ଭୁବନେଶ୍ୱର: ସତ୍ୟବାଦୀର ପୂର୍ବତନ ବିଧାୟକ ରମାରଂଜନ ବଳିୟାରସିଂ ଆଜି ଔପଚାରିକ ଭାବେ ବିଜେଡ଼ି ଛାଡ଼ିଛନ୍ତି । ୨୦୧୪ ନିର୍ବାଚନରେ ବିଜେଡ଼ି ତାଙ୍କୁ ଟିକେଟ ଦେଇଥିଲା । ମାତ୍ର ଦଳର ବିଦ୍ରୋହୀ ପ୍ରାର୍ଥୀ ଉମା ସାମନ୍ତରାୟଙ୍କଠାରୁ ସେ ପରାସ୍ତ ହୋଇଥିଲେ । ନିର୍ବାଚନ ହାରିବା ପରେ ରମାଙ୍କର ଦଳରେ ଭାଉ କମିଯାଇଥିଲା । ତାଙ୍କ ଗୁରୁ ସାଂସଦ ପିନାକୀ ମିଶ୍ର ତାଙ୍କୁ ଉପରକୁ ଟେକିବାକୁ ଉଦ୍ୟମ କରିଥିଲେ ମଧ୍ୟ ସଫଳ ହୋଇ ନ ଥିଲେ । ସ୍ୱାଧୀନ ଭାବେ ଜିତିଥିବା ଉମା ସାମନ୍ତରାୟଙ୍କ ଉପରୁ ବିଜେଡ଼ି ନିଲମ୍ବନ ପ୍ରତ୍ୟାହାର କରିବା ପରେ ରମାଙ୍କ ଦୁଃଖ ଆହୁରି ବଢ଼ିଯାଇଥିଲା । ନିର୍ବାଚନମଣ୍ଡଳୀରେ ବିଜେଡ଼ି ସଂଗଠନକୁ ଉମା ସମ୍ପୂର୍ଣ୍ଣ ହାତମୁଠାକୁ ଆଣି ତାଙ୍କର ପାରମ୍ପରିକ ପ୍ରତିଦ୍ୱନ୍ଦୀ ରମାଙ୍କ ସ୍ଥିତି ହଜାଇ ଦେଇଥିଲେ । ଦଳରେ ଅଲୋଡ଼ା ହୋଇଯାଇଥିବା ରମା ପଞ୍ଚାୟତ ନିର୍ବାଚନ ପରେ ବିଜେପି ଆଡକୁ ଢ଼ଳିଥିଲେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଯୋଗସୂତ୍ର ରଖିଥିବା ନେଇ ଚର୍ଚ୍ଚା ହେଉଥିଲା । ଆଉ ଏହାକୁ ସାକାର କରିବାକୁ ବିଜେଡ଼ିରୁ ଆଜି ବିଧିବଦ୍ଧ ଇସ୍ତଫା ଦେଇଛନ୍ତି । ଖୁବ୍ ଶୀଘ୍ର ରମା ବିଜେପିରେ ଯୋଗଦେଇ ସତ୍ୟବାଦୀରେ ନୂଆ ଇଂନିସ୍ ଆରମ୍ଭ କରିବେ ବୋଲି ତାଙ୍କର କିଛି ସମର୍ଥକଙ୍କଠାରୁ ସୂଚନା ମିଳିଛି ।
ରମା ବଳିୟାରସିଂ ବିଜେଡ଼ି ଛାଡ଼ିବା ପରେ ତୃତୀୟ ମହଲାର ଅଣଓଡ଼ିଆ ଅଫିସରଙ୍କୁ ଟାର୍ଗେଟ୍ କରିଛନ୍ତି । ଦଳୀୟ ବ୍ୟାପାର କଥା ଆଗରୁ ପ୍ୟାରୀମୋହନ ମହାପାତ୍ର ବୁଝୁଥିଲେ ଏବେ ତାମିଲ ଅଫିସର ବୁଝୁଛନ୍ତି କହି ନବୀନଙ୍କ ଉପରେ ନିର୍ଘାତ୍ ବର୍ଷିଛନ୍ତି । ତେବେ ଦଳ ଛାଡ଼ିଲା ପରେ ରମାଙ୍କ ଏଭଳି ହାଇ ଭୋଲଟେଜ୍ ଡାଇଲଗ୍ ସାଧାରଣରେ କୌତୁହଳ ସୃଷ୍ଟି କରିଛି । ଏ ଭିତରେ ସେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଚେଲା କେବେଠୁଁ ହୋଇସାରିଲେଣି ବୋଲି ଅନେକ ପ୍ରଶ୍ନ କରିଛନ୍ତି । ବିଜେଡ଼ି ନେତାଙ୍କ କହିବାନୁଯାୟୀ, ରମା ଆଜି ଯେଉଁ କଥା କହୁଛନ୍ତି ତାହା ପୂର୍ବରୁ କହିଥିଲେ ଠିକ୍ ହୋଇଥାଆନ୍ତା । ମାତ୍ର ନିର୍ବାଚନମଣ୍ଡଳୀରେ ମାଟି ହୋଇସାରିଥିବା ନେତା ବିଜେପି ଉଷୁମ ପାଇ ଚାଙ୍ଗା ହେବା ଆଉ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମୁଖସ୍ଥ ଡାଇଲଗ୍ କୁ ପାଳି ଧରିବା ଲୋକହସା ଛଡ଼ା କିଛି ନୁହେଁ । କ୍ଷମତା ଓ ଅର୍ଥ ପାଇଁ ନେତା କେଉଁସ୍ତରକୁ ଯାଇପାରନ୍ତି ରମା ତାହାର ଜ୍ୱଳନ୍ତ ଉଦାହରଣ ବୋଲି କୁହାଯାଉଛି ।
