ଷା କରନ୍ତି ।
ସିସୋର୍ ଚିଟ୍ ଫଣ୍ଡ ମାମଲାରେ ସିବିଆଇ ୨୦୧୪ ନଭେମ୍ବର ୨୨ରେ ସରୋଜ ସାହୁଙ୍କୁ ଜେରା କରିବା ପରେ ରାଜ୍ୟ ରାଜନୀତିରେ ଭୂକମ୍ପନ ସୃଷ୍ଟି ହୋଇଥିଲା । ସିବିଆଇ ହାତ ନବୀନ ନିବାସରେ ପହଞ୍ଚିଗଲା ବୋଲି ଚର୍ଚ୍ଚା ହୋଇଥିଲା । ପରବର୍ତ୍ତୀ ସମୟରେ ସିବିଆଇ ଚୁପ୍ ହୋଇଯିବା ସହ ଚର୍ଚ୍ଚା ବି ଥମିଯାଇଥିଲା । ସେବେଠାରୁ ସରୋଜ ସାହୁଙ୍କ ଖୁଲମ ଖୋଲା ଆଧିପତ୍ୟ ନବୀନ ନିବାସରେ ବନ୍ଦ ହୋଇଥିଲେ ମଧ୍ୟ ଯାତାୟତ ବନ୍ଦ ହୋଇନାହିଁ କି ତାଙ୍କ ଉପରେ ନବୀନଙ୍କ ଭରସା ଓ ଆସ୍ଥା ତୁଟିନାହିଁ । ଏହି ସରୋଜ ସାହୁଙ୍କୁ ସିବିଆଇ ଦ୍ୱିତୀୟ ବାର ଜାଲରେ ଛନ୍ଦିଛି । ତାଙ୍କ ଘର ଛାନଭିନ୍ କରିଛି । ଆଗକୁ କ’ଣ ହେବ ତାହା ତ ଜଣାନାହିଁ । ହେଲେ ମୁଖ୍ୟମନ୍ତ୍ରୀ ଓ ବିଜେଡ଼ି ପାଇଁ ଏହା ଯେ ଶକ୍ତ ଧକ୍କା ତାହା ଶଶୀଭୂଷଣ ବେହେରା ମହୋଦୟ ଜାଣି ରଖିବା ଉଚିତ୍ । ସିବିଆଇକୁ ରାଜନୈତିକ ହତିଆର କହି ସତୀଚଉରା ବୋଲାଇଲେ ଚଳିବ ନାହିଁ । ଦୋଷୀଙ୍କ ପାଇଁ ବିଚାର ଏକା ହେଉ । ଯୌନ କେଳେଙ୍କାରି ଅଭିଯୁକ୍ତ ମେୟର ଅନନ୍ତ ନାରାୟଣ ଜେନାଙ୍କୁ ସୁରକ୍ଷା ଦେଇ ବାହାଦୁରି ମାରୁଥିବା ତଥାକଥିତ ବିଜେଡ଼ି ବଡ଼ପଣ୍ଡାମାନେ ସରୋଜ ସାହୁ, ରବିନ୍ଦ୍ର ଜେନା କି ପ୍ରଭାତ ବିଶ୍ୱାଳଙ୍କୁ ସୁରକ୍ଷା ଦେବା ଆଳରେ ଲୋକଙ୍କୁ ବିଭ୍ରାନ୍ତ ନ କରନ୍ତୁ । ଆଇନକୁ ଆଇନ ବାଟରେ ଯିବାକୁ ଛଡ଼ାଯାଉ ।
