ଭୁବନେଶ୍ୱର: ସାନ ଝିଅର ନିର୍ବନ୍ଧ ପାଇଁ ପ୍ରସ୍ତୁତି ସରିଥିଲା । ଖୁସିରେ ମସଗୁଲ ଥିଲେ ବେହେରା ପରିବାର । ମା’ ଙ୍କ ଆଶୀର୍ବାଦ ଭିକ୍ଷା କରିବାକୁ ଯାଇଥିଲେ । ହେଲେ ଦଇବର ବିଚାର ଅଲଗା ଥିଲା । ଅଲଗା ବାଟକୁ ଟାଣି ହୋଇଗଲେ । ଯେଉଁଠୁ କେହି ଆଉ ଫେରନ୍ତିନି । ଏଭଳି ଏକ ହୃଦୟ ବିଦାରକୁ ଘଟଣା ଆଜି ସମସ୍ତଙ୍କୁ ସ୍ତବ୍ଧ କରିଦେଇଛି । ମଧ୍ୟପ୍ରଦେଶକୁ ମନ୍ଦିର ଦର୍ଶନ ପାଇଁ ଯାଇଥିବା ଭୁବନେଶ୍ୱର ଜୟଦେବ ବିହାର ଅଞ୍ଚଳର ଗୋଟେ ପରିବାରର ୭ ଜଣଙ୍କର ଦୁଃଖଦ ମୃତ୍ୟୁ ଘଟିଛି । ରାସ୍ତାରେ ଆସୁଥିବା ବେଳେ ରାସ୍ତାକଡ଼ ଏକ ନାଳରେ ଭାସିଯାଇ ସମସ୍ତେ ପ୍ରାଣ ହରାଇଛନ୍ତି । ମୃତକଙ୍କ ମଧ୍ୟରେ ଅଛନ୍ତି ୩ ପିଲା, ୨ ମହିଳା ଏବଂ ୩ ପୁରୁଷ ।
ମଧ୍ୟପ୍ରଦେଶର ଅଗର ମାଲୱା ଜିଲ୍ଲାର ନାଲଖେଡ଼ା ଅଞ୍ଚଳରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ଗାଡ଼ିରେ ଡ୍ରାଇଭରଙ୍କୁ ମିଶାଇ ୮ ଜଣ ଥିଲେ । ମା’ ବଗଳାମୁଖୀ ମନ୍ଦିର ଦର୍ଶନ ନିମନ୍ତେ ଯାଉଥିବା ବେଳେ ପ୍ରବଳ ବର୍ଷା ଯୋଗୁଁ ନାଳ ପାଣିରେ ବୁଡ଼ିଥିବା ଏକ ରାସ୍ତାରେ ସେମାନଙ୍କ ଗାଡ଼ି ପଡ଼ିଥିଲା । ରାସ୍ତାରେ ନାଳପାଣିର ସୁଅ ଛୁଟୁଥିଲେ ମଧ୍ୟ ନିଶାର୍ଦ୍ଧ ରାତି ଓ ଘୋର ଅନ୍ଧାର ଭିତରେ ସ୍ଥାନୀୟ ଅଞ୍ଚଳର ଡ୍ରାଇଭର ଠିକ୍ ରେ ଠଉରାଇ ପାରି ନ ଥିଲେ । ରାସ୍ତା ଅତିକ୍ରମ କରିଯିବେ ବୋଲି ଭାବିଲା ବେଳକୁ ଗାଡ଼ି ପାଣିର ସ୍ରୋତରେ ଭାସିଯାଇଥିବା ଅନୁମାନ କରାଯାଉଛି । ଗାଡ଼ି ଭିତରେ ଶ୍ୱାସରୁଦ୍ଧ ହୋଇ ସମସ୍ତଙ୍କର ଜୀବନ ଚାଲିଯାଇଥିଲା ।
ଅଧାରାତିରେ ଏହି ନିଛାଟିଆ ରାସ୍ତାରେ ଲୋକଙ୍କର ଚଳପ୍ରଚଳ ନ ଥିବାରୁ ଦୁର୍ଘଟଣା ସମ୍ପର୍କରେ ସକାଳୁ ଜଣାପଡ଼ିଥିଲା । ସ୍ଥାନୀୟ ଲୋକ ପୁଲିସକୁ ଖବର ଦେଲା ପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ସବୁ ସରିଯାଇଥିଲା । ସେମାନଙ୍କ ପାଖରେ ଥିବା ଆଧାର କାର୍ଡରୁ ପୁଲିସ ପରିଚୟ ସଂଗ୍ରହ କରିଥିଲା । ପୁଲିସ ଏବଂ ସ୍ଥାନୀୟ ପ୍ରଶାସନ ଗାଡ଼ି ଭିତରୁ ଶବଗୁଡ଼ିକୁ ବାହାର କରିଥିଲେ । କେଉଁ ପରିସ୍ଥିତିରେ ଦୁର୍ଘଟଣା ହେଲା ତାହାର ତଦନ୍ତ ଆରମ୍ଭ ହୋଇଛି ।
ମୃତକମାନେ ଜୟଦେବବିହାର ଅଞ୍ଚଳର ପ୍ରତିଷ୍ଠିତ ବନ ଢ଼ାବା ମାଲିକ ବନମାଳି ବେହେରାଙ୍କ ପରିବାରର ସଦସ୍ୟ । ସେମାନେ ହେଲେ- ଜ୍ଞାନେନ୍ଦ୍ର ବେହେରା(ଜ୍ୱାଇଁ), ରୀତାରାଣୀ ବେହେରା(ବଡ଼ଝିଅ), ରାଧାରାଣୀ ବେହେରା(ସାନଝିଅ), ଶିବ ପ୍ରସାଦ ବେହେରା(ପୁଅ), ବି. ସାଇ ସ୍ୱସ୍ତିକ(ନାତି), କ୍ରିଷ୍ଣା ରାଜବୀର(ନାତି) ଏବଂ ସାଇରା ସୋନପ୍ରଭା(ନାତୁଣୀ) । ଗୁରୁବାର ରାତିରେ ସେମାନେ ଘରୁ ଯାଇଥିଲେ । ବୁଧବାର ଫେରିଥାନ୍ତେ । ରାଧାରାଣୀଙ୍କର ବିବାହ ସ୍ଥିର ହୋଇସାରିଥିଲା । ଆସନ୍ତା ୨୭ ତାରିଖରେ ତାଙ୍କର ନିର୍ବଦ୍ଧ ହୋଇଥାନ୍ତା । ସେଥିପାଇଁ ପରିବାରର ସମସ୍ତେ ବେଶ୍ ଖୁସି ଥିଲେ ।
ମଧ୍ୟପ୍ରଦେଶରୁ ମୃତଦେହ ବିମାନରେ ଭୁବନେଶ୍ୱର ଆଣିବା ପାଇଁ ବନେ୍ଦାବସ୍ତ ହୋଇଛି । ରାଜ୍ୟ ସରକାର ଏହି ଖର୍ଚ୍ଚ ବହନ କରିବେ ।
ଏହି ଦୁଃଖଦ ଘଟଣାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ବିରୋଧୀ ଦଳ ନେତା ନବୀନ ପଟ୍ଟନାୟକ ଗଭୀର ଦୁଃଖ ପ୍ରକାଶ କରିବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି ।
