ଲକ୍ଷ୍ମଣରେଖା ଡେଉଁଛି ମିଡ଼ିଆ!
‘ ବ୍ରେକିଂ ନ୍ୟୁଜ୍ ନୁହେଁ, ବ୍ରେକିଂ ନେସନ୍ ର ବେଳ’
ଭୁବନେଶ୍ୱର: ‘କରୋନା’ ବିପଦରୁ ରକ୍ଷା ପାଇବା ପାଇଁ ଜନସାଧାରଣଙ୍କୁ ବ୍ୟାପକ ସଚେତନ କରିବା ପରିବର୍ତ୍ତ କିଛି ଗଣମାଧ୍ୟମର ଦାୟିତ୍ୱହୀନତା ଓ ବ୍ରେକିଂ ଖବର ଝୁଙ୍କ୍ ସାଧାରଣରେ ପ୍ରତିକ୍ରିୟା ସୃଷ୍ଟି କରିଛି । ରାଜ୍ୟର ପ୍ରଥମ କରୋନା ସଂକ୍ରମିତ ଭାବେ ଇଟାଲୀ ଫେରନ୍ତା ଭୁବନେଶ୍ୱରର ଜଣେ ଯୁବକ ଚିହ୍ନଟ ହୋଇଛନ୍ତି । ତେବେ ଏହି ଖବର ଜଣାପଡ଼ିବା ପରେ କିଛି ଗଣମାଧ୍ୟମ ପ୍ରତିନିଧିଙ୍କ ଆଚରଣ ଜନସାଧାରଣଙ୍କ ସମେତ ଖୋଦ୍ ରାଜ୍ୟ ସରକାରଙ୍କୁ ଚିନ୍ତାରେ ପକାଇଛି ।
ସଂପୃକ୍ତ ଗଣମାଧ୍ୟମ ବ୍ରେକିଂ ଖବର ସଂଗ୍ରହ ନାଁରେ ଆକ୍ରାନ୍ତଙ୍କ ସମ୍ପର୍କୀୟଙ୍କଠାରୁ ବାଇଟ୍ ନେବାକୁ ପ୍ରତିଯୋଗିତା କରିଛନ୍ତି । ଏହା କେବଳ ମହାମାରୀ ଆଇନର ଉଲ୍ଲଂଘନ କରୁନାହିଁ, ବରଂ ଲୋକଙ୍କ ମନରେ ଅଧିକ ଆତଙ୍କ ସୃଷ୍ଟି କରିବା ସହ ନିଜ ଓ ନିଜ ପରିବେଶର ଲୋକଙ୍କ ପାଇଁ ବିପଦକୁ ଆମନ୍ତ୍ରଣ କରୁଛି । ଗଣମାଧ୍ୟମ ପ୍ରତିନିଧିଙ୍କ ଏହି ଦାୟିତ୍ୱହୀନତାକୁ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ୍ ବାଗଚୀ ସମାଲୋଚନା କରିବା ସହ ଏଭଳି ଆଚରଣରୁ ନିବୃତ୍ତ ରହିବାକୁ ପରାମର୍ଶ ଦେଇଛନ୍ତି । ଏଇଟା ବ୍ରେକିଂ ନ୍ୟୁଜ୍ ନୁହେଁ, ବ୍ରେକିଂ ନେସନ୍ ର ସମୟ ବୋଲି ସେ ଚେତାବନୀ ଦେଇଛନ୍ତି ।
ଇଟାଲୀରୁ ଫେରିଥିବା ଭୁବନେଶ୍ୱରର ଜଣେ ୩୩ ବର୍ଷ ଯୁବକଙ୍କଠାରେ କରୋନା ଭାଇରସ୍ ଚିହ୍ନଟ ହୋଇଥିବା ଆଜି ଏକ ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରିଛନ୍ତି ବାଗଚୀ । ଇଟାଲୀରେ ଗବେଷଣା କରୁଥିବା ଏହି ଯୁବକ ୬ ତାରିଖରେ ଦିଲ୍ଲୀ ଫେରିଥିଲେ ଏବଂ ୧୨ ତାରିଖରେ ଭୁବନେଶ୍ୱର ଆସିଥିଲେ । ଥଣ୍ଡା, ଜ୍ୱର ଯୋଗୁଁ ୧୩ ତାରିଖରେ ଜଣେ ଘରୋଇ ଡାକ୍ତରଙ୍କୁ ଦେଖାଇଥିଲେ । ୧୪ ତାରିଖରେ କ୍ୟାପିଟାଲ୍ ହସ୍ପିଟାଲ୍ ରେ ଆଡମିସନ୍ ହେବା ପରେ ୧୫ ତାରିଖରେ ତାଙ୍କ ରିପୋର୍ଟ ପଜିଟିଭ୍ ଆସିଛି । ସଂପୃକ୍ତ ଯୁବକଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ଅଛି । ତାଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିମାନଙ୍କୁ ଖୋଜା ଚାଲିଛି । ଏହାକୁ ନେଇ ଆତଙ୍କ ସୃଷ୍ଟି ନ କରିବାକୁ ଅନୁରୋଧ କରିଥିଲେ ବାଗଚୀ ।
ଏଥିସହ ଗଣମାଧ୍ୟମ ଦାୟିତ୍ୱବାନ ହେବା ପାଇଁ ସରକାରଙ୍କ ପକ୍ଷରୁ ବାଗଚୀ ପରାମର୍ଶ ଦେଇଛନ୍ତି । ‘କରୋନା’ ବିପର୍ଯ୍ୟୟର ପ୍ରତିହତ ପାଇଁ ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଦାୟିତ୍ୱ ଅଛି । କରୋନା ସମ୍ପର୍କିତ ଖବର ପ୍ରସାରଣ ବେଳେ ସନ୍ଦିଗ୍ଧ ଓ ଆକ୍ରାନ୍ତଙ୍କ ନାଁ ଓ ପରିଚୟ ଗୋପନ ରଖନ୍ତୁ । ସେମାନଙ୍କ ସମ୍ପର୍କରେ ଜଣାଇଲେ ଆକ୍ରାନ୍ତଙ୍କ ପରିବାର ବିପଦରେ ପଡ଼ିବେ । ବାଇଟ୍ ପାଇଁ ଗହଳି କଲେ ନିଜେ ବିପଦକୁ ଡାକିବା ସହ ଆକ୍ରାନ୍ତଙ୍କ ଚିକିତ୍ସାରେ ବ୍ୟାଘାତ ସୃଷ୍ଟି କରିବେ । ବ୍ରେକିଂ ନ୍ୟୁଜ୍ ପଛରେ ଗୋଡାଇଲେ ସମାଜ ବ୍ରେକ୍ ହେବାର ଆଶଙ୍କା ରହିଛି । ଏହାକୁ ନମାନିଲେ ଆଇନ ଅନୁଯାୟୀ ସରକାର ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସତର୍କ କରାଇଛନ୍ତି ବାଗଚୀ ।
