ଡ୍ରେନ୍ ରେ ଭାସିଗଲେ ଦଶମ ଛାତ୍ର

ଭୁବନେଶ୍ୱର: ଅତ୍ୟନ୍ତ ହୃଦୟ ବିଦାରକ ଓ ଦୁଃଖଦାୟକ ଘଟଣା । ସାଇକେଲରେ ଟ୍ୟୁସନ୍ ଯାଉଥିବା ରାଜଧାନୀର ଜଣେ ଦଶମ ଶ୍ରେଣୀ ଛାତ୍ର ବର୍ଷା ପାଣିର ସୁଅ ଛୁଟିଥିବା ମୁକୁଳା ଡ୍ରେନ୍ ରେ ପଡ଼ି ଭାସି ଯାଇଛନ୍ତି । ଦିନ ଦୁଇଟାରୁ ଖୋଜା ଚାଲିଥିଲେ ମଧ୍ୟ ତାଙ୍କର ପତ୍ତା ମିଳୁନାହିଁ । ପୁଲିସ, ଦମକଳ ବାହିନୀ ଓ ସ୍ଥାନୀୟ ଲୋକେ ଉଦ୍ଧାର କାର୍ଯ୍ୟରେ ଲାଗିଛନ୍ତି । ତେବେ ରାତି ହୋଇଯିବାରୁ ସର୍ଚ୍ଚ ଅପରେସନ୍ କୁ ବନ୍ଦ କରାଯାଇଛି । ଆସନ୍ତାକାଲି ସକାଳୁ ଏହା ପୁଣି ଚାଲିବ ।

ଡ୍ରେନ୍ ରେ ଭାସିଯାଇଥିବା ଛାତ୍ର ଜଣକ ହେଲେ ଜ୍ୟୋତିର୍ମୟ ବେହେରା । ବୟସ ୧୫ ବର୍ଷ । ବରମୁଣ୍ଡା ପାଲାମଣ୍ଡପ ସାହିରେ ଘର । ସରସ୍ୱତୀ ଶିଶୁ ମନ୍ଦିରରେ ପାଠ ପଢୁଥିଲେ । ସବୁଦିନ ଭଳି ଆଜି ମଧ୍ୟ ଅପରାହ୍ନ ଦୁଇଟାରେ ଶିରିପୁର ଶତାବ୍ଦୀ ନଗର ବ୍ୟାଙ୍କ କଲୋନୀକୁ ଟ୍ୟୁସନ୍ ପାଇଁ ଘରୁ ବାହାରିଥିଲେ । ପ୍ରବଳ ବର୍ଷା ହୋଇଥିବାରୁ ଟ୍ୟୁସନ୍ ଯିବା ପାଇଁ ତାଙ୍କ ମା’ ବାରଣ କରିଥିଲେ ମଧ୍ୟ ଜ୍ୟୋତିର୍ମୟ ଶୁଣି ନ ଥିଲେ । ସାର୍ ଙ୍କୁ ସଂସ୍କୃତ କପି ଦେବାର ଅଛି କହି ସାଇକେଲ୍ ରେ ବାହାରି ଯାଇଥିଲେ ।

ପ୍ରବଳ ବର୍ଷା ଯୋଗୁଁ ଶତାବ୍ଦୀ ନଗର ବ୍ୟାଙ୍କ କଲୋନୀ ଅଞ୍ଚଳରେ ପାଣି ଜମିଥିବାରୁ ଜ୍ୟୋତିର୍ମୟ ରାସ୍ତାରେ ଭାରସାମ୍ୟ ହରାଇଥିବା ଅନୁମାନ କରାଯାଉଛି । ସାଇକେଲରୁ  ସିଧା ମୁକୁଳା ଡ୍ରେନ୍ ରେ ଖସି ପଡ଼ିଥିଲେ । ଆଉ ଡ୍ରେନ୍ ପାଣିର ପ୍ରବଳ ସ୍ରୋତରେ ଭାସିଯାଇଥିଲେ । ଦୁଇଜଣ ଯୁବକ ଏହା ଦୂରରୁ ଦେଖିଲା ପରେ ଦୌଡ଼ି ଆସି ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ । ତେବେ ସାଇକେଲ୍ ଟିକୁ ଉଦ୍ଧାର କରାଯାଇଥିଲେ ମଧ୍ୟ ପିଲାଟିକୁ ଉଦ୍ଧାର କରିବା ସମ୍ଭବ ହୋଇ ନ ଥିଲା ।

ପ୍ରାୟ ତିନିବର୍ଷ ତଳେ ଭୁବନେଶ୍ୱରର ସାଲିଆସାହିସ୍ଥିତ ଏକାମ୍ର ଭିଲ୍ଲା ଛକରେ ଏଭଳି ଏକ ଅଭାବନୀୟ ଘଟଣା ଆଲୋଡ଼ନ ସୃଷ୍ଟି କରିଥିଲା । ବିଏମସିର ମୁକୁଳା ଡ୍ରେନ୍ ରେ ପଡ଼ିଯାଇ ଜଣେ ବ୍ୟକ୍ତି ପ୍ରାଣ ହରାଇଥିଲେ । ତେବେ ବିଏମସି କର୍ତ୍ତୃପକ୍ଷ ସେହି ଘଟଣାରୁ କିଛି ଶିକ୍ଷାଲାଭ କରିନାହାନ୍ତି ।

ରାଜଧାନୀର ଅନେକ ଜାଗାରେ ଡ୍ରେନ୍ ମୁକୁଳା ପଡ଼ି ଲୋକଙ୍କ ଜୀବନ ପ୍ରତି ଭୟଙ୍କର ବିପଦ ସୃଷ୍ଟି କରିଛି । କୌଣସି ପରିସ୍ଥିତିରେ ଡ୍ରେନ୍ ମୁକୁଳା ରହିବନି ବୋଲି ଅଦାଲତଙ୍କ ଆଦେଶକୁ ମଧ୍ୟ ବିଏମସି ପାଳନ କରିବାରେ ସମର୍ଥ ହୋଇନି । ବିଏମସି କର୍ତ୍ତୃପକ୍ଷଙ୍କ ଦାୟିତ୍ୱହୀନତା ଯୋଗୁଁ ଆଜି ପୁଣି ଅଘଟଣ ଘଟିଲା ବୋଲି ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।