ଭୁବନେଶ୍ୱର: ଧାମନଗର, ଅନୁଗୁଳ ପରେ ଆଜି ନୟାଗଡ଼ର ରଣପୁରରେ ଆୟୋଜିତ ସଭାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପୁଣି ଟାର୍ଗେଟ୍ କରିଛନ୍ତି ୫-ଟି ତଥା ନବୀନ ଓଡ଼ିଶା ଅଧ୍ୟକ୍ଷ ଭି କାର୍ତ୍ତିକ ପାଣ୍ଡିଆନ୍ । ରାଜ୍ୟ ସରକାରଙ୍କ ବିଏସକେୱାଇ କାର୍ଡ ଯୋଜନାକୁ କେନ୍ଦ୍ରମନ୍ତ୍ରୀଙ୍କ ସମାଲୋଚନାର ସେ ଜବାବ ଦେଇଛନ୍ତି । ସତସାହାସ ଥିଲେ ତାଙ୍କ ଦଳ ଆଗାମୀ ନିର୍ବାଚନୀ ଇସ୍ତାହାରରେ ଏହି ଯୋଜନା ବନ୍ଦ କରିବା ଲାଗି ଘୋଷଣା କରିବାକୁ ଆହ୍ୱାନ ଦେଇଛନ୍ତି । ଏଥିସହ ବିଏସକେୱାଇ କାର୍ଡର ଉପଯୋଗିତା ସମ୍ପର୍କରେ କେନ୍ଦ୍ରମନ୍ତ୍ରୀଙ୍କ ଉଦ୍ଦେଶ୍ୟରେ ତଥ୍ୟ ରଖିଥିଲେ ।
ଶ୍ରୀ ପାଣ୍ଡିଆନ୍ ଆଜି ଖୋର୍ଦ୍ଧା ଓ ନୟାଗଡ଼ ଜିଲ୍ଲା ଗସ୍ତ କରିଥିଲେ । ପ୍ରଥମେ ଖୋର୍ଦ୍ଧା ହାବେଳି ପଡ଼ିଆଠାରେ ଆୟୋଜିତ ନୂଆ ଓ କାର୍ଯ୍ୟକ୍ରମରେ ଯୋଗଦେଇ ଛାତ୍ରଛାତ୍ରୀଙ୍କୁ ପ୍ରେରଣା ଦେଇଥିଲେ । ସେ କହିଥିଲେ, କଠିନ ପରିଶ୍ରମ ହିଁ ସଫଳତାର ମୂଳମନ୍ତ୍ର । ଏହାର କୌଣସି ବିକଳ୍ପ ନାହିଁ । ଏହି ପରିପ୍ରେକ୍ଷୀରେ ତାଙ୍କର ଜଣେ ଆଇଏଏସ୍ ମହିଳା ବ୍ୟାଚମେଣ୍ଟ ଙ୍କ ସଫଳତା ଓ ସଂଘର୍ଷର କାହାଣୀ କହିଥିଲେ । ରାଜସ୍ଥାନର ଏକ ନିପଟ ମଫସଲରୁ ଆସିଥିବା ଏହି ମହିଳା କଲେଜ ନ ଯାଇ ବି କଠିନ ପରିଶ୍ରମ ବଳରେ ଆଇଏଏସ୍ ଟପ୍ପର୍ ହୋଇଥିଲେ ।
ଏହାପରେ ସେ ଚିଲିକା ନିର୍ବାଚନମଣ୍ଡଳୀ ଅନ୍ତର୍ଗତ ବାଣପୁରର ମା ଭଗବତୀଙ୍କ ପୀଠରେ ପହଞ୍ଚି ରୂପାନ୍ତରଣ କାର୍ଯ୍ୟର ସମୀକ୍ଷା କରିଥିଲେ । ମା ଭଗବତୀଙ୍କ ଦର୍ଶନ ସହ ସେବାୟତମାନଙ୍କ ସହ ଆଲୋଚନା କରିଥିଲେ । ୫-ଟି ଅଧ୍ୟକ୍ଷଙ୍କୁ ଭଗବତୀ ମନ୍ଦିର ପ୍ରାଙ୍ଗଣରେ ରାଜ୍ୟସଭା ସାଂସଦ ମାନସ ମଙ୍ଗରାଜ ସ୍ୱାଗତ କରିଥିଲେ । ସେଠାରୁ ତାଙ୍କୁ ଏକ ବିରାଟ ପଟୁଆରରେ ପଲଟଣ ପଡ଼ିଆ ପର୍ଯ୍ୟନ୍ତ ନିଆଯାଇଥିଲା । ସେଠାରେ ସାଂସଦ ଶ୍ରୀ ମଙ୍ଗରାଜଙ୍କ ସମେତ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ଖୋର୍ଦ୍ଧା ଜିଲ୍ଲା ପର୍ଯ୍ୟବେକ୍ଷକ ରବୀନ୍ଦ୍ର ଜେନା ପ୍ରମୁଖ ସ୍ୱାଗତ କରିଥିଲେ । ଶ୍ରୀ ପାଣ୍ଡିଆନଙ୍କୁ ପାଇକଙ୍କ ପ୍ରତୀକ ଏକ ଢ଼ାଲ, ଖଣ୍ଡା ଓ ଶିରୋପା ଦେଇଥିଲେ ଶ୍ରୀ ମଙ୍ଗରାଜ ।
ସେଠାରେ ଆୟୋଜିତ ସାଧାରଣ ସଭାରେ ଶ୍ରୀ ପାଣ୍ଡିଆନ ଚିଲିକା ନିର୍ବାଚନମଣ୍ଡଳୀର ବିଭିନ୍ନ ଉନ୍ନୟନମୂଳକ କାର୍ଯ୍ୟର ହିସାବ ଦେଇଥିଲେ । ଗତ ୪ ମାସରେ ଏହି ନିର୍ବାଚନମଣ୍ଡଳୀକୁ ମୁଖ୍ୟମନ୍ତ୍ରୀ ୯୦ କୋଟି ଟଙ୍କାର ଅନୁଦାନ ଦେଇଛନ୍ତି । ମା ଭଗବତୀଙ୍କ ମନ୍ଦିରର ରୂପାନ୍ତରଣ ଲାଗି ୩୩ କୋଟି, ଚନ୍ଦନେଶ୍ୱର ଶିବ ମନ୍ଦିରର ଉନ୍ନତି ପାଇଁ ଦେଢ଼କୋଟି, ବାଣପୁରର ଗୋଦାବରୀଶ କଲେଜର ଉନ୍ନତି ପାଇଁ ୨ କୋଟି ୨୫ ଲକ୍ଷ, ବାଲୁଗାଁ କଲେଜର ଉନ୍ନତି ପାଇଁ ଦେଢ଼କୋଟି ଅନୁଦାନ ଦିଆଯାଇଛି । ବାଣପୁର ଏନଏସି ଅନ୍ତର୍ଭୁକ୍ତ ଡ୍ରେନ ଓ ରାସ୍ତା ପାଇଁ ୨୬ କୋଟି ଟଙ୍କାର ଆକଳନ ପ୍ରସ୍ତୁତ ହୋଇଛି ବୋଲି ଶ୍ରୀ ପାଣ୍ଡିଆନ୍ ସୂଚନା ଦେଇଥିଲେ ।
