ଭୁବନେଶ୍ୱର: କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଜନ୍ମମାଟି ଅନୁଗୁଳରେ ଛିଡ଼ା ହୋଇ ଆଜି ତାଙ୍କୁ ଧୂମ୍ ଧୂଲେଇ କରିଛନ୍ତି ୫-ଟି ତଥା ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ । ଗୋଟିଏ ଦଶନ୍ଧି ଧରି କେନ୍ଦ୍ରରେ କ୍ଷମତାଶାଳୀ ମନ୍ତ୍ରୀ ରହି ଅନୁଗୁଳ ମାଟି ପାଇଁ କ’ଣ କରିଛନ୍ତି ବୋଲି ପ୍ରଶ୍ନ କରିଛନ୍ତି । ଦୁଇ ଦୁଇଟି ଗୁରୁତ୍ୱପୂର୍ଣ୍ଣ ବିଭାଗରେ ମନ୍ତ୍ରୀ ରହି ସେ କିଛି କରିନାହାନ୍ତି । ତାଙ୍କ ହାତରେ କେନ୍ଦ୍ରୀୟ ବିଦ୍ୟାଳୟ ଖୋଲିବାର ଦାୟିତ୍ୱ ଥାଇ ବି ସେ ନିଜ ମାଟି ପାଇଁ କିଛି କରିନାହାନ୍ତି । ଚାହିଁଥିଲେ ପ୍ରତି ବ୍ଲକ୍ ପାଇଁ ଗୋଟେ ଗୋଟେ କେନ୍ଦ୍ରୀୟ ବିଦ୍ୟାଳୟ ଖୋଲିପାରିଥାନ୍ତେ । ତାଙ୍କ ଅଭିଯୋଗ ମୁତାବକ ଜିଲ୍ଲାରୁ ଦାଦନ ଶ୍ରମିକ ସମସ୍ୟା ଦୂର କରିପାରିଥାନ୍ତେ । ୫୫ ନମ୍ବର ଜାତୀୟ ରାଜପଥ ନିର୍ମାଣ କାର୍ଯ୍ୟ ଶେଷ କରିପାରିଥାନ୍ତେ । ଏତେ କ୍ଷମତା ଥାଇ ଯଦି ଲୋକଙ୍କ ସେବା କରିପାରିବେନି, ତେବେ ତାଠୁଁ ଦୁଃଖର କଥା କ’ଣ ହୋଇପାରେ ବୋଲି ସେ କହିଛନ୍ତି ।
